ចក្រភព​អង់គ្លេស ៖ កំណត់​ត្រា​ពិភពលោក ឬ Guiness World Records បាន​ប្រកាស​ថា ព្រឹត្តិការណ៍​រត់​ម៉ា​រ៉ា​តុង​អន្តរជាតិ​ទីក្រុង​ឡុ​ង​ដ៍ ចក្រភព​អង់គ្លេស​ឆ្នាំ ២០២៦ (London Marathon) ដែល​បញ្ចប់​ទៅ​កាលពី​ថ្ងៃ​ទី​២៦ ខែមេសា កន្លង​ទៅ បាន​បំបែក​កំណត់​ត្រា​អ្នក​សម្រេច​ទី​ច្រើន​ជាងគេ​បំផុត​ក្នុង​ប្រវត្តិសាស្ត្រ ដោយ​មាន​ចំនួន​សរុប ៥៩ ៨៣០​នាក់ បំបែក​កំណត់​ត្រា​អ្នក​សម្រេច​ទី​សរុប​ចំនួន ៥៩ ២២៦​នាក់ នៅ​ព្រឹត្តិការណ៍​ទីក្រុង​ទីក្រុង​ញូ​វ​យ៉​ក សហរដ្ឋអាមេរិក​ឆ្នាំ ២០២៥ (New York City Marathon 2025)​។

ព្រឹត្តិការណ៍​រត់​ម៉ា​រ៉ា​តុង​ទីក្រុង​ឡុ​ង​ដ៍​ឆ្នាំ ២០២៦ គឺជា​ព្រឹត្តិការណ៍​ម៉ា​រ៉ា​តុង​ដ៏​ធំ​បំផុត​មិន​ធ្លាប់​មាន ជាមួយ​អ្នកចូលរួម​រត់​សរុប​ចំនួន ៦០ ៥១២ នាក់​។ ព្រឹត្តិការណ៍​នេះ ក៏​បាន​បង្កើត​កំណត់​មាន​អ្នក​រត់​ជុំវិញ​ពិភពលោក​ច្រើន​បំផុត​ដាក់​ពាក្យ​ស្នើ​សុំ​ចុះ​ឈ្មោះ​ផង​ដែរ ពោល​ចំនួន ១ ១៣៣ ៨១៣ នាក់ ដោយ​បំបែក​កំណត់​ត្រា​ចាស់​របស់​ខ្លួន ចំនួន​ត្រឹម ៨៤០ ៣១៨ នាក់ កាលពី​ឆ្នាំ ២០២៥​។

ព្រឹត្តិការណ៍​នៅ​ឆ្នាំ ២០២៦ ត្រូវ​បាន​ចាត់ទុកជា​ព្រឹត្តិការណ៍​ប្រវត្តិសាស្ត្រ ដោយសារ​តែ​ហេតុផល​កីឡាករ​ចំណាត់ថ្នាក់​កំពូល​ទាំង ៣ សុទ្ធតែ​បំបែក​កំណត់ និង​បង្កើត​កំណត់​ត្រា​រៀង​ៗ​ខ្លួន​។ ជាក់ស្តែង កីឡាករ Sabastian Sawe ម្ចាស់​ជើងឯក និង​កីឡាករ Yomif Kejelcha រងជើង​ឯក ក្លាយជា​កីឡាករ​ដំបូង​បង្អស់​ក្នុង​ប្រវត្តិសាស្ត្រ​បញ្ចប់​ការ​រត់​ម៉ា​រ៉ា​តុង​ដោយ​ប្រើ​ពេល​តិច​ជាង​២​ម៉ោង​។ ចំណែក​កីឡាករ Jacob Kiplimo ចំណាត់ថ្នាក់​លេខ ៣ បាន​ប្រើ​ថិរវេលា​តិច​ជាង​ម្ចាស់​កំណត់​ត្រា​ពិភពលោក​ចាស់​។
កីឡាករ​កេ​ន​យ៉ា Sabastian Saw ក្លាយជា​ម្ចាស់​ជើងឯក ដោយ​បាន​ប្រើ​ថិរវេលា​ត្រឹម ១​ម៉ោង ៥៩​នាទី និង ៣០​វិនាទី នៅ​ក្នុង​ចម្ងាយ ៤២,១៩៥ គីឡូម៉ែត្រ ដើម្បី​ក្លាយជា​កីឡាករ​រត់លឿន​ជាងគេ​បំផុត​ថ្មី​របស់​ពិភពលោក​។ កីឡាករ​អេ​ត្យូ​ពី Yomif Kejelcha បាន​ប្រើ​ថិរវេលា ១​ម៉ោង ៥៩​នាទី និង ៤១​វិនាទី ទទួល​បាន​ចំណាត់ថ្នាក់​លេខ ២​។ ចំណែក​កីឡាករ​អ៊ូ​ហ្គ​ង់​ដា Jacob Kiplimo ប្រើ​ថិរវេលា ២​ម៉ោង និង ២៨​វិនាទី (២:០០:២៨)​។

តាម​រយៈ​នេះ​មាន​ន័យ​ថា កីឡាករ​ទាំង​៣​រូប​ខាងលើ សុទ្ធតែ​បាន​បំបែក​កំណត់​ត្រា​ពិភពលោក​ចាស់​របស់​កីឡាករ​កេ​ន​យ៉ា Kelvin Kiptum ដែល​បង្កើត​បាន​នៅ​ព្រឹត្តិការណ៍​ម៉ា​រ៉ា​តុង​ទីក្រុង​ឈី​កា​ហ្គោ សហរដ្ឋអាមេរិក ឆ្នាំ ២០២៣​។ ជា​អកុសល​កីឡាករ​រូប​នេះ បាន​ស្លាប់​ក្នុង​គ្រោះថ្នាក់​ចរាចរណ៍​រថយន្ត​ក្នុង​ប្រទេស​កំណើត​របស់​ខ្លួន កាលពី​ឆ្នាំ ២០២៤ ក្នុង​វ័យ​ត្រឹម​២៤​ឆ្នាំ​។

ដោយឡែក​ផ្នែក​នារី កីឡាការិនី​អេ​ត្យូ​ពី Tigst Assefa ឈ្នះ​ជើងឯក​ដោយ​ប្រើ​ថិរវេលា ២​ម៉ោង ១៥​នាទី និង ៤១​វិនាទី បំបែក​កំណត់​ត្រា​ចាស់​របស់​ខ្លួន​ក្នុង​ព្រឹត្តិការណ៍​ម៉ា​រ៉ា​តុង​ទីក្រុង​ឡុ​ង​ដ៍​ដូច​គ្នា កាលពី​ឆ្នាំ​មុន ដោយ​ប្រើ​ថិរវេលា ២​ម៉ោង ១៥​នាទី និង ៥០​វិនាទី ក្នុង​នាម​ជា​ម្ចាស់ផ្ទះ​។ ដ្បិត​កំណត់​ត្រា​ល្អ​បំផុត​របស់​នាង​កើតឡើង​ក្នុង​ព្រឹត្តិការណ៍​ម៉ា​រ៉ា​តុង​ទីក្រុង​ប៊ែ​រ​ឡាំង ប្រទេស​អា​ល្លឺ​ម៉​ង់​ឆ្នាំ ២០២៣ ដោយ​ប្រើ​ថិរវេលា ២​ម៉ោង ១១​នាទី និង ៥៣​វិនាទី​។

ចំណាត់ថ្នាក់​លេខ ២ និង​លេខ ៣ ព្រឹត្តិការណ៍​ម៉ា​រ៉ា​តុង​ទីក្រុង​ឡុ​ង​ឆ្នាំ ២០២៦ ផ្នែក​នារី​បាន​លើ​កីឡាការិនី​កេ​ន​យ៉ា Hellen Obiri ប្រើ​ថិរវេលា ២​ម៉ោង ១៥​នាទី និង ៥៣​វិនាទី និង​កីឡាការិនី​មិត្ត​រួម​ជាតិ Joyciline Jepkosgei ប្រើ​ថិរវេលា ២​ម៉ោង ១៥​នាទី និង ៥៥​វិនាទី​។

គិត​មក​ទល់​ពេល​នេះ កីឡាការិនី​កេ​ន​យ៉ា Ruth Chepng’etich នៅ​តែ​កាន់កាប់​តំណែង​ជា​អ្នក​រត់​ម៉ា​រ៉ា​តុង​លឿន​ជាងគេ​បំផុត​លើ​ពិភពលោក ដែល​សម្រេច​បាន​ក្នុង​ព្រឹត្តិការណ៍​រត់​ម៉ា​រ៉ា​តុង​ទីក្រុង​ឈី​កា​ហ្គោ ឆ្នាំ ២០២៤ ដោយ​ប្រើ​ថិរវេលា​ត្រឹម ២​ម៉ោង ០៩​នាទី និង ៥៦​វិនាទី​៕ ប្រភព ៖ London Marathon Events, Runners World, BBC និង​ប្រភព​ផ្សេង​ទៀត