ប្រទេសស្វីស ៖ លោក Gianni Infantino នឹងឈរឈ្មោះបោះឆ្នោតសម្រាប់អាណត្តិទី៤របស់លោក នៅក្នុងការបោះឆ្នោតជ្រើសរើសប្រធានសហព័ន្ធកីឡាបាល់ទាត់ពិភពលោក (FIFA) នាខែមីនា ឆ្នាំ២០២៧ ខាងមុខ បើទោះបីជាមានសម្ពាធពីសហព័ន្ធបាល់ទាត់អឺរ៉ុប (UEFA) និងសហព័ន្ធជាសមាជិកមួយចំនួនផ្សេងទៀត យ៉ាងណាក៏ដោយ។
ព័ត៌មាននេះត្រូវបានបញ្ជាក់ដោយ FIFA កាលពីថ្ងៃទី៦ ខែកញ្ញា កន្លងទៅ បន្ទាប់ពីមានការសង្ស័យលេចឮថា លោក Infantino អាចនឹងបោះបង់ចោលផែនការឈរឈ្មោះបោះឆ្នោតឡើងវិញ ដោយសារតែវិបត្តិដ៏ចម្រូងចម្រាសជុំវិញផែនការលក់ភាគហ៊ុនការប្រកួត របស់ FIFA ទៅឱ្យក្រុមអ្នកវិនិយោគឯកជន។
ជាការបញ្ជាក់បំពេញបន្ថែម អ្នកនាំពាក្យរបស់ FIFA ម្នាក់បានប្រាប់សារព័ត៌មាន AS ថា «ប្រធាន FIFA បានប្រកាសកាលពីខែមេសាហើយថា លោកនឹងឈរឈ្មោះសម្រាប់អាណត្តិមួយទៀតនៅឆ្នាំ២០២៧។ ជាការពិតណាស់ គ្មានអ្វីផ្លាស់ប្តូរឡើយ។ លោកនឹងនៅតែឈរឈ្មោះដដែល»។
ការបោះឆ្នោតត្រូវបានគ្រោងទុកនឹងប្រព្រឹត្តទៅនៅថ្ងៃទី១៨ ខែមីនា ឆ្នាំ២០២៧ នៅក្នុងទីក្រុងរ៉ាបាត (Rabat) ប្រទេសម៉ារ៉ុក។ បេក្ខជនដែលបំណងចង់ប្រកួតប្រជែងជាមួយនឹងលោក Infantino ត្រូវតែប្រកាសពីបំណងឈរឈ្មោះបោះឆ្នោតឱ្យបានមុនថ្ងៃទី១៨ វិច្ឆិកា ឆ្នាំនេះ។
ប្រសិនបើជាប់ឆ្នោតទៀត លោក Infantino នឹងបន្តដឹកនាំ FIFA រហូតដល់ឆ្នាំ២០៣១។ បុរសជនជាតិស្វីសវ័យ៥៦ឆ្នាំរូបនេះ បានក្លាយជាប្រធាន FIFA ជាលើកដំបូងនៅក្នុងឆ្នាំ២០១៦ បន្ទាប់ពីត្រូវបានបោះឆ្នោតជ្រើសរើសដើម្បីជំនួសតំណែងលោក Sepp Blatter។ អាណត្តិបច្ចុប្បន្នរបស់លោកត្រូវបានចាត់ទុកជាអាណត្តិទី៣ បើទោះជាអាណត្តិដំបូងរបស់លោក គ្រាន់តែជាការបំពេញបន្ថែមនូវរយៈពេលសេសសល់នៃអាណត្តិរបស់លោក Blatter ក៏ដោយ៕
ចែករំលែកព័តមាននេះ