ខេត្តសៀមរាបបើកការប្រកួតបាល់ទាត់ពានរង្វាន់មហាជនឆ្នាំ២០២៦
- សៀមរាប
ខេត្តសៀមរាប ៖ នៅកីឡដ្ឋានខេត្តសៀមរាប នារសៀលថ្ងៃទី ២៤ ខែឧសភា ឆ្នាំ ២០២៦ មានរៀបចំបើកការប្រកួតបាល់ទាត់មហាជនខេត្តសៀមរាប ឆ្នាំ២០២៦…
ខេត្តសៀមរាប ៖ នៅកីឡដ្ឋានខេត្តសៀមរាប នារសៀលថ្ងៃទី ២៤ ខែឧសភា ឆ្នាំ ២០២៦ មានរៀបចំបើកការប្រកួតបាល់ទាត់មហាជនខេត្តសៀមរាប ឆ្នាំ២០២៦ ក្រោមប្រធានបទ «ទាំងអស់គ្នាដើម្បីកីឡា កីឡាដើម្បីសុខភាព និងសាមគ្គីភាព» ក្រោមវត្តមានរបស់ឯកឧត្តម តោ គឹមស៊ាន សមាជិកក្រុមប្រឹក្សាខេត្ត តំណាងឯកឧត្តម លី សំរិទ្ធ ប្រធានក្រុមប្រឹក្សាខេត្ត និងលោក សំកុល សុចិត្រា
អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្ត។
នៅក្នុងឱកាសនោះក៏មានការអញ្ជើញចូលរួមពីឯកឧត្តមសមាជិកក្រុមប្រឹក្សាខេត្ត អស់លោក
លោកស្រីជាថ្នាក់ដឹកនាំមន្ទីរ អង្គភាព កងកម្លាំងប្រដាប់អាវុធទាំងបី រដ្ឋបាលក្រុង ស្រុក រួមទាំងប្រតិភូកីឡាករទាំង២៨ក្រុម និងក្រុមកីឡាផ្ការីកគ្រប់រដូវ ព្រមទាំងមានទស្សនិជនចូលរួមទស្សនាយ៉ាងច្រើនកុះករផងដែរ ។
លោក សំកុល សុចិត្រា បានឱ្យដឹងថា ការប្រកួតបាល់ទាត់មហាជនឆ្នាំ២០២៦នេះមានក្រុមកីឡាបាល់ទាត់ចំនួន២៨ក្រុមមកពីបណ្តាក្រុង-ស្រុក និងវិស័យឯកជននានាក្នុងខេត្តចូលរួម ។ ការប្រកួតកីឡាមហាជនក្រោមប្រធានបទ«ទាំងអស់គ្នាដើម្បីកីឡា កីឡាដើម្បីសុខភាព និងសាមគ្គីភាព»ធ្វើឡើងដេីម្បីរឹតចំណងមិត្តភាព សាមគ្គីភាព សន្តិភាពរវាងអ្នកស្នេហាកីឡាបាល់ទាត់ក្នុងខេត្ត និងផ្តោតលើកីឡានាំមកនូវសុខភាពល្អ កម្លាំងមាំមួន ធ្វើឲ្យយុវជនជៀសឆ្ងាយពីគ្រឿងញៀន និងលើកកម្ពស់សេដ្ឋកិច្ចក្នុងខេត្តទៀតផង ។
លោកបានបន្តថា ការបង្កើតឱ្យមានការប្រកួតបាល់ទាត់ពានរង្វាន់មហាជននេះឡើងសំដៅលើកស្ទួយវិស័យកីឡាផ្សារភ្ជាប់នឹងទេសចរណ៍ ដោយសារខេត្តសៀមរាបជាខេត្តគោលដៅរបស់ភ្ញៀវទេសចរជាតិ អន្តរជាតិ ។ ម្យ៉ាងទៀត ការប្រកួតនេះ គឺដើម្បីផ្តល់ឱកាសដ៏ល្អដល់កីឡាករបានវាស់ស្ទង់គុណផលកីឡា សម្រាប់ផ្លាស់ប្តូរបច្ចេកទេស បទពិសោធន៍ ព្រមទាំងជួយបំផុសស្មារតីឱ្យយុវជនស្រឡាញ់ និងគាំទ្រវិស័យកីឡា ចៀសឆ្ងាយពីគ្រឿងញៀន ពិសេសស្វែងរកធនធានកីឡាករឆ្នើមៗ ដើម្បីតំណាងឱ្យខេត្តទៅប្រកួតប្រជែងក្នុងកម្រិតថ្នាក់ជាតិថែមទៀតផង ។
លោក លី ប៊ុនណា ប្រធានមន្ទីអប់រំ យុវជន និងកីឡាខេត្ត បានបញ្ជាក់ថា ការប្រកួតនេះមាន២៨ក្រុម សរុប៥៨ប្រកួត និងបានបែងចែកជា ជា៧ពូលពីពូល(ក)ដល់ពូល(ឆ) ។ ក្នុងនោះមានការប្រកួតជម្រុះក្នុង១ពូលយក២ក្រុម គឺលេខ១ និងលេខ២ ព្រមទាំងលេខ៣ល្អចំនួន២ក្រុមដើម្បីបង្គ្រប់សម្រាប់វគ្គ១៦ក្រុម ។ នៅក្នុងវគ្គជម្រុះ១៦ក្រុម គឺលេខ១ពូល(ក) ប្រកួតជាមួយលេខ២ពូល(ខ), លេខ១ពូល(ខ) ប្រកួតជាមួយលេខ២ ពូល(ក), លេខ១ពូល(គ)ប្រកួតជាមួយលេខ២ពូល(ឃ), លេខ១ពូល
(ឃ)ប្រកួតជាមួយលេខ២ពូល(គ), លេខ១ពូល(ង) ប្រកួតជាមួយលេខ២ពូល(ច), លេខ១ ពូល(ច)ប្រកួតជាមួយលេខ២ពូល(ង), លេខ១ពូល(ឆ) ប្រកួតជាមួយលេខ៣ល្អ(២) និង លេខ២ពូល(ឆ) ប្រកួតជាមួយលេខ៣ល្អ(១)។
ក្នុងវគ្គផ្តាច់ព្រ័ត្រ ក្រុមចាញ់ជួបក្រុមចាញ់រកចំណាត់ថ្នាក់លេខ៣ និងលេខ៤ និងក្រុមឈ្នះជួបក្រុមឈ្នះ យកចំណាត់ថ្នាក់លេខ១ និងលេខ២ ៕
ចែករំលែកព័តមាននេះ