រាជធានីភ្នំពេញ ៖ ការប្រកួតកីឡាបាល់ទះដណ្ដើមពានរង្វាន់តេជោលីគ(Techo Volleyball Cambodia Leaque)រដូវកាលទី៣ ឆ្នាំ២០២៥-២០២៦ នឹងចាប់ផ្ដើមហើយនាថ្ងៃទី១៦ ខែឧសភា ខាងមុខនេះ…
រាជធានីភ្នំពេញ ៖ ការប្រកួតកីឡាបាល់ទះដណ្ដើមពានរង្វាន់តេជោលីគ(Techo Volleyball Cambodia Leaque)រដូវកាលទី៣ ឆ្នាំ២០២៥-២០២៦ នឹងចាប់ផ្ដើមហើយនាថ្ងៃទី១៦ ខែឧសភា ខាងមុខនេះ នៅរាជធានីភ្នំពេញ ជាមួយនឹងប្រាក់រង្វាន់១០០លានរៀលដោយមាន៨ក្រុមចូលរួម ។ នេះបើតាមការឱ្យដឹងនៅក្នុងសន្និសីទសារព័ត៌មានមួយនៅមជ្ឈមណ្ឌលជាតិហ្វឹកហ្វឺនកីឡាកាលពីថ្ងៃទី១០ ខែឧសភា។
លោក អាំង សេរីពិសិដ្ឋ អនុប្រធានសហព័ន្ធកីឡាបាល់ទះកម្ពុជា និងជាប្រធានគណៈកម្មការរៀបចំការប្រកួតតំណាងឱ្យឯកឧត្តមអភិសន្តិបណ្ឌិតស សុខា ប្រធានសហព័ន្ធកីឡាបាល់ទះកម្ពុជា បានឱ្យដឹងថា ព្រឹត្តិការណ៍ប្រកួតកីឡាបាល់ទះតេជោលីគរដូវកាលទី៣ដែលគ្រោងធ្វើឡើងនៅពាក់កណ្ដាលខែឧសភា ខាងមុខនេះ ពោលគឺនៅថ្ងៃទី១៦ ខែឧសភា មានក្រុមខ្លាំងៗចំនួន៨ចូលរួមមានដូចជា៖សមាគមកីឡាបាល់ទះវិសាខា ក្រុមបាល់ទះបញ្ជាការដ្ឋានអង្គរក្ស ក្រុមបាល់ទះស្នងការដ្ឋាននគរបាលរាជធានីភ្នំពេញ ក្រុមបាល់ទះស្នងការដ្ឋាននគរបាលខេត្តព្រៃវែង សមាគមកីឡាបាល់ទះក្រសួង
មហាផ្ទៃ ក្រុមបាល់ទះស្នងការដ្ឋានខេត្តកោះកុង ក្រុមបាល់ទះស្នងការដ្ឋាននគរបាលខេត្តព្រះសីហនុ
និងក្រុមបាល់ទះកងពលធំអន្តរាគមន៍លេខ៣។
ការប្រកួតធ្វើឡើងចំនួន២ជុំគឺជុំទី១ធ្វើឡើងចាប់ពីថ្ងៃទី១៦ ខែឧសភា ដល់ថ្ងៃទី២ ខែមិថុនាឆ្នាំ២០២៦ និងជុំទី២ចាប់ផ្ដើមពីថ្ងៃទី១៩ ខែមិថុនាដល់ថ្ងៃទី៥ ខែកក្កដា ឆ្នាំ២០២៦។
លោកអនុប្រធានសហព័ន្ធរូបនេះបានបន្តឱ្យដឹងទៀតថា សម្រាប់ការប្រកួតឆ្នាំបានប្ដូររូបមន្តប្រកួតប្លែកពីឆ្នាំមុនៗ ដែលតម្រូវឱ្យមានការប្រកួតចំនួន២ជុំ ។ ការប្រកួតនៅក្នុងជុំទី១ត្រូវជម្រុះចោលចំនួន២ក្រុមយកតែក្រុមខ្លាំងចំនួន៦ប៉ុណ្ណោះដើម្បីឡើងទៅកាន់វគ្គបន្ត។
មុននឹងឈានចូលដល់ការប្រកួតក្នុងជុំទី២ ត្រូវសម្រាកមួយរយៈខ្លីដើម្បីផ្ដល់ឱកាសដល់ក្រុមនីមួយៗមានពេលវេលារៀបចំក្រុមរបស់ខ្លួនឡើងវិញ ដូចជាការកែប្រែបច្ចេកទេស ដឹកនាំការប្រកួត និងនាំយកកីឡាករល្អៗទាំងក្នុងនិងក្រៅប្រទេសសម្រាប់ត្រៀមប្រកួតឈានទៅដណ្ដើមជ័យជម្នះ។
លោក អាំង សេរីពិសិដ្ឋ បានឱ្យដឹងទៀតថា ការប្រកួតកីឡាបាល់ទះពានរង្វាន់តេជោលីគ
បានធ្វើឡើងចំនួនពីររដូវកាលមកហើយដោយរដូវកាលទី១ឆ្នាំ២០២៣-២០២៤ និងរដូវកាលទី២ឆ្នាំ២០២៤-២០២៥ ហើយតំណែងជាម្ចាស់ជើងឯកបានទៅលើក្រុមបញ្ជាការដ្ឋានអង្គរក្សទាំងពីររដូវកាលជាប់គ្នា។ ដូច្នេះការប្រកួតឆ្នាំនេះលោករំពឹងថា កាន់តែមានភាពស្វិតស្វាញ រំភើប ទាក់ទាញ ដោយមានកីឡាករកម្ពុជានិងកីឡាករបរទេស ដែលមានគុណភាពខ្ពស់ចូលរួមដើម្បីរួមចំណែកលើកកម្ពស់វិស័យកីឡាបាល់ទះនៅកម្ពុជាឱ្យកាន់តែរីកចម្រើន និងឈានទៅកាន់ឆាកអន្តរជាតិ។
ទន្ទឹមជាមួយគ្នានេះដែរលោកសំណូមពរដល់បងប្អូនអ្នកគាំទ្រវិស័យកីឡាបាល់ទះទាំងអស់សូមចូលរួមឱ្យបានច្រើនកុះក និងចូលរួមធ្វើការទស្សន៍ទាយទាំងអស់គ្នាថាក្រុមបញ្ជាការដ្ឋានអង្គរក្សអាចការពារតំណែងម្ចាស់ជើងឯកឆ្នាំចាស់បានឬអត់? លោកមានការចាប់អារម្មណ៍ថា ការប្រកួតឆ្នាំនេះប្រមូលផ្ដុំទៅដោយក្រុមខ្លាំងៗទាំងអស់ ជាពិសេសអ្វីដែលធ្វើឱ្យមានការភ្ញាក់ផ្អើលបំផុតនោះ គឺក្រុមស្នងការដ្ឋាននគរបាលខេត្តកោះកុងជាម្ចាស់ជើងឯករងពានរង្វាន់សម្ដេចក្រឡាហោម ស ខេងឆ្នាំចាស់កន្លងទៅដែលទើបតែទទួលបានកៅអីឡើងមកប្រកួតពានរង្វាន់តេជោលីករដូវកាលទី៣ជាមួយក្រុមស្នងការដ្ឋាននគរបាលខេត្តព្រះសីហនុ គឺសុទ្ធតែជាក្រុមខ្លាំងមិនអាចមើលស្រាល
បាន៕
ចែករំលែកព័តមាននេះ