សហរដ្ឋអាមេរិក ៖ អតីតកីឡាករវាយតេន្នីសដ៏ល្បី លោក Roger Federer ទើបតែធ្លាក់ចេញពីបញ្ជីមហាសេដ្ឋីរបស់ទស្សនាវដ្តីសហរដ្ឋអាមេរិក Forbes បន្ទាប់ពីលោកទទួលបានតំណែងជាមហាសេដ្ឋីប្រាក់ពាន់លាន កាលពីឆ្នាំមុន នៅពេលទ្រព្យសម្បត្តិបានកើនដល់ ១ ពាន់លានដុល្លារអាមេរិក កាលពីឆ្នាំមុន។
ហេតុផលមកពីការវិនិយោគដ៏ធំរបស់បុរសជនជាតិស្វីសវ័យ៤៥ឆ្នាំ នៅក្នុងក្រុមហ៊ុន On Holding ម៉ាកសម្លៀកបំពាក់កីឡារបស់ស្វីស ដែលលោកកាន់កាប់ភាគហ៊ុនប្រហែល ២,៥% នោះ តម្លៃភាគហ៊ុនបានធ្លាក់ចុះប្រហែល ១៩% កាលពីថ្ងៃទី១១ ខែសីហា ឆ្នាំ២០២៦ ដែលជះឥទ្ធិពលភ្លាមៗ ដល់ទ្រព្យសម្បត្តិរបស់អតីតកីឡាករលំដាប់លេខ ១ ពិភពលោករូបនេះ។ បើតាមការប៉ាន់ស្មាន ការធ្លាក់ចុះតម្លៃភាគហ៊ុននៃក្រុមហ៊ុន On Holding បានធ្វើឱ្យលោកខាតបង់ប្រាក់យ៉ាងហោចណាស់ ៥២ លានដុល្លារ។
បច្ចុប្បន្ន ទស្សនាវដ្តី Forbes ប៉ាន់ប្រមាណថា ទ្រព្យសម្បត្តិរបស់ Federer មានចំនួន ៩៥២,៤ លានដុល្លារអាមេរិក។ ហេតុនេះហើយទើបបានជាលែងមានទ្រព្យសម្បត្តិគ្រប់កម្រិត ១ ពាន់លានដុល្លារ ដើម្បីបន្តមានឈ្មោះនៅក្នុងបញ្ជីមហាសេដ្ឋីរបស់ទស្សនាវដ្តីមួយនេះទៀតហើយ។
ការធ្លាក់ចុះយ៉ាងគំហុករបស់ក្រុមហ៊ុន On Holding គឺបណ្តាលមកពីរបាយការណ៍ប្រាក់ចំណូលប្រចាំត្រីមាសទី២របស់ខ្លួន។ ចំណូលសុទ្ធរបស់ក្រុមហ៊ុនសម្រេចបានប្រហែល ១,០៥ ពាន់លានដុល្លារ ពោលកើនឡើង ១៣% បើធៀបនឹងឆ្នាំមុន ប៉ុន្តែវាទាបជាងការរំពឹងទុករបស់ក្រុមអ្នកវិភាគដែលថាសម្រេចបាន ១.០៨ ពាន់លានដុល្លារ៕
ចែករំលែកព័តមាននេះ