កិច្ចប្រជុំស្តីពីកម្មវិធីរត់ភ្លើងគប់កីឡា និងត្រៀមរៀបចំការប្រកួតកីឡាទូកនាគ ទូកកានូ និងរ៉ូអ៊ីង ក្នុងព្រឹត្តិការណ៍កីឡាជាតិ លើកទី៥ និងកីឡាជាតិជនពិការ លើកទី៣ ឆ្នាំ២០២៦
- សៀមរាប
ខេត្តស្វាយរៀង ៖ នៅរសៀលថ្ងៃទី១៧ ខែសីហា ឆ្នាំ២០២៦ នៅសាលប្រជុំសាលាខេត្តស្វាយរៀង លោក ញ៉ែម សារី អភិបាលរងខេត្តតំណាងឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង បានអញ្ជើញចូលរួមក្នុងកិច្ចប្រជុំពិភាក្សាជាមួយក្រុមការងារ ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា ស្តីពីកម្មវិធីរត់ភ្លើងគប់កីឡា និងត្រៀមរៀបចំការប្រកួតកីឡាទូកនាគ ទូកកានូ និងរ៉ូអុីង ក្នុងព្រឹត្តិការណ៍កីឡាជាតិ លើកទី៥ និងកីឡាជាតិជនពិការ លើកទី៣ ឆ្នាំ២០២៦នៅទន្លេវ៉ៃគោ ក្រុងស្វាយរៀង នាពេលខាងមុខនេះ។
កិច្ចប្រជុំនេះក៏មានការអញ្ជើញចូលរួមពីលោកនាយករងរដ្ឋបាលសាលាខេត្ត លោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកប្រធានមន្ទីរ-អង្គភាពពាក់ព័ន្ធក្នុងខេត្ត លោកអភិបាលរងក្រុងស្វាយរៀង លោកនាយកទីចាត់ការហិរញ្ញវត្ថុសាលាខេត្ត លោកនាយករងទីចាត់ការគ្រប់គ្រងធានធានមនុស្សសាលាខេត្ត លោកនាយកទីចាត់ការរដ្ឋបាលសាលាខេត្ត លោកនាយករងទីចាត់ការអន្តរវិស័យសាលាខេត្ត ព្រមទាំងមន្ត្រីពាក់ព័ន្ធមួយចំនួនទៀត។
ការប្រកួតប្រភេទកីឡាលើទឹករួមមាន កីឡាទូកនាគ, ទូកកានូ និងរ៉ូអុីង នឹងត្រូវរៀបចំឡើងនៅទន្លេវ៉ៃគោ ក្រុងស្វាយរៀង ។ ខេត្តស្វាយរៀង គឺជាទីតាំងរៀបចំប្រកួតកីឡាជាតិមួយក្នុងចំណោមទីតាំងគោលដៅរៀបចំទាំង៥ រួមមាន រាជធានីភ្នំពេញ, ខេត្តកែប, ខេត្តកំពង់ឆ្នាំង និងខេត្តព្រះសីហនុ ។ ចំពោះគោលបំណង និងការត្រៀមលក្ខណៈក្នុងកម្មវិធីរត់ភ្លើងគប់គឺការរៀបចំផែនការសម្របសម្រួល និងការពារសន្តិសុខសណ្តាប់ធ្នាប់សម្រាប់ពិធីរត់ភ្លើងគប់កីឡាឆ្លងកាត់ភូមិសាស្ត្រខេត្ត ដើម្បីបង្កើតភាពអធិកអធម និងទាក់ទាញមហាជន ។ ធានាឱ្យបាននូវការរៀបចំទីលានប្រកួតលើផ្ទៃទឹកទន្លេវ៉ៃគោ ប្រកបដោយសុវត្ថិភាព និងស្របតាមស្តង់ដារបច្ចេកទេសកីឡា។
គួរឱ្យដឹងផងដែរថា ព្រឹត្តិការណ៍កីឡាជាតិ លើកទី៥ និងកីឡាជាតិជនពិការ លើកទី៣ គ្រោងប្រព្រឹត្តទៅនាសប្ដាហ៍ទី២ ក្នុងខែវិច្ឆិកា ឆ្នាំ២០២៦ ខណៈក្រសួងអប់រំ យុវជន និងកីឡា បានត្រៀមរៀបចំឲ្យកាន់តែប្លែក និងអស្ចារ្យ ដើម្បីបង្ហាញពីសក្ដានុពលកីឡាជំនាញកម្រិតខ្ពស់បំផុតនៅក្នុងប្រទេស តាមរយៈព្រឹត្តិការណ៍កីឡា ២ឆ្នាំម្ដងនេះ។ នេះបើតាមការលើកឡើងរបស់ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា ក្នុងកិច្ចប្រជុំស្តីពីការត្រៀមរៀបចំការប្រកួតកីឡាជាតិ ឆ្នាំ២០២៦ ដោយមានការចូលរួមពីមន្ដ្រីជាន់ខ្ពស់ក្រសួង ថ្នាក់ដឹកនាំអគ្គនាយកដ្ឋានកីឡា និងនាយកដ្ឋានពាក់ព័ន្ធជាច្រើន នៅមជ្ឈមណ្ឌលជាតិហ្វឹកហ្វឺនកីឡា។
ឯកឧត្តម វ៉ាត់ ចំរើន បានថ្លែងថា ឆ្នាំ២០២៦ នឹងមានការប្រកួតពហុកីឡាជាច្រើន រាប់ចាប់ពីការប្រកួតកម្រិតបឋមសិក្សា រហូតដល់កីឡាឧត្តមសិក្សា ជាពិសេសការប្រកួតកីឡាជាតិ លើកទី៥ និងកីឡាជាតិជនពិការលើកទី៣ ដែលដល់ពេលវេលារៀបចំជាថ្មីនៅក្នុងឆ្នាំនេះ។
ស្របតាមកំណែទម្រង់ស៊ីជម្រៅរបស់ក្រសួង នឹងជំរុញការប្រកួតពហុកីឡាធំៗទាំងអស់ ឲ្យកាន់តែមានភាពទាក់ទាញ និងមានប្រសិទ្ធភាពក្នុងការរៀបចំ ដើម្បីបន្ដនិរន្ដរភាពនៃការអភិវឌ្ឍកីឡាជាតិបន្ថែមទៀត។
ឯកឧត្តម វ៉ាត់ ចំរើន បន្ដថា ឆ្នាំ២០២៦ នេះ យើងគ្រោងរៀបចំព្រឹត្តិការណ៍កីឡាជាតិលើកទី៥ និងកីឡាជាតិជនពិការលើកទី៣ ឲ្យវាមានភាពប្លែក និងអស្ចារ្យមួយ ដែលអាចទាក់ទាញបាននូវការចូលរួម និងគាំទ្រច្រើនពីរាជធានី-ខេត្ត និងមហាជន ។ យើងទាំងអស់គ្នានឹងធ្វើកិច្ចការងារនេះឲ្យបានល្អ ហើយផ្សព្វផ្សាយជូនដល់សាធារណជនឲ្យត្រៀមចូលរួមទស្សនា និងគាំទ្រទាំងពិធីបើក-បិទ និងការប្រកួត ដែលជាការប្រកួតកីឡាជំនាញកម្រិតខ្ពស់បំផុតនៅក្នុងប្រទេសរបស់យើង សម្រាប់ជាកម្លាំងចិត្តដល់កីឡាករ-កីឡាការិនី ក្នុងការត្រៀមឆ្ពោះទៅរកការប្រកួតអន្ដរជាតិនានា។
ជាមួយគ្នា មន្ដ្រីជាន់ខ្ពស់ក្រសួងអប់រំដដែលក៏បានកោតសរសើរចំពោះថ្នាក់ដឹកនាំអគ្គនាយកដ្ឋានកីឡា និងនាយកដ្ឋានជំនាញទាំងអស់ ដែលបានរៀបចំនូវផែនការលម្អិត ធានាបាននូវការត្រៀមលក្ខណៈរួចរាល់សម្រាប់ការត្រៀមរៀបចំព្រឹត្តិការណ៍កីឡាជាតិនានា ក្នុងឆ្នាំ២០២៦ ឲ្យប្រព្រឹត្តទៅដោយរលូន និងទទួលបានជោគជ័យ ៕
ចែករំលែកព័តមាននេះ