អន្តរជាតិ ៖ ការប្រកួតវគ្គចែកពូលនៃព្រឹត្តិការណ៍ FIFA World Cup ឆ្នាំ២០២៦ បានចប់សព្វគ្រប់ ត្រឹមព្រឹកថ្ងៃទី២៨ ខែមិថុនា ឆ្នាំ២០២៦ (ម៉ោងនៅកម្ពុជា) ដោយសម្រេចបានក្រុមបន្តទៅប្រជែងគ្នា នៅវគ្គ៣២ក្រុមចុងក្រោយ ស្របពេលជប៉ុន និងអូស្ត្រាលី គឺជាក្រុមដែលអាចបន្តតំណាងអាស៊ីនៅក្នុងព្រឹត្តិការណ៍នេះ។ ចំណែកកូរ៉េខាងត្បូង កាតា អ៊ីរ៉ង់ អារ៉ាប៊ីសាអូឌីត អ៊ីរ៉ាក់ ហ្ស៊កដានី និងអ៊ូសបេគីស្ថាន សុទ្ធតែបានហាលអាវ។
ក្រុមសាមូរ៉ៃខៀវជប៉ុនបានបញ្ចប់នៅលេខ ២ ពូល F មាន៥ពិន្ទុ ដោយស្មើ ២-២ យ៉ាងភ្ញាក់ផ្អើលជាមួយហូឡង់ មុនលត់ទុយនីស៊ី ៤-០ និងស្មើស៊ុយអែត ១-១។ នៅក្នុងពូលនេះ ហូឡង់ និងជប៉ុនដឹកដៃគ្នាឡើងវគ្គ៣២ក្រុមដោយស្វ័យប្រវត្តិ រីឯស៊ុយអែតឡើងក្នុងនាមក្រុមលេខ ៣ ល្អ ជាមួយ៤ពិន្ទុក្នុងដៃ។
វគ្គ៣២ក្រុមចុងក្រោយ ជប៉ុនត្រូវប៉ះប្រេស៊ីលម្ចាស់ជើងឯកច្រើនជាងគេ ៥ សម័យកាល នៅម៉ោង ១២ រំលងអធ្រាត្រចូលថ្ងៃទី៣០ ខែមិថុនា ឆ្នាំ (ម៉ោងនៅកម្ពុជា) ដែលធ្វើឡើងនៅសហរដ្ឋអាមេរិក។ ជួបគ្នាចុងក្រោយបង្អស់ កាលពីខែតុលា ឆ្នាំ២០២៥ នៅក្នុងជំនួបមិត្តភាព ក្រុមសាំបាប្រេស៊ីលបានឈឺចាប់ ដោយនាំមុខមុនដល់ទៅ២គ្រាប់ហើយ ប៉ុន្តែជាលទ្ធផលចុងក្រោយ ជប៉ុនវាយបកយកឈ្នះវិញ ៣គ្រាប់យ៉ាងភ្ញាក់ផ្អើល និងជាការឈ្នះលើកដំបូងបង្អស់ក្នុងប្រវត្តិសាស្ត្ររបស់ពួកគេផងដែរ។
ក្រឡេកទៅ ក្រុមកង់ហ្គារូអូស្ត្រាលីវិញ បានបញ្ចប់នៅលេខ ២ ពូល D ដោយបើកឆាកយកឈ្នះលើតួកគីយ៉េដោយលទ្ធផល ២-០ ប៉ុន្តែត្រូវចាញ់ម្ចាស់ផ្ទះសហរដ្ឋអាមេរិក ២-០ មុនស្មើ ០-០ ជាមួយប៉ារ៉ាហ្គាយ។ សហរដ្ឋអាមេរិក និងអូស្ត្រាលីឡើងវគ្គ៣២ក្រុមដោយស្វ័យប្រវត្តិ ចំណែកប៉ារ៉ាហ្គាយឡើងក្នុងនាមក្រុមលេខ៣ល្អ។ អូស្ត្រាលី ត្រូវប៉ះ អេហ្ស៊ីប នៅវគ្គ៣២ក្រុម នៅម៉ោង១រំលងអធ្រាត្រចូលថ្ងៃទី៤ ខែកក្កដា (ម៉ោងនៅកម្ពុជា) ដែលធ្វើឡើងនៅសហរដ្ឋអាមេរិក។
កាលវិភាគប្រកួតវគ្គ ៣២ ក្រុមចុងក្រោយ ត្រូវនឹងម៉ោងនៅប្រទេសកម្ពុជា ៖
-អាហ្វ្រិកខាងត្បូង ប៉ះ ម្ចាស់ផ្ទះកាណាដា ម៉ោង២រំលងអធ្រាត្រចូលថ្ងៃទី២៩ ខែមិថុនា
-ប្រេស៊ីល ប៉ះ ជប៉ុន ម៉ោង១២រំលងអធ្រាត្រចូលថ្ងៃទី៣០ ខែមិថុនា
-អាល្លឺម៉ង់ ប៉ះ ប៉ារ៉ាហ្គាយ ម៉ោង៣កន្លះទៀបភ្លឺថ្ងៃទី៣០ ខែមិថុនា
-ហូឡង់ ប៉ះ ម៉ារ៉ុក ម៉ោង៨ព្រឹកថ្ងៃទី៣០ ខែមិថុនា
-កូតឌីវ័រ ប៉ះ ន័រវែស ម៉ោង១២រំលងអធ្រាត្រចូលថ្ងៃទី១ ខែកក្កដា
-បារាំង ប៉ះ ស៊ុយអែត ម៉ោង៤ទៀបភ្លឺចូលថ្ងៃទី១ ខែកក្កដា
-ម្ចាស់ផ្ទះម៉ិកស៊ិក ប៉ះ អេក្វាឌ័រ ម៉ោង៨ព្រឹកថ្ងៃទី១ ខែកក្កដា
-អង់គ្លេស ប៉ះ សាធារណរដ្ឋកុងហ្គោ ម៉ោង១១ព្រឹកថ្ងៃទី១ ខែកក្កដា
-បែលហ្ស៊ិក ប៉ះ សេណេហ្គាល់ ម៉ោង៣ទៀបភ្លឺថ្ងៃទី២ ខែកក្កដា
-ម្ចាស់ផ្ទះសហរដ្ឋអាមេរិក ប៉ះ បូស្នី ម៉ោង៧ព្រឹកថ្ងៃទី២ ខែកក្កដា
-អេស្ប៉ាញ ប៉ះ អូទ្រីស ម៉ោង២រំលងអធ្រាត្រចូលថ្ងៃទី៣ ខែកក្កដា
-ព័រទុយហ្គាល់ ប៉ះ ក្រូអាស៊ី ម៉ោង៦ព្រឹកថ្ងៃទី៣ ខែកក្កដា
-ស្វីស ប៉ះ អាល់ហ្សេរី ម៉ោង១០ព្រឹកថ្ងៃទី៣ ខែកក្កដា
-អូស្ត្រាលី ប៉ះ អេហ្ស៊ីប ម៉ោង១រំលងអធ្រាត្រចូលថ្ងៃទី៤ ខែកក្កដា
-អាហ្សង់ទីន ប៉ះ កាប់វែរ ម៉ោង៥ព្រឹកថ្ងៃទី៤ ខែកក្កដា
-កូឡុំប៊ី ប៉ះ ហ្គាណា ម៉ោង៨កន្លះព្រឹកថ្ងៃទី៤ ខែកក្កដា៕
ចែករំលែកព័តមាននេះ