រាជធានីភ្នំពេញ ៖ សហព័ន្ធកីឡាបាល់ទះកម្ពុជា បានសម្រេចចែកផ្លូវគ្នាជាមួយគ្រូបង្វឹកលី ជុន (Li Jun) បន្ទាប់ពីលោកបានដឹកនាំក្រុមបាល់ទះជម្រើសជាតិកម្ពុជាអស់រយៈពេល៩ឆ្នាំ ។ ក្រោមការដឹកនាំរបស់គ្រូបង្វឹកសញ្ជាតិចិនរូបនេះ…
រាជធានីភ្នំពេញ ៖ សហព័ន្ធកីឡាបាល់ទះកម្ពុជា បានសម្រេចចែកផ្លូវគ្នាជាមួយគ្រូបង្វឹកលី ជុន (Li Jun) បន្ទាប់ពីលោកបានដឹកនាំក្រុមបាល់ទះជម្រើសជាតិកម្ពុជាអស់រយៈពេល៩ឆ្នាំ ។ ក្រោមការដឹកនាំរបស់គ្រូបង្វឹកសញ្ជាតិចិនរូបនេះ ក្រុមបាល់ទះជម្រើសជាតិកម្ពុជាបានបង្កើតប្រវត្តិសាស្ត្រជាច្រើនឱ្យពិភពលោកបានឃើញទាំងសមត្ថភាព និងសមិទ្ធផល ។ ខាងក្រោមនេះជាសមិទ្ធផលធំៗរបស់ក្រុមបាល់ទះជម្រើសជាតិកម្ពុជាក្រោមការដឹកនាំរបស់លោកលី ជុន។
លោកបានដឹកនាំក្រុមជម្រើសជាតិកម្ពុជា ឡើងវគ្គពាក់កណ្តាលផ្តាច់ព្រ័ត្រកីឡាស៊ីហ្គេម លើកដំបូងកាលពីឆ្នាំ ២០២១ និងបង្កើតប្រវត្តិឈ្នះមេដាយសំរឹទ្ធកីឡាស៊ីហ្គេម ជាលើកដំបូង។
ពីរឆ្នាំក្រោយមក ក្រុមបាល់ទះជម្រើសជាតិកម្ពុជា បានបង្កើតប្រវត្តិសាស្ត្រជាថ្មីដោយឈានដល់វគ្គផ្តាច់ព្រ័ត្រកីឡាស៊ីហ្គេមឆ្នាំ២០២៣ នៅពេលកម្ពុជាធ្វើជាម្ចាស់ផ្ទះ ហើយបានឈ្នះមេដាយប្រាក់កីឡាស៊ីហ្គេម ជាលើកដំបូងទៀត ។ សមិទ្ធផលដ៏អស្ចារ្យមួយទៀត គឺក្រុមបាល់ទះជម្រើសជាតិកម្ពុជា បានឈ្នះជើងឯកពានអាស៊ានកម្រិតទី២ SEA V. League Challenge ឆ្នាំ ២០២៤ បន្ទាប់ពីបានយកឈ្នះលើដៃគូទាំងអស់មានដូចជា ម៉ាឡេស៊ី សិង្ហបុរី និងឡាវ។
សមិទ្ធផលដែលមិនអាចបំភ្លេចបាននោះគឺ ក្រុមបាល់ទះជម្រើសជាតិកម្ពុជា បានយកឈ្នះក្រុមបាល់ទះជម្រើសជាតិថៃ ២ លើកជាប់គ្នាក្នុងកីឡាស៊ីហ្គេម គឺ ឈ្នះថៃ ៣-២ ដើម្បីបានមេដាយសំរឹទ្ធកីឡាស៊ីហ្គេម ឆ្នាំ២០២១ នៅប្រទេសវៀតណាម និងឈ្នះ ថៃ ៣-២ ទៀតនៅវគ្គពាក់កណ្តាលផ្តាច់ព្រ័ត្រក្នុងកីឡាស៊ីហ្គេម ឆ្នាំ ២០២៣ ។ ជាមួយគ្នានេះ ក្រុមបាល់ទះជម្រើសជាតិកម្ពុជា បានដកខ្លួនចេញ
ពីពានអាស៊ានកម្រិតទី២ SEA V. League Challenge ដើម្បីបានឡើងទៅពានកម្រិតទី១ SEA V. League។ ក្រុមជម្រើសជាតិកម្ពុជា ក៏បានបង្កើតស្ថិតិក្នុងការយកឈ្នះក្រុមជម្រើសជាតិវៀតណាម សិង្ហបុរី និងហ្វីលីពីន ថែមទៀត។
បន្ទាប់ពីទទួលបានសមិទ្ធផលល្អទាំងនៅកីឡាស៊ីហ្គេម ក្រុមបាល់ទះជម្រើសជាតិកម្ពុជា បានចូលរួមប្រកួតកីឡាទ្វីបអាស៊ី ជាលើកដំបូង កាលពីចុងឆ្នាំ ២០២៣ នៅប្រទេសចិន។ ប៉ុន្មានឆ្នាំចុងក្រោយនេះ ភាពខ្លាំងរបស់ក្រុមបាល់ទះជម្រើសជាតិកម្ពុជាបានទាក់ទាញអ្នកគាំទ្រយ៉ាងខ្លាំងឲ្យចាប់អារម្មណ៍លើកីឡាបាល់ទះដែលបានធ្វើឲ្យកីឡាមួយនេះមានប្រជាប្រិយភាពមិនចាញ់កីឡាបាល់ទាត់ និងកីឡាប្រដាល់ឡើយ។
លោកគ្រូ លី ជុន បានដឹកនាំក្រុមបាល់ទះជម្រើសជាតិកម្ពុជាអស់រយៈពេល ៩ ឆ្នាំ ហើយនៅដើមខែមីនា ឆ្នាំ ២០២៦ លោក និងសហព័ន្ធកីឡាបាល់ទះកម្ពុជាបានសម្រេចចែកផ្លូវគ្នា។ នៅក្នុងឆ្នាំ ២០២៦ ក្រុមបាល់ទះជម្រើសជាតិកម្ពុជាមានភារកិច្ចចូលរួមប្រកួតពាន SEA V. League ដូច្នេះទំនងជាគ្រូបង្វឹកថ្មីដឹកនាំ ៕
ចែករំលែកព័តមាននេះ