រាជធានីភ្នំពេញ ៖ ព្រឹត្តិការណ៍រត់ប្រណាំងចម្ងាយ១០គីឡូម៉ែត្រ ត្រូវបានគេរំពឹងថានឹងមានអ្នកចូលរួមប្រមាណខ្ទង់៥ពាន់នាក់។នេះបើតាមការឱ្យដឹងពីឯកឧត្តមវ៉ាត់ ចំរើន រដ្ឋលេខាធិការក្រសួងអប់រំយុវជននិងកីឡា និងជាគណៈកម្មាធិការជាតិអូឡាំពិកកម្ពុជា ថ្លែងឱ្យដឹងនៅក្នុងសន្និសីទសារព័ត៌មាននៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីថ្ងៃទី៨ ខែកញ្ញា ។
ព្រឹត្តិការណ៍រត់ប្រណាំងស្ត្រីចម្ងាយ១០គីឡូមែត្រធ្វើឡើងដើម្បីលើកម្ពស់ការយល់ដឹងនិងទប់ស្កាត់ជម្ងឺមហារីកសុដន់ ។ បើតាមការឱ្យដឹងបន្ថែមនេះ ជាលើកទី៥ហើយ ដែលគណៈកម្មាធិការជាតិអូឡាំពិកកម្ពុជា និងដៃគូពាក់ព័ន្ធរួមគ្នាបង្កើតឱ្យមានព្រឹត្តិការណ៍រត់ប្រណាំងនេះឡើង ។ បើគិតមកត្រឹមថ្ងៃនេះ មានអ្នកចុះឈ្មោះចូលរួមរត់ប្រណាំងប្រមាណជាង២ពាន់នាក់រួចមកហើយ ខណៈថ្ងៃរត់ប្រណាំងពិតប្រាកដនឹងប្រព្រឹត្តទៅនៅថ្ងៃទី២៥ ខែតុលា ឆ្នាំ២០២៦។
ឯកឧត្តមវ៉ាត់ ចំរើន បានអំពាវនាវទៅដល់មន្ត្រីរាជការ ប្រជាពលរដ្ឋនាំគ្នាចុះឈ្មោះចូលរួមរត់ឱ្យបានច្រើននិងរួសរាន់បំផុត ។
ឯកឧត្តមបានឱ្យដឹងទៀតថា ព្រឹត្តិការណ៍រត់ប្រណាំងនេះមិនត្រឹមជួយបង្កើនសុខុមាលភាពរស់នៅប្រចាំថ្ងៃរបស់ប្រជាពលរដ្ឋនោះទេ ថែមទាំងជំរុញការយល់ដឹងលើការថែរក្សាបរិស្ថាននៅក្នុងរាជធានីភ្នំពេញឱ្យស្រស់បំព្រងប្រែក្លាយជារាជធានីបៃតងទៀតផង។
លោកសែម ផល្លា នាយកប្រតិបត្តិរៀបចំព្រឹត្តិការណ៍ម៉ារ៉ាតុង អមគណៈកម្មាធិការជាតិអូឡាំពិកកម្ពុជា សូមថ្លែងអំណរគុណទៅដល់សាលារាជធានីភ្នំពេញដែលបានចូលរួមសហកាយ៉ាងពេញទំហឹងជួយសម្រួលចរាចរណ៍ ដល់អ្នករត់មានភាពកក់ក្ដៅបំផុត។លោកក៏បានធ្វើការអំពាវនាវទៅដល់ប្រជាពលរដ្ឋដែលធ្វើដំណើរតាមដងផ្លូវនៅក្នុងរាជធានីភ្នំពេញ នាំគ្នាចូលរួមគោរពច្បាប់ចរាចរណ៍ទាំងអស់គ្នា ។ លោកបានលើកឡើងទៀតថា ការចូលរួមគោរពច្បាប់ចរាចរណ៍ គឺជាការការពារអាយុជីវិតយើងទាំងអស់គ្នា៕
ចែករំលែកព័តមាននេះ