ចក្រភពអង់គ្លេស ៖ អតីតកីឡាករបាល់ទាត់ឆ្នើម Sir David Beckham បានក្លាយជាអត្តពលិកមហាសេដ្ឋីដំបូងគេរបស់ចក្រភពអង់គ្លេស។ នេះផ្អែកលើបញ្ជីឈ្មោះអ្នកមានបំផុតប្រចាំឆ្នាំ ២០២៦ របស់កាសែត…
ចក្រភពអង់គ្លេស ៖ អតីតកីឡាករបាល់ទាត់ឆ្នើម Sir David Beckham បានក្លាយជាអត្តពលិកមហាសេដ្ឋីដំបូងគេរបស់ចក្រភពអង់គ្លេស។ នេះផ្អែកលើបញ្ជីឈ្មោះអ្នកមានបំផុតប្រចាំឆ្នាំ ២០២៦ របស់កាសែត Sunday Times កាលពីពេលថ្មីៗនេះ។
កាសែតដែលមានមូលដ្ឋាននៅក្នុងទីក្រុងឡុងដ៏ ចក្រភពអង់គ្លេសមួយនេះ បានបង្ហាញថា ទ្រព្យសម្បត្តិរួមរបស់ Sir David Beckham និងភរិយា គឺលោកស្រី Victoria បានឈានដល់ប្រមាណ ១,១៨ ពាន់លានផោន ឬប្រមាណ ១,៥៨ ពាន់លានដុល្លារអាមេរិក នៅឆ្នាំនេះ។ ជាមួយតួលេខដ៏សន្ធឹកសន្ធាប់នេះ បានធ្វើឱ្យអ្នកទាំងពីរឈរនៅលំដាប់ទីពីរក្នុងបញ្ជីអត្តពលិកដែលមានទ្រព្យសម្បត្តិច្រើនបំផុតរបស់ចក្រភពអង់គ្លេស នៅពីក្រោយគ្រួសាររបស់អតីតនាយកប្រតិបត្តិក្រុមហ៊ុន Formula One លោក Bernie Ecclestone ដែលទ្រព្យរបស់អ្នកជំនួញមានរហូតដល់តម្លៃ ២ ពាន់លានផោន។
លោក Bernie Ecclestone មិនត្រូវបានចាត់ថ្នាក់ជាអត្តពលិកមហាសេដ្ឋីដំបូងគេរបស់ចក្រភពអង់គ្លេស ដោយសារទ្រព្យរាប់ពាន់លានដុល្លារបស់លោក មិនមែនរកបានដោយអាជីពកីឡាករ ការប្រកួតប្រជែង ឬប្រតិបត្តិការក្នុងនាមជាអត្តពលិកនោះទេ ប៉ុន្តែផ្ទុយទៅវិញ ប្រាក់ចំណូលទាំងនោះបានមកដោយសារជំនួញ ជាពិសេសជានាយកប្រតិបត្តិ និងជាអ្នកកាន់សិទ្ធិពាណិជ្ជកម្មយូរអង្វែងរបស់ក្រុមហ៊ុន Formula 1។
Sir David Beckham ដែលបានចូលនិវត្តន៍អាជីពបាល់ទាត់ក្នុងឆ្នាំ ២០១៣ បច្ចុប្បន្នគឺជាសហម្ចាស់ក្លិប Inter Miami ដែលជាក្លិបមានតម្លៃថ្លៃបំផុតប្រចាំលីគកំពូលអាមេរិក (Major League Soccer) ពោលតម្លៃ ១,៤ ពាន់លានដុល្លារអាមេរិក។ ទន្ទឹមនឹងនោះ អតីតខ្សែបម្រើឆ្នើមក្រុម Manchester United, Real Madrid, LA Galaxy, AC Milan និង PSG ដែលបច្ចុប្បន្នឈានដល់វ័យ ៥១ ឆ្នាំរូបនេះ ក៏មានតួនាទីជាឯកអគ្គរដ្ឋទូតម៉ាក និងដៃគូសហការរបស់ក្រុមហ៊ុនល្បីៗជាច្រើនផងដែរ រួមទាំង Adidas និង Hugo Boss ជាដើម។
Beckham បានដើរយ៉ាងសំខាន់សម្រាប់តោកំណាចអង់គ្លេស បើទោះបីជាមិនអាចជួយក្រុមឈ្នះពានរង្វាន់ធំយ៉ាងណាក្តី ប៉ុន្តែសម្រាប់អាជីពជាមួយក្លិបវិញ កីឡាករពូកែបញ្ជូនបាល់វែង និងទាត់បាល់ហ្វ្រីឃីក (Free Kick) រូបនេះ ជោគជ័យយ៉ាងខ្លាំង ដោយបានឈ្នះពានរង្វាន់ជាច្រើន រួមទាំង Champions League, Premier League, La Liga និង Ligue 1 ផងដែរ។
លើសពីនេះទៀត ជាកត្តិយសដ៏មហាធំធេង David Beckham ត្រូវបានស្ដេចឆាលស៍ទី៣ (Charles III) នៃចក្រភពអង់គ្លេសបានតែងតាំងគោរមងារ «Sir» ជាផ្លូវការ ដែលជាគោរមងារកិត្តិយសថ្នាក់ជាតិខ្ពស់បំផុតមួយ កាលពីថ្ងៃទី១៤ ខែមិថុនា ឆ្នាំ២០២៥ កន្លងទៅ សម្រាប់សមិទ្ធផលលើវិស័យកីឡា និងសកម្មភាពសប្បុរសធម៌។ ក្រៅអំពីមានអាជីពបាល់ទាត់ដ៏អស្ចារ្យ និងការធ្វើជំនួយដ៏ជោគជ័យហើយនោះ Sir David Beckham បានបម្រើការជាឯកអគ្គរដ្ឋទូតអង្គការយូនីសេហ្វ (UNICEF) តាំងពីឆ្នាំ២០០៥ ហើយក៏បានក្លាយជាឯកអគ្គរដ្ឋទូតសម្រាប់អង្គការសប្បុរសធម៌របស់ស្តេចឆាលស៍ ដែលជាមូលនិធិ King’s Foundation កាលពីឆ្នាំ២០២៤ ផងដែរ។
ក្រឡែកមើលទ្រព្យសម្បត្តិរបស់អ្នកស្រី Victoria Beckham ឯណោះវិញ ភាគច្រើនរក បានពីម៉ាកសម្លៀកបំពាក់ដ៏ល្បីរបស់អ្នកស្រី បន្ទាប់ពីទទួលឈ្មោះបោះសំឡេងក្នុងនាមជាសមាជិកនៃក្រុមតន្ត្រីប៉ុប «The Spice Girls» ដ៏ល្បីរបស់ចក្រភពអង់គ្លេស ហើយបើទោះបីជាមានវ័យច្រើនយ៉ាងណាក៏ដោយ ក៏ប្តីប្រពន្ធមួយគូនេះ នៅតែបន្តរក្សាកត្តិនាមល្បីល្បាយរបស់ខ្លួនទាំងជាតិ អន្តរជាតិដដែល៕ ប្រភព ៖ AFP និង BBC
ចែករំលែកព័តមាននេះ