សហរដ្ឋអាមេរិក ៖ បន្ទាប់ពីរង់ចាំអស់រយៈពេលជិត៣ឆ្នាំ ពោល ៩៨១ ថ្ងៃ នៅទីបំផុត ក្រុមអ្នកគាំទ្របានឃើញខ្សែប្រយុទ្ធឆ្នើម Neymar វិលត្រឡប់មកកាន់ទីលានប្រកួតម្តងទៀត សម្រាប់ក្រុមជម្រើសជាតិប្រេស៊ីល នៅក្នុងព្រឹត្តិការណ៍ World Cup ឆ្នាំ ២០២៦ ដោយត្រូវបានប្តូរចូលនៅនាទី ៧៦ នៅក្នុងការប្រកួតចុងក្រោយ ពូល C ដោយយកឈ្នះស្កុតឡែនដោយលទ្ធផល ៣-០ កាលពីវេលាព្រឹកថ្ងៃទី២៥ ខែមិថុនា ឆ្នាំ២០២៦ (ម៉ោងនៅកម្ពុជា)។
បើទោះជាមិនអាចរកគ្រាប់បាល់បញ្ចូលទីក៏ពិតមែន ប៉ុន្តែ Neymar និងអ្នកគាំទ្រជាច្រើនបានសម្រក់ទឹកភ្នែកដោយក្តីរំភើប និងរីករាយជាទីបំផុត។ មុនត្រឡប់មកជាន់ទីលានវិញសម្រាប់ការប្រកួតទល់នឹងស្កុតឡែននោះ គឺ Neymar បានចំណាយពេល ៩៨១ថ្ងៃឃ្លាតឆ្ងាយពីក្រុមជម្រើសជាតិប្រេស៊ីល ហើយក៏ជារយៈពេលខកខានដ៏យូរបំផុតផងដែររបស់ខ្សែប្រយុទ្ធឆ្នើមវ័យ៣៤ឆ្នាំរូបនេះ គិតចាប់តាំងពីរូបគេបង្ហាញខ្លួនលើកដំបូងឱ្យប្រេស៊ីលក្នុងឆ្នាំ ២០១០។
បើទោះបីជាលែងបានចូលលេងញឹកញាប់ដូចមុនក៏ដោយ ក៏ Neymar នៅតែជាកីឡាករម្នាក់ដ៏មានឥទ្ធិពលបំផុតម្នាក់នៅក្នុងប្រវត្តិសាស្ត្របាល់ទាត់ប្រេស៊ីល។ បច្ចុប្បន្ន រូបគេរកបានគ្រាប់បាល់ចំនួន ៧៩ គ្រាប់ឱ្យក្រុមជម្រើសជាតិ ជាចំនួនច្រើនបំផុតក្នុងប្រវត្តិសាស្ត្ររបស់ក្រុមសាំបាប្រេស៊ីល ហើយមុនប្រកួតជាមួយស្កុតឡែន Neymar ធ្លាប់បង្ហាញខ្លួនបាន ១២៨ ប្រកួតឱ្យក្រុមជម្រើសជាតិ ជាមួយពេលប្រកួតសរុបជាង ១ម៉ឺននាទី។
ការបង្ហាញខ្លួនចុងក្រោយរបស់ Neymar សម្រាប់ប្រេស៊ីល កើតឡើងកាលពីថ្ងៃទី១៧ ខែតុលា ឆ្នាំ២០២៣ នៅក្នុងជំនួបប្រកួតជាមួយអ៊ុយរ៉ូហ្គាយ អំឡុងពេលជម្រុះ World Cup តំបន់អាមេរិកខាងត្បូង។ នៅក្នុងការប្រកួតនោះ រូបគេបានរងរបួសធ្ងន់ធ្ងរ ដោយដាច់សរសៃពួរជង្គង់ខាងមុខ (ACL) និងខូចឆ្អឹងខ្ចីជង្គង់ខាងឆ្វេង។ ដ្បិត World Cup ឆ្នាំ២០២៦ គឺជាក្លាយជាការបង្ហាញខ្លួនលើកទី ៤ របស់ Neymar ជាមួយព្រឹត្តិការណ៍ធំបំផុតរបស់ពិភពលោកផងដែរ បន្ទាប់ពីការបង្ហាញខ្លួនក្នុងឆ្នាំ២០១៤, ២០១៨ និង២០២២ បើទោះបីជារូបគេមិនទាន់ឈ្នះជើងឯកយ៉ាងណាក៏ដោយ។
ការវិលត្រឡប់មកកាន់ទីលានវិញ គឺមានសារៈសំខាន់ខ្លាំងចំពោះ Neymar ខ្លួនឯងផ្ទាល់ ហើយវាក៏ផ្តល់នូវជម្រើសដ៏សំខាន់មួយសម្រាប់លោក Carlo Ancelotti គ្រូបង្វឹកជនជាតិអ៊ីតាលី មុនពេលចាប់ផ្តើមការប្រកួតវគ្គ៣២ក្រុម។ ដ្បិតប្រេស៊ីល និងម៉ារ៉ុកបានដឹកដៃគ្នាឡើងទៅវគ្គ៣២ក្រុម ចំណែកស្កុតឡែនបញ្ចប់នៅក្នុងនាមក្រុមលេខ ៣ ល្អ ខណៈដែលហៃទីហាលអាវត្រឹមវគ្គចែកពូល៕
ចែករំលែកព័តមាននេះ