រាជធានីភ្នំពេញ ៖ ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិលើកទី១៤ ឆ្នាំ២០២៦ រំពឹងមានអ្នកចុះឈ្មោះចូលរួមរត់លើស៥ពាន់នាក់ ។ ជាមួយគ្នានេះក៏មានកម្មវិធីពិសេសៗជាច្រើនដើម្បីអបអរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី នរោត្ដម មុនិនាថ…
រាជធានីភ្នំពេញ ៖ ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិលើកទី១៤ ឆ្នាំ២០២៦ រំពឹងមានអ្នកចុះឈ្មោះចូលរួមរត់លើស៥ពាន់នាក់ ។ ជាមួយគ្នានេះក៏មានកម្មវិធីពិសេសៗជាច្រើនដើម្បីអបអរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ គម្រប់ព្រះជន្ម ៩០ យាងចូល ៩១ ព្រះវស្សា។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា ដោយសារឆ្នាំនេះជាឆ្នាំដ៏ធំ គណៈកម្មការរៀបចំបានត្រៀមកម្មវិធីពិសេសដោយមានចម្រៀងថ្វាយព្រះពរ និងសកម្មភាព ពិសេសៗជាច្រើនទៀត។
សូមបញ្ជាក់ថា ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិ ២០២៦ នឹងប្រព្រឹត្តទៅនៅថ្ងៃអាទិត្យ ទី១៤ ខែមិថុនា ។ ចំណែកទីតាំងចេញដំណើរនិងបញ្ចប់ទី នៅមុខវត្តបទុមវតី។
ឯកឧត្ដម វ៉ាត់ ចំរើន បញ្ជាក់បន្ថែមថា ទិវាកម្រិតអន្តរជាតិនេះធ្វើឡើងដើម្បីអបអរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ និងបន្តសកម្មភាពសប្បុរសធម៌ដោយស្វែងរកមូលនិធិជួយមន្ទីរពេទ្យគន្ធបុប្ផា។ ក្នុងនោះដែរ គណៈកម្មការត្រៀមប្រគល់ជូនថវិកាចំនួន៥០០០ដុល្លារអាមេរិក។ គោលបំណងពិសេសមួយទៀត គឺផ្សព្វផ្សាយពីកេរ្ដិ៍ឈ្មោះនិងទេសចរណ៍ក្នុងរាជធានីភ្នំពេញ ក៏ដូចជំរុញសកម្មភាពកីឡាដើម្បីសុខភាព។
លោក សែម ផល្លា នាយបច្ចេកទេសម៉ារ៉ាតុងនៅកម្ពុជា មានប្រសាសន៍ថា ព្រឹត្តិការណ៍ឆ្នាំនេះនឹងមានការចូលរួមវាស់វែងផ្លូវពីគណៈកម្មការម៉ារ៉ាតុងពិភពលោក និងទទួលស្គាល់ពីសហព័ន្ធកីឡាអត្តពលកម្មអន្តរជាតិ។
សម្រាប់ចម្ងាយផ្លូវមានដូចជា ២១គីឡូម៉ែត្រ ១០គីឡូម៉ែត្រ ៥គីឡូម៉ែត្រ និង២,៥គីឡូម៉ែត្រ។ គិតមកទល់ពេលនេះ មានអ្នកចុះឈ្មោះចូលរួមប្រមាណជាង៣០០០នាក់ហើយ ហើយគណៈកម្មការៀបចំរំពឹងថា នឹងមានអ្នករត់ដល់ទៅខ្ទង់៥ទៅ៦ពាន់នាក់៕
ចែករំលែកព័តមាននេះ