ដឹងតែផ្អើលស្តាតអូឡាំពិកទៀតហើយ! ក្រុមជម្រើសជាតិ ៤ប្រទេសនឹងចូលរួមប្រកួតដណ្ដើមពានសម្ដេចធិបតីលើកទី២
- ភ្នំពេញ
រាជធានីភ្នំពេញ ៖ ទោះបីនៅមិនទាន់ច្បាស់ការណ៍១០០ភាគរយក្ដី តែបើតាមសេចក្ដីប្រកាសរបស់សហព័ន្ធកីឡាបាល់ទះកម្ពុជាបានបង្ហើបឱ្យដឹងថានឹងមានការប្រកួតដណ្ដើមពានរង្វាន់សម្ដេចមហាបវរធិបតីលើកទី២ដែលគ្រោងនឹងធ្វើឡើងនៅថ្ងៃទី១៩ខែសីហាឆ្នាំ២០២៦នៅក្នុងវិមានពហុកីឡដ្ឋានជាតិ។
យោងតាមការបង្ហោះរបស់សហព័ន្ធកីឡាបាល់ទះកម្ពុជាដែលបានចេញផ្សាយកាលពីពេលថ្មីៗមកនេះបានឱ្យដឹងថា សហព័ន្ធកីឡាបាល់ទះកម្ពុជានឹងរៀបចំឱ្យមានព្រឹត្តិការណ៍ប្រកួតដណ្ដើមពានរង្វាន់អន្តរជាតិសម្ដេចមហាបវរធិបតីលើកទី២ឆ្នាំ២០២៦ដែលមានក្រុមជម្រើសជាតិខ្លាំងចំនួន៤ប្រទេសដែលនឹងធ្វើឡើងចាប់ពីថ្ងៃទី១៩ដល់ថ្ងៃទី២៣ខែសីហា ដោយក្រុមជម្រើសជាតិម្ចាស់ផ្ទះកម្ពុជាត្រូវ ប៉ះជាមួយក្រុមភ្ញៀវមកពី៣ប្រទេសផ្សេងគ្នារួមមាន៖ក្រុមម៉ាឡេស៊ី ក្រុមវៀតណាមនិងក្រុមឥណ្ឌូនេស៊ី។
ព្រឹត្តិការណ៍មួយនេះអាចនឹងក្លាយជាការប្រកួតដ៏តឹងតែងនិងមានការចាប់អារម្មណ៍បំផុតសម្រាប់អ្នកនិយមតាមដានការប្រកួតកីឡាបាល់ទះទាំងក្នុងនិងក្រៅប្រទេស។ជាពិសេសអ្នកគាំទ្រវិស័យកីឡាបាល់ទះកម្ពុជាតែម្ដង។ដោយសារតែគេកត់សម្គាល់ឃើញថា វិស័យកីឡាបាល់ទះនៅកម្ពុជាបច្ចុប្បន្នមានការរីចម្រើនខ្លាំងលើសការរំពឹងទុក ធ្វើឱ្យមានការភ្ញាក់ផ្អើលទូទាំងបណ្ដាប្រទេស ក្នុតំបន់។ជាពិសេសការដណ្ដើមបានពានរង្វាន់រង្វាន់លេខ១ថ្នាក់តំបន់អាស៊ាន(SAE V.Cup2026)ឆ្នាំ២០២៦កាលពីថ្មីៗមកនេះ។ហើយអ្វីដែលអ្នកនិយមគាំទ្រកីឡាបាល់ទះកាន់តែទន្ទឹងរង់ចាំទៀតនោះគឺចង់ឃើញក្រុមកីឡាបាល់ទះកម្ពុជាប៉ះជាមួយក្រុមខ្លាំងវៀតណាមដែលទើបតែឈ្នះពានSAE V.Cup)ឆ្នាំ២០២៦ដូចគ្នា ប៉ុន្តែក្រុមទាំងពីរនៅមិនទាន់ជួបប្រកួតជាមួយគ្នាម្ដងណាសោះ។
គេនៅចាំបានថាកាលពីការប្រកួតកីឡាបាល់ទះដណ្ដើមពានកម្រិតតំបន់ទី១របស់អាស៊ានក្នុងឆ្នាំ២០២៥ ក្រុមកីឡាបាល់ទះកម្ពុជាក្នុងការប្រកួតទាំង៨លើកគឺអត់ស្គាល់ពាក្យថាឈ្នះនោះទេបានន័យថាប្រកួតចាញ់ទាំង៨ប្រកួតតែម្ដង។ក្នុនោះក៏មានក្រុមប្រទេសវៀតណាមផងដែរ។ប៉ុន្តែទាំងក្រុមប្រទេសកម្ពុជានិងវៀតណាមដែលមានឱកាសលើកពានSAE V.Cup ឆ្នាំ២០២៦នេះអត់ទាន់បានជួបគ្នាទាល់តែសោះ។
ដូច្នេះបើការប្រកួតដណ្ដើមពានរង្វាន់អន្តរជាតិសម្ដេចមហាបវរធិបតីលើកទី២នេះពិតកើតឡើងដូចការរំពឹងទុកមែននោះ ក្រុមទាំងពីរប្រាកដជាត្រូវប៉ះគ្នា១០០ភាគរយ។មិនតែប៉ុណ្ណោះអ្នកណាក៏គេដឹងដែរថាក្រុមឥណ្ឌូនេស៊ីជាស្ដេចបាល់ទះប្រចាំតំបន់អាស៊ានធ្លាប់លើកពានSAE V.Leaqueចំនួន៤ដងម្នាក់ឯង។ប៉ុន្តែបានមកចាញ់ក្រុមកម្ពុជានៅជុំទី១និងចាញ់វៀតណាមនៅជុំទី២។ដូច្នេះការប្រកួតលើកនេះ ដឹងតែល្អមើលមិនខាន ហើយគេហ៊ានសន្យាថាក្នុងទីលានប្រកួតរកកន្លែងអង្គុយលែងបានហើយសម្រាប់អ្នកដែលទៅក្រោយគេ៕
ចែករំលែកព័តមាននេះ