ទីក្រុង​តេ​ហេ​រ៉​ង់ ៖ សហព័ន្ធ​បាល់ទាត់​អ៊ី​រ៉​ង់ (FFIRI) បាន​ធ្វើការ​ស្នើ​សុំ​ដោយ​ជោគជ័យ​ពី​សហព័ន្ធ​បាល់ទាត់​ពិភពលោក (FIFA) ដើម្បី​ផ្លាស់​ប្តូរ​ទីតាំង​បោះជំរុំ​ហ្វឹកហាត់​សម្រាប់​ព្រឹត្តិការណ៍ FIFA World Cup ឆ្នាំ ២០២៦ របស់​ខ្លួន​ពី​ទឹកដី​សហរដ្ឋអាមេរិក​ទៅ​កាន់​ទឹកដី​ប្រទេស​ម៉ិ​ក​ស៊ិ​ក​ជំនួស​វិញ​។ ការ​សម្រេចចិត្ត​នេះ​កើតឡើង​នៅ​ពេល​ភាព​តានតឹង​ក្នុង​តំបន់ និង​សន្តិសុខ​បាន​ជំរុញ​ឱ្យ​អ៊ី​រ៉​ង់​ស្វែងរក​ជម្រើស​មួយ​ជំនួស​ផែនការ​ដើម​ដែល​ទីតាំង​ជំរុំ​ហ្វឹកហាត់​ពួក​គេ​ស្ថិត​នៅ​រដ្ឋ​អា​រី​ហ្សូ​ណា (Arizona)​។ នេះ​បើ​យោង​តាម​ប្រភព​ពី​សារព័ត៌មាន BBC និង goal.com ចេញផ្សាយ​កាលពី​ថ្ងៃ​ទី​២៤ ខែឧសភា ឆ្នាំ​២០២៦​។

FFIRI បាន​បញ្ជាក់​ថា FIFA បាន​អនុម័ត​ជា​ផ្លូវការ​ចំពោះ​ការ​ផ្លាស់​ប្តូរ​ទីតាំង​មូលដ្ឋាន​សម្រាប់ World Cup របស់​ក្រុម​ជម្រើសជាតិ ដែល​ដើម​ឡើយ​ស្ថិត​នៅ​ក្នុង​ទីក្រុង​ទុក​សុ​ន (Tucson) រដ្ឋ​អា​រី​ហ្សូ​ណា​។ ទោះ​យ៉ាងណា​ក៏​ដោយ ទី​ទាំង​ថ្មី​នឹង​ស្ថិត​នៅ​តាម​បណ្តោយ​ព្រំដែន​នៅ​ទីក្រុង​ទី​ជួ​ណា (Tijuana) ប្រទេស​ម៉ិ​ក​ស៊ិ​ក​ជំនួស​វិញ​។

យោង​តាម​សារព័ត៌មាន AP បាន​រាយការណ៍​ថា លោក Mehdi Taj ប្រធាន FFIRI បាន​ប្រកាស​ពី​កា​រវិ​វ​ឌ្ឍ​នេះ បន្ទាប់​ពី​ការ​ចរចា​ទូលំទូលាយ​ជាមួយ FIFA​។ ការ​ផ្លាស់​ប្តូរ​នេះ ត្រូវ​បាន​គេ​មើលឃើញ​ថា​ជា​ការ​ឆ្លើយ​តប​ជា​យុទ្ធសាស្ត្រ ចំពោះ​បរិយាកាស​ភូមិសាស្ត្រ​នយោបាយ​ដ៏​ស្មុគស្មាញ និង​កង្វល់​សន្តិសុខ​ដែល​កំពុង​បន្ត​ជុំវិញ​ក្រុម​ជម្រើសជាតិ​អ៊ី​រ៉​ង់​អំឡុង​ពេល​ស្នាក់​នៅ​តំបន់​អា​មេ​រិ​ក​ខាងជើង សម្រាប់​ការ​ប្រកួត World Cup ឆ្នាំ​២០២៦ ដែល​សហរដ្ឋអាមេរិក កា​ណា​ដា និង​ម៉ិ​ក​ស៊ិ​ក​ធ្វើ​ជា​ម្ចាស់ផ្ទះ​រួម​គ្នា ដែល​នឹង​ចាប់ផ្តើម​នៅ​ថ្ងៃ​ទី​១១ ខែមិថុនា ដល់​ថ្ងៃ​ទី​១៩ ខែកក្កដា ឆ្នាំ​២០២៦ ដោយ​មាន​រហូត​ដល់ ៤៨ ក្រុម​ចូលរួម​។ ដ្បិត​ជម្លោះ​នៅ​មជ្ឈិមបូព៌ា​រវាង​សហរដ្ឋអាមេរិក​-​អ៊ី​ស្រា​អែ​ល និង​អ៊ី​រ៉​ង់ ចាប់តាំងពី​ចុងខែ​កុម្ភៈ ឆ្នាំ​២០២៦ នៅ​មិន​ទាន់​រក​ឃើញ​ទីបំផុត​នៅឡើយ​។

បើ​ទោះបីជា​មានការ​សម្រេច​ផ្លាស់​ប្តូរ​ទីតាំង​ជុះ​រុំ​ហ្វឹកហាត់​ក៏​ពិតមែន ប៉ុន្តែ​តាម​កាលវិភាគ​ពូ​ល G ក្រុម​ជម្រើសជាតិ​អ៊ី​រ៉​ង់ នឹង​ត្រូវ​ប្រកួត​ជាមួយ​នូ​វែ​ល​សេ​ឡង់ និង​បែ​ល​ហ្ស៊ិ​ក នៅ​ទីក្រុង​ឡូ​សអាន់​ជឺ​ឡេ​ស (Los Angeles) មុន​ពេល​បន្ត​ទៅ​ជួប​អេ​ហ្ស៊ី​ប នៅ​ទីក្រុង​ស៊ី​ថ​ល (Seattle) នៃ​ទឹកដី​សហរដ្ឋអាមេរិក ដោយ​គ្មាន​ការ​ផ្លាស់​ប្តូរ​ឡើយ​៕