ប្រទេសកាណាដា ៖ ក្រុមបាល់ទាត់ជម្រើសជាតិកាណាដាក្នុងនាមជាម្ចាស់ផ្ទះ បានក្លាយជាក្រុមដំបូងគេបង្អស់ឡើងទៅវគ្គ ១៦ ក្រុមចុងក្រោយ នៃព្រឹត្តិការណ៍ World Cup ឆ្នាំ២០២៦ ក្រោយយកឈ្នះលើអាហ្វ្រិកខាងត្បូងទាំងលំបាកនៅវិនាទីចុងក្រោយ ដោយលទ្ធផល ១-០ កាលពីវេលាឈានចូលព្រឹកថ្ងៃទី២៩ ខែមិថុនា (ម៉ោងនៅកម្ពុជា)។
ក្រៅពីជាក្រុមដំបូងគេបង្អស់ឡើងទៅវគ្គ ១៦ ក្រុមចុងក្រោយ World Cup ឆ្នាំ២០២៦ ហើយនោះ កាណាដាក៏បានបង្កើតប្រវត្តិសាស្ត្រឡើងទៅដល់វគ្គនេះជាលើកដំបូងផងដែរ បន្ទាប់ពីបានយកឈ្នះអាហ្វ្រិកខាងត្បូងនៅវគ្គ ៣២ ក្រុម ហើយគ្រាប់បាល់ជ័យជម្នះដ៏សំខាន់នៅក្នុងវិនាទីដ៏រន្ធត់នេះ សម្រេចបានដោយខ្សែបម្រើ Stephen Eustáquio នៅនាទី ៩០+២។
ក្រោយពីកញ្ចែបញ្ចប់ការប្រកួតបានបន្លឺឡើង នៅក្នុងជ័យជម្នះជាប្រវត្តិសាស្ត្រ គ្រូបង្វឹកលោក Jesse Marsch បានហៅកីឡាករ និងក្រុមការងារទាំងអស់មកប្រមូលផ្តុំគ្នាជារង្វង់យ៉ាងធំ រួចថ្លែងពាក្យពេចន៍បំផុសគំនិតមួយចំនួនទៅកាន់ពួកគេ។ លោកបានហៅក្រុមទាំងមូលថា «វីរៈបុរសកាណាដា» ដោយនិយាយថា អនាគតកីឡាបាល់ទាត់នៅក្នុងប្រទេសកាណាដា គឺធំធេងខ្លាំងណាស់ ដោយសារតែអ្នកទាំងអស់គ្នា។ ឥឡូវនេះវាចាប់ផ្តើមត្រូវបានគេស្គាល់ថា Football ហើយមិនមែន Soccer ទៀតទេ។ កាណាដាកំពុងក្លាយជាប្រទេសបាល់ទាត់ (Football) មួយហើយ៕ ប្រភព ៖ BBC
ចែករំលែកព័តមាននេះ