រាជធានីភ្នំពេញ ៖ ឯកឧត្តមវ៉ាត់ ចំរើនរដ្ឋលេខាធិការក្រសួងអប់រំ យុវជន និងកីឡាបានមានប្រសាសន៍នៅក្នុងសន្និសីទសារព័ត៌មាន នៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីព្រឹកថ្ងៃទី១ ឧសភា ថា ក្រសួងអប់រំគាំទ្រយ៉ាងពេញទំហឹងចំពោះការរៀបចំឱ្យមានការប្រកួតបាល់ទាត់ពានរង្វាន់កុមារអាយុក្រោម១២ឆ្នាំ…
រាជធានីភ្នំពេញ ៖ ឯកឧត្តមវ៉ាត់ ចំរើនរដ្ឋលេខាធិការក្រសួងអប់រំ យុវជន និងកីឡាបានមានប្រសាសន៍នៅក្នុងសន្និសីទសារព័ត៌មាន នៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីព្រឹកថ្ងៃទី១ ឧសភា ថា ក្រសួងអប់រំគាំទ្រយ៉ាងពេញទំហឹងចំពោះការរៀបចំឱ្យមានការប្រកួតបាល់ទាត់ពានរង្វាន់កុមារអាយុក្រោម១២ឆ្នាំ និង១៤ឆ្នាំ ដែលជាការប្រកួតបាល់ទាត់បែបសហគមន៍ ស្របទៅតាមផែនការយុទ្ធសាស្ត្រវិស័យអប់រំឆ្នាំ២០២៤-២០២៨។
តំណាងឯកឧត្តមបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់ររំយុវជននិងកីឡា ឯកឧត្តមវ៉ាត់ ចំរើន បន្តថា ការប្រកួតកីឡាបាល់ទាត់ដណ្ដើមពានរង្វាន់កុមារគឺបានរួមចំណែកក្នុងការបណ្ដុះបណ្ដាលនិងអភិវឌ្ឍធនធានកីឡាតាំងពីតូចៗដើម្បីឱ្យពួកគេមានឱកាសបានស្នងតំណែងអ្នកជំនាន់មុន ជាពិសេសនៅក្នុងវិស័យកីឡាបាល់ទាត់ដែលកម្ពុជាកំពុងរីកចម្រើន ។
ជាក់ស្ដែងដូចជាគ្រួសារលោកពែកមីគឺជាគំរូស្រាប់ លោកមិនត្រឹមតែបានបណ្ដុះបណ្ដាលកូនៗឱ្យលេងកីឡាបាល់ទាត់ប៉ុណ្ណោះទេ ថែមទាំងជួយដល់កុមារតូចជាច្រើននាក់ដែលមាននិស្ស័យចូលចិត្តលេងកីឡាបាល់ទាត់ឱ្យមកហាត់លេងនៅក្នុងទីលានរបស់គាត់យ៉ាងច្រើនកុះករទៀតផង។
ឯកឧត្តមបានសង្កត់ធ្ងន់ថា អ្នកចូលចិត្តកីឡាគេមិនដែលគិតរឿងចំណេញនោះទេ ធ្វើយ៉ាងណាដើម្បីសកម្មភាពកីឡា ហើយរាល់សកម្មភាពទាំងនោះ បានចូលរួមអភិវឌ្ឍសង្គម ការកសាងគុណភាពជីវិត អប់រំផ្លូវកាយនិងផ្លូវចិត្ត ដើម្បីឱ្យចលនារាងកាយបានរឹងមាំតាំងពីក្មេងទៅ។
ឯកឧត្តម វ៉ាត់ ចំរើន បានលើកឡើងទៀតថា សកម្មភាពកីឡាគឺជាចលនាមួយរបស់អូឡាំពិក ជាពិសេសការរៀបចំឱ្យមានព្រឹត្តិការណ៍ប្រកួតកីឡាបាល់ទាត់ដណ្ដើមពានរង្វាន់អាយុក្រោម១៤ឆ្នាំនាពេលនេះគឺជាគំរូដ៏ល្អសម្រាប់អ្នកផ្សេងក្នុងការចូលរួមនៅក្នុងបាល់ទាត់។ ទន្ទឹមគ្នានេះដែរ ក្រសួងអប់រំ យុវជន និងកីឡាតែងតែយកចិត្តទុកដាក់ទៅលើការលេងកីឡាជាចម្បង ព្រោះថាការលេងកីឡាអាចជួយសង្គ្រោះអាយុជីវិតប្រជាពលរដ្ឋបានច្រើនជាងការមិនលេងកីឡា ។ ក្រសួងអប់រំ យុវជន និងកីឡាក៏មានយន្តការដូចបណ្ដាប្រទេសជាច្រើននៅលើពិភពលោកក្នុងការកសាងកីឡា ដោយបច្ចុប្បន្នក្រសួងកំពុងជំរុញឱ្យមានលេងកីឡាតាំងពីថ្នាក់មត្តេយ្យរហូតទៅ។
លោកង៉ែត វិទ្ធី មន្ត្រីគណៈកម្មការរៀបចំការប្រកួតឱ្យដឹងថា ព្រឹត្តិការណ៍បាល់ទាត់កុមារធ្វើឡើងក្នុងកម្រិតអាយុក្រោម១២ឆ្នាំ និងក្រោម១៤ឆ្នាំហើយក្នុង១កម្រិតអាយុយកតែ១៦ក្រុម ។
ការប្រកួតនឹងធ្វើឡើងចាប់ពីចុងខែឧសភា គឺការប្រកួតក្នុងវគ្គជម្រុះទាំងពីរកម្រិតអាយុនៅទីលានរាជធានីភ្នំពេញ បាត់ដំបង សៀមរាប ខណៈនៅវគ្គផ្ដាច់ព្រ័ត្រធ្វើនៅរាជធានីភ្នំពេញវិញ។
គណៈកម្មការប្រកាសឱ្យមានការចុះឈ្មោះដោយសេរី ៕
ចែករំលែកព័តមាននេះ