ទីក្រុងសេអ៊ូល ៖ ប្រធានាធិបតីកូរ៉េខាងត្បូង លោក លី ចេម្យុង (Lee Jae-myung) បានបញ្ជាឱ្យក្រសួងវប្បធម៌ កីឡា និងទេសចរណ៍ ស៊ើបអង្កេតលើការធ្លាក់ចេញពីព្រឹត្តិការណ៍ World Cup ឆ្នាំ២០២៦ ត្រឹមវគ្គចែកពូលរបស់ក្រុមជម្រើសជាតិ ក៏ដូចជាការលាលែងពីតំណែងរបស់គ្រូបង្វឹក លោក ហុង ម្យុងបូ (Hong Myung-bo) ផងដែរ។ នេះបើយោងតាមប្រភពពី The New York Times និង Yahoo Sports បានចេញផ្សាយនៅថ្ងៃទី២៩ ខែមិថុនា ឆ្នាំ២០២៦។
លោក លី បានថ្លែងថា លោកស្រឡាំងកាំងយ៉ាងខ្លាំងជាមួយលទ្ធផល ហើយបានបង្ហាញការរិះគន់ចំៗថា ការបរាជ័យនេះ កើតចេញពីការតែងតាំងគ្រូបង្វឹកខុសឆ្គងរបស់សមាគមបាល់ទាត់កូរ៉េខាងត្បូង។ លោកបានបង្គាប់ឱ្យក្រសួងវប្បធម៌ កីឡា និងទេសចរណ៍ធ្វើការស៊ើបអង្កេតឱ្យស៊ីជម្រៅលើការចំណាយថវិកាជាតិ និងការគ្រប់គ្រងរបស់សមាគមកីឡាបាល់ទាត់ផងដែរ។
នៅក្នុងសេចក្តីថ្លែងការណ៍ដ៏វែងមួយដែលបានបង្ហោះនៅលើបណ្តាញសង្គម X លោកបានបញ្ជាក់ដូច្នេះថា «ខ្ញុំមិនត្រឹមតែភ្ញាក់ផ្អើលចំពោះលទ្ធផលដែលមិននឹកស្មានដល់នេះទេ ប៉ុន្តែខ្ញុំពិតជាស្រឡាំងកាំងយ៉ាងខ្លាំង។ ដោយសារថវិការបស់អ្នកបង់ពន្ធ និងធនធានគាំទ្ររបស់រដ្ឋយ៉ាងច្រើនសន្ធឹកសន្ធាប់ត្រូវបានវិនិយោគ សូម្បីតែក្នុងការចូលរួមប្រកួត World Cup។ ខ្ញុំសូមស្នើឱ្យក្រសួងវប្បធម៌ កីឡា និងទេសចរណ៍ ស៊ើបអង្កេតឱ្យបានហ្មត់ចត់អំពីកាលៈទេសៈច្បាស់លាស់នៃបញ្ហានេះ វិភាគលើមូលហេតុ និងបង្កើតវិធានការឱ្យបានហ្មត់ចត់ដើម្បីការពារកុំឱ្យមានការកើតឡើងវិញ និងដើម្បីធ្វើការកែលម្អ។ យើងនឹងជំរុញការកែទម្រង់រដ្ឋបាលកីឡាយ៉ាងឆាប់រហ័ស ដើម្បីធានាថា រឿងបែបនេះនឹងមិនកើតឡើងម្តងទៀតឡើយ»។
កាលពីថ្ងៃទី២៨ ខែមិថុនា ឆ្នាំ២០២៦ លោកគ្រូបង្វឹក ហុង ម្យុងបូ បានប្រកាសលាលែងពីតំណែង ដោយបន្ថែមថា «វាមិនមែនជាការសម្រេចចិត្តដ៏ងាយស្រួលនោះទេសម្រាប់ខ្ញុំក្នុងការទទួលយកតួនាទីនេះ ប៉ុន្តែនៅពេលដែលខ្ញុំបានទទួលយកហើយ ខ្ញុំមិនបានគិតពីអ្វីផ្សេងក្រៅពីការទទួលខុសត្រូវរហូតដល់នាទីចុងក្រោយនោះទេ»។
នៅក្នុងនាមជាអតីតខ្សែការពារធ្លាប់លេងឱ្យក្រុមជម្រើសជាតិកូរ៉េខាងត្បូងចំនួន ១៣៦ ប្រកួត លោក Hong បានកាន់តំណែងដ៏សំខាន់នេះ តាំងពីឆ្នាំ ២០២៤ ហើយលោកបាននិយាយថា លោកសុំទទួលយកការទទួលខុសត្រូវទាំងស្រុង ចំពោះយុទ្ធនាការ World Cup ដែលមិនទទួលបានជោគជ័យនេះផងដែរ។
ការធ្លាក់ចេញពីព្រឹត្តិការណ៍ World Cup របស់កូរ៉េខាងត្បូង ត្រូវបានបញ្ជាក់ជាផ្លូវការកាលពីថ្ងៃទី២៧ ខែមិថុនា ខណៈដែលពួកគេមិនអាចឡើងទៅកាន់វគ្គបន្ត ក្នុងនាមជាក្រុមលេខ ៣ ល្អបំផុតមួយក្នុងចំណោម ៨ ក្រុមនោះទេ។ ក្រុមលោក Hong រកបានតែប៣ពិន្ទុពីការប្រកួតទាំង ៣ នៅក្នុង A ដោយបានឈ្នះលើក្រុមសាធារណរដ្ឋឆែក ប៉ុន្តែបានចាញ់ក្រុមម្ចាស់ផ្ទះម៉ិកស៊ិក និងការប្រកួតចុងក្រោយជាមួយអាហ្វ្រិកខាងត្បូង៕
ចែករំលែកព័តមាននេះ