ក្រុមបាល់ទាត់នារីកម្ពុជា រំពឹងខ្ពស់ឡើងវគ្គផ្តាច់ព្រ័ត្រ AFF Women’s Cup លើកទី២
- ភ្នំពេញ
រាជធានីភ្នំពេញ ៖ ក្រុមបាល់ទាត់ជម្រើសជាតិនារីកម្ពុជា បានដាក់ការរំពឹងខ្ពស់ឡើងវគ្គផ្ដាច់ព្រ័ត្រ ពានរង្វាន់ AFF Women’s Cup ឆ្នាំ ២០២៦ ពេលជួបជាមួយក្រុមបាល់ទាត់ជម្រើសជាតិនារីឡាវ នៅវេលាម៉ោង៣ និង៤៥នាទីរសៀល ថ្ងៃអាទិត្យ ទី១៩ ខែកក្កដា ក្នុងវគ្គពាក់កណ្តាលផ្តាច់ព្រ័ត្រ នៅកីឡដ្ឋានប្រទេសម៉ាឡេស៊ី។
ការរំពឹងខ្ពស់ឡើងវគ្គផ្ដាច់ព្រ័ត្រពានរង្វាន់ AFF Women’s Cup ឆ្នាំ ២០២៦ជាលើកទី២ ដោយសារក្រុមនារីកម្ពុជា និងនារីឡាវ ធ្លាប់មានប្រវត្តិជួបគ្នាចំនួន២លើក ក្នុងនោះ ឡាវ មិនធ្លាប់ឈ្នះ កម្ពុជា ឡើយ ។ ជួបគ្នាលើកទី១ក្នុងពានរង្វាន់ AFF Women’s Championship ឆ្នាំ ២០២២ ក្រុមទាំងពីរបញ្ចប់ដោយលទ្ធផលស្មើគ្នា ១-១ និងការជួបគ្នាលើកទី២ កម្ពុជា បានឈ្នះឡាវ ដោយលទ្ធផល ២-០ ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ ២០២៣ ដែលកម្ពុជាធ្វើម្ចាស់ផ្ទះ។
ផ្អែកលើគុណភាពរបស់ក្រុមទាំងពីរ គឺ ក្រុមនារីកម្ពុជាមានកម្រិតល្អជាងក្រុមនារីឡាវ ដូច្នេះមានសង្ឃឹមខ្ពស់ក្នុងការទទួលបានជ័យជម្នះដើម្បីឡើងទៅកាន់វគ្គផ្តាច់ព្រ័ត្រជាលើកទី២ បន្ទាប់ពីបានឡើងវគ្គផ្តាច់ព្រ័ត្រ លើកទី១ កាលពីឆ្នាំ ២០២៤។ ជាមួយគ្នានេះ ក្រុមនារីឥណ្ឌូណេស៊ី ក៏សង្ឃឹមច្រើនក្នុងការទទួលបានជ័យជម្នះលើក្រុមនារី សិង្ហបុរី ដែរ។ ទោះបីជាយ៉ាងណា ការជួបគ្នាចុងក្រោយ ឥណ្ឌូណេស៊ី បានចាញ់ សិង្ហបុរី ២-០ ក្នុងជំនួបមិត្តភាពកាលពីដើមខែមិថុនាកន្លងទៅថ្មីៗនេះ។
គួររំលឹកផងដែរថា ក្រុមនារីកម្ពុជា បានឡើងវគ្គពាក់កណ្តាលផ្តាច់ព្រ័ត្រ ក្នុងនាមជាក្រុមលេខ ១ ពូល B បន្ទាប់ពីឈ្នះក្រុមនារីទីម័រខាងកើត ដោយលទ្ធផល ៣-១ និង ស្មើជាមួយឥណ្ឌូណេស៊ី ដោយលទ្ធផល ១-១។
ចំណែកក្រុមនារីឡាវជាក្រុមលេខ២ក្នុងពូល Aដែលរកបាន២ពិន្ទុប៉ុណ្ណោះ បន្ទាប់ពីស្មើម្ចាស់ផ្ទះ ម៉ាឡេស៊ី ១-១ និង ស្មើសិង្ហបុរី ១-១។
ចំណែកក្រុមនារីឥណ្ឌូណេស៊ី លេខ២ពូលBមាន៤ពិន្ទុ បន្ទាប់ពីឈ្នះក្រុមនារីទីម័រខាងកើត ២-០ និងស្មើកម្ពុជា ១-១ ឡើងទៅកាន់វគ្គពាក់កណ្តាលផ្តាច់ព្រ័ត្រ ជួបក្រុមនារីសិង្ហបុរី ដែលជាក្រុមលេខ ១ ពូល A។ ក្រុមនារីសសិង្ហបុរី បានស្មើ ឡាវ ១-១ និង បានឈ្នះម្ចាស់ផ្ទះម៉ាឡេស៊ី ៣-១។
សូមបញ្ជាក់ថា ពានបាល់ទាត់នារី AFF Women’s Cup លើកទី១ កាលពីឆ្នាំ ២០២៤ ក្រុមនារីឥណ្ឌូណេស៊ី ជាម្ចាស់ជើងឯក ក្រុមនារីកម្ពុជា លេខ ២ និងក្រុមនារី សិង្ហបុរី លេខ ៣។ ក្រុមដែលទទួលបានចំណាត់ថ្នាក់លេខ១ លេខ ២ និងលេខ ៣ ទទួលបានកៅអីឡើងទៅប្រកួតពានរង្វាន់នារីកម្រិតទី១ប្រចាំតំបន់អាស៊ាន AFF Women’s Championship ឆ្នាំ ២០២៦។
ខាងក្រោមជាកម្មវិធីប្រកួតវគ្គពាក់កណ្តាលផ្តាច់ព្រ័ត្រថ្ងៃទី១៩ ខែកក្កដា ឆ្នាំ ២០២៦៖
កម្ពុជា ប៉ះ ឡាវ នៅម៉ោង៣និង៤៥នាទីរសៀល
សិង្ហបុរី ប៉ះ ឥណ្ឌូណេស៊ី នៅម៉ោង៧
និង៤៥នាទីយប់ ៕
ចែករំលែកព័តមាននេះ