ទីក្រុងម៉ានីល ៖ លោក ម៉ានី ប៉ាក់គីអៅ (Manny Pacquiao) បានវិលត្រឡប់មកបម្រើការងារសាធារណៈវិញហើយ បន្ទាប់ពីប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជូញៀ (Ferdinand Marcos Jr.) កាលពីថ្ងៃទី៨ ខែកញ្ញា ឆ្នាំ២០២៦ បានតែងតាំងស្តេចប្រដាល់សកលហ្វីលីពីនរូបនេះជាប្រធានសម្របសម្រួលនៃគណៈកម្មការជាតិប្រឆាំងនឹងភាពក្រីក្រ (NAPC) ដែលមានឋានៈស្មើរដ្ឋមន្ត្រី។
លោក ប៉ាក់គីអៅ បានស្បថចូលកាន់តំណែងនៅចំពោះមុខលោកប្រធានាធិបតី ម៉ាកូស នៅឯវិមាន Malacañang កាលពីថ្ងៃទី៨ ខែកញ្ញា ដែលនេះជាតំណែងក្នុងគណៈរដ្ឋមន្ត្រីជាលើកដំបូងរបស់លោក បន្ទាប់ពីប្រឡូកក្នុងឆាកនយោបាយយ៉ាងយូរ រួមទាំងការបម្រើការងារក្នុងរដ្ឋសភា និងព្រឹទ្ធសភា ក៏ដូចជាការចូលរួមប្រកួតប្រជែងតំណែងប្រធានាធិបតីឆ្នាំ ២០២២ ដែលមិនទទួលបានជោគជ័យផងដែរ។
ស្តេចប្រដាល់ហ្វីលីពីនវ័យ៤៧ឆ្នាំរូបនេះ ចូលមកជំនួសតំណែងលោក Lope Santos III ដែលបានបំពេញការងារនៅក្នុងតំណែងនេះ ចាប់តាំងពីឆ្នាំ២០២៣។ គណៈកម្មការនេះ ដឹកនាំដោយលោក ម៉ាកូស ផ្ទាល់ ចំណែកលោក ប៉ាក់គីអៅ នៅក្នុងនាមប្រធានសម្របសម្រួល ក៏នឹងត្រូវបំពេញការងារជាប្រធានលេខាធិការដ្ឋានផងដែរ។
ស្ថាប័ន NAPC ត្រូវបានបង្កើតឡើងក្រោមច្បាប់សាធារណៈលេខ ៨៤២៥ មានភារកិច្ចសម្របសម្រួលកម្មវិធីកាត់បន្ថយភាពក្រីក្ររបស់រដ្ឋាភិបាលថ្នាក់ជាតិ និងថ្នាក់ក្រោមជាតិ ដើម្បីធានាថា ក្រុមប្រជាជនងាយរងគ្រោះទទួលបានការគិតគូរពីរដ្ឋាភិបាល។
នៅក្នុងនាមប្រធានសម្របសម្រួលប្រឆាំងភាពក្រីក្រជាតិ លោក ប៉ាក់គីអៅ នឹងធ្វើការសម្របសម្រួលកិច្ចខិតខំប្រឹងប្រែងរបស់រដ្ឋាភិបាលដើម្បីកាត់បន្ថយភាពក្រីក្រ ដោយបានបញ្ជាក់ថា លោកយល់យ៉ាងច្បាស់អំពីភាពក្រីក្រតាមរយៈបទពិសោធន៍ផ្ទាល់ខ្លួន។ លោកបានរៀបរាប់ក្នុងសេចក្តីថ្លែងការណ៍មួយថា «ខ្ញុំមានប្រភពចេញមកពីភាពក្រីក្រ ។ ខ្ញុំធ្លាប់គេងលើក្រដាសកាតុងតាមចិញ្ចើមថ្នល់ ផឹកតែទឹកដោយគ្មានអ្វីញ៉ាំ និងខំសន្សំប្រាក់កាក់តិចតួច ដើម្បីជួយគ្រួសាររបស់ខ្ញុំ»៕ ប្រភព ៖ Inquirer.net និង Reuters
ចែករំលែកព័តមាននេះ