សហរដ្ឋអាមេរិក ៖ កីឡាករប្រដាល់សកលឆ្នើមអាមេរិក Floyd Mayweather បានដាក់ពាក្យបណ្តឹងនៅតុលាការក្នុងរដ្ឋញូវយ៉ក (New York) សហរដ្ឋអាមេរិក ដោយទាមទារប្រាក់យ៉ាងតិច…
សហរដ្ឋអាមេរិក ៖ កីឡាករប្រដាល់សកលឆ្នើមអាមេរិក Floyd Mayweather បានដាក់ពាក្យបណ្តឹងនៅតុលាការក្នុងរដ្ឋញូវយ៉ក (New York) សហរដ្ឋអាមេរិក ដោយទាមទារប្រាក់យ៉ាងតិច ១៧៥លានដុល្លារអាមេរិកពីអតីតអ្នកគ្រប់គ្រងវិនិយោគ និងទីប្រឹក្សាអចលនទ្រព្យរបស់ខ្លួន ក្រោមការចោទប្រកាន់ពីបទក្លែងបន្លំ និងរំលោភលើសេចក្តីទំនុកចិត្តអស់រយៈពេលជាច្រើនឆ្នាំ។ នេះបើតាមប្រភពពី ESPN បានចេញផ្សាយ។
តាមរយៈបណ្តឹងបានចោទថា លោក Jona Rechnitz អតីតអ្នកចាត់ការរបស់ Floyd និងលោក Ayal Frist អ្នកគ្រប់គ្រងក្រុមហ៊ុន Frist Apex Ventures ដែលជាក្រុមហ៊ុនវិនិយោគ និងអចលនទ្រព្យមានមូលដ្ឋាននៅរដ្ឋផ្លរីដា ដែលជាក្រុមហ៊ុនលុយភាគច្រើនរបស់ Floyd ត្រូវបានវិនិយោគនៅទីនោះថាបានប្រព្រឹត្តអំពើបោកប្រាស់ និងរួមចំណែកពាក់ព័ន្ធនឹងការរំលោភលើកាតព្វកិច្ចទំនុកចិត្ត។
បន្ថែមពីលើលោក Rechnitz និង Frist បណ្តឹងនេះ ក៏បានដាក់ឈ្មោះ លោក Alexander Seligson មេធាវីម្នាក់ដែលបានដោះស្រាយបុនហិរញ្ញប្បទាននៃអចលនទ្រព្យមួយរបស់ Floyd ដោយចោទប្រកាន់មេធាវីរូបនោះពីបទគ្រប់គ្រងមូលនិធិមិនបានត្រឹមត្រូវ។
ពាក្យបណ្តឹងរបស់ Floyd បានចោទប្រកាន់លើបញ្ហាជាច្រើន ដោយក្នុងនោះរួមមានទាំង ៖ ការផ្ទេរប្រាក់ខុសច្បាប់ ៧,៥ លានដុល្លារ ដោយវេរទៅក្រុមហ៊ុន Frist Apex កាលពីឆ្នាំ២០២៤ សម្រាប់វិនិយោគរយៈពេល១២ខែ ប៉ុន្តែគ្មានការវិនិយោគណាមួយត្រូវបានធ្វើឡើង ហើយប្រាក់ដើមដំបូងក៏មិនត្រូវបានប្រគល់ត្រឡប់មកវិញ។ ការបង្វែរប្រាក់ខុសច្បាប់ ១៥ លានដុល្លារ ដោយបែងចែកប្រាក់របស់ Floyd ទៅឱ្យក្រុមហ៊ុន Frist Apex ដោយគ្មានការអនុញ្ញាត ក្រោមការបង្គាប់បញ្ជារបស់បុគ្គល Rechnitz។
ការបញ្ចាំគ្រឿងអលង្ការតម្លៃជិត ១០០លានដុល្លារ ដោយបុគ្គល Rechnitz បានយកគ្រឿងអលង្ការ Floyd ទៅបញ្ចាំឱ្យជាងមាស និងពេជ្រពីររូបនៅទីក្រុងម៉ៃអាមី (Miami) ដើម្បីដូរយកប្រាក់ត្រឹម ១៣លានដុល្លារប៉ុណ្ណោះ ដោយគ្មានការផ្តល់របាយការណ៍គណនេយ្យច្បាស់លាស់ជូនម្ចាស់កម្មសិទ្ធិ។
លើសពីនេះទៀត បណ្តឹងក៏បានអះអាងផងដែរថា Floyd បានចុះហត្ថលេខាលក់យន្តហោះ Gulfstream IV ឆ្នាំ ១៩៩៦ របស់ខ្លួន តាមការស្នើសុំលោក Rechnitz ដោយគ្មានអ្នកទិញណាម្នាក់ត្រូវបានចុះបញ្ជី ហើយលុយបានពីការលក់ត្រូវបានប្រើប្រាស់សម្រាប់កាតព្វកិច្ចទាក់ទងនឹងរថយន្តទំនើប Bugatti ដូចជាការថែទាំជាដើម ប៉ុន្តែធាតុពិតលុយត្រូវបានបង្វែរទៅក្រុមហ៊ុន Frist Apex ដោយមិនជូនដំណឹងដល់ Floyd។
បណ្តឹងខាងលើនេះ គឺបណ្តឹងក្លែងបន្លំដ៏ធំដែលបានបន្ថែមទៅលើបញ្ជីនៃការប្រយុទ្ធផ្លូវច្បាប់ និងហិរញ្ញវត្ថុបច្ចុប្បន្នរបស់លោក Floyd។ បច្ចុប្បន្នអ្នកប្រដាល់កំពូលឌឺវ័យ៤៩ឆ្នាំរូបនេះ ក៏ជាដើមបណ្តឹងដាច់ដោយឡែកមួយទៀតមានតម្លៃ ៣៤០លានដុល្លារ ដែលបានដាក់កាលពីដើមឆ្នាំនេះ ដោយចោទប្រកាន់ក្រុមហ៊ុន Showtime ថាបានចូលរួមក្នុងការប្រើប្រាស់ហិរញ្ញវត្ថុដោយខុស អំឡុងពេលភាពជាដៃគូផ្សាយជាមួយគ្នា។
លើសពីនេះទៀត កាលពីថ្មីៗនេះ អាជ្ញាធរចំណូលផ្ទៃក្នុងសហរដ្ឋអាមរិក (IRS) បានដាក់ពាក្យបណ្តឹងពន្ធចំនួន ៧,៣ លានដុល្លារប្រឆាំងនឹង Floyd ចំពោះការមិនបានបង់ពន្ធចាប់ពីឆ្នាំ ២០១៨ និង ២០២៣៕
ចែករំលែកព័តមាននេះ