ADផ្ទាំងផ្សព្វផ្សាយពាណិជ្ជកម្ម

Picture

«​អំពើ​ពុ.ក​រលួ.យ​» ជាដើម​ចមនាំ​ឱ្យ​ក្រុមបាល់ទាត់​ជម្រើស​ជាតិចិន​បរាជ័យ​បន្តបន្ទាប់

1 ខែ មុន

ចិន ៖ ប្រជាជន​ចិន ជា​ពិសេស​អ្នកគាំទ្រ​វិស័យ​កីឡាបាល់ទាត់ បាន​ផ្ទុះ​ការ​ខឹងសម្បារ​យ៉ាង​ខ្លាំង

ចិន ៖ ប្រជាជន​ចិន ជា​ពិសេស​អ្នកគាំទ្រ​វិស័យ​កីឡាបាល់ទាត់ បាន​ផ្ទុះ​ការ​ខឹងសម្បារ​យ៉ាង​ខ្លាំង បន្ទាប់​ពី​ក្រុម​ជម្រើសជាតិ​ប្រទេស​ពួក​គេ​ធ្វើ​មិន​បាន​ល្អ​ទាល់តែ​សោះ និង​ធ្លាក់​ចេញពី​ការ​ប្រកួត​ពានរង្វាន់​ជើងឯក​ទ្វីបអាស៊ី AFC Asian Cup ឆ្នាំ ២០២៣ នៅ​ប្រទេស​កា​តា ត្រឹម​វគ្គ​ចែក​ពូ​ល​។

ការ​ចាញ់​ក្រុម​ម្ចាស់ផ្ទះ​កា​តា​លទ្ធផល ១-០ ការ​ប្រកួត​ចុង​ក្រោយ​វគ្គ​ចែក​ពូ​ល កាលពី​ថ្ងៃ​ទី​២២ ខែមករា ឆ្នាំ​២០២៤ បាន​ធ្វើ​ឱ្យ​ចិន​បញ្ចប់​នៅ​ចំណាត់ថ្នាក់​លេខ​៣ ពូ​ល A ឆ្លងកាត់​៣​ប្រកួត ស្មើ​២ និង​ចាញ់​១ ជាមួយ​ស្ថិតិ​ដ៏​អាក្រក់​ដោយ​គ្មាន​គ្រាប់​ស៊ុត​បញ្ចូល​ទី និង​របូត​១​គ្រាប់​។ អ្នកគាំទ្រ​ចិន​ផ្ទុះ​ការ​ខឹងសម្បារ​លាយឡំ​ជាមួយ​អារម្មណ៍​នឿយហត់​នឹង​ការ​បរាជ័យ​ដដែល​ៗ​ជា​ច្រើន​ឆ្នាំ​កន្លង​មកនេះ ដ្បិត​ប្រធានាធិបតី​ចិន លោក ស៊ី ជី​ន​ពីង (Xi Jinping) ធ្លាប់​បាន​និយាយ​ថា លោក​ចង់ឱ្យ​ប្រទេស​ចិន​ឈ្នះ​ពានរង្វាន់ World Cup យ៉ាងណា​ក៏​ដោយ​។

អ្នកគាំទ្រ​ចិន​នៅ​ក្នុង​កីឡដ្ឋាន​បាន​នាំ​គ្នា​ស្រែ​កថា «​អ្នក​គួរ​ខ្មាស​ខ្លួនឯង​» ហើយ​បាន​បន្ត​ស្រែក​យ៉ាង​ហួសចិត្ត​ទៀត​ថា «​សួស្ដី​ឆ្នាំ​ថ្មី​» ទៅ​កាន់​កីឡាករ​នៅ​បញ្ចប់​ការ​ប្រកួត នឹង​មុន​ពេល​ថ្ងៃ​ឈប់​សម្រាក​ដ៏​ធំ​បំផុត​របស់​ប្រទេស​ចិន​។

លោក Wang Jianxiang អ្នកវិភាគ​កីឡា​បាន​បង្ហោះ​សា​រលើ​បណ្តាញ​ទំនាក់ទំនង​សង្គម​ចិន Weibo ថា «​ដើម្បី​កសាង​ក្រុម​ឡើង​វិញ​បន្ទាប់​ពី​បរាជ័យ​នេះ យើង​ត្រូវ​តែ​ធ្វើ​សកម្មភាព​យ៉ាង​ឆាប់រហ័ស​ក្នុង​ការ​ផ្លាស់​ប្តូរ​គ្រូបង្វឹក ដើម្បី​ទទួល​បាន​មូលដ្ឋាន​ច្បាស់លាស់​ត្រឹមត្រូវ និង​បញ្ឈប់​អំពើ​ពុក​រលួយ​»​។

អ្នកវិភាគ​ម្នាក់​ទៀត​គឺ​លោក Ji Yuyang បាន​បង្ហោះ​សារ​ផង​ដែរ​ថា «​ការ​ប្រកួត Asian Cup បាន​ធ្វើ​ឱ្យ​យើង​មើលឃើញ​យ៉ាង​ច្បាស់​ថា តើ​មាន​ប្រទេស​ប៉ុន្មាន​ក្នុង​ទ្វីបអាស៊ី​កំពុង​កែ​លម្អ​កម្រិត​បាល់ទាត់​ពួក​គេ​។ ប្រទេស​ចិន​មិនមែន​គ្រាន់តែ​ឈរ​ស្ងៀម​នោះ​ទេ យើង​កំពុង​ដំណើរការ​ឡើង​វិញ​ទាំងស្រុង​»​។
ដោយឡែក លោក Zhao Yu ដែល​ជា​អ្នកវិភាគ​កីឡា​ម្នាក់​ផង​ដែរ​នោះ ត្រូវ​បាន​ស្រង់​សម្តី​ដោយ​ប្រព័ន្ធ​ផ្សព្វផ្សាយ​ក្នុងស្រុក​ថា «​វា​ជា​រឿង​គួរ​ឱ្យ​អាម៉ាស់​ណាស់ ដែល​យើង​លេង​៣​ប្រកួត​ដោយ​គ្មាន​គ្រាប់​បាល់​ស៊ុត​បញ្ចូល​ទី ឬ​ជ័យជម្នះ​»​។

អ្នកគាំទ្រ​បាល់ទាត់​ចិន ក៏​ផ្ទុះ​ការ​ខឹងសម្បា​រលើ​បណ្តាញ​សង្គម​យក្ស​ចិន Weibo បាន​ចង្អុលបង្ហាញ​អំពី​ការ​ប្រព្រឹត្ត​អំពើ​ពុក​រលួយ​យ៉ាង​ស៊ីជម្រៅ​លើ​ការ​ប្រកួត​ក្នុងស្រុក ទើប​នាំ​ឱ្យ​ក្រុម​ជម្រើសជាតិ​គ្មាន​សមត្ថភាព​គ្រប់គ្រាន់​សម្រាប់​ប្រកួតប្រជែង​។​ទូរទស្សន៍​រដ្ឋ CCTV ក្នុង​ខែ​នេះ បាន​ចាក់​ផ្សាយ​ភាពយន្ត​ឯកសារ​ដែល​អតីត​គ្រូបង្វឹក​ជម្រើស​ជាតិចិន លោក Li Tie បាន​សារភាព​ថា គាត់​បាន​សូកប៉ាន់​ប្រាក់​រាប់​សែន​ដុល្លារ ដើម្បី​ទទួល​បាន​តំណែង​នេះ និង​ជាប់​ពាក់ព័ន្ធ​នឹង​ការ​កំណត់​លទ្ធផល​ប្រកួត​។

ការ​បង្ក្រាប​អំពើ​ពុក​រលួយ​ក៏​បាន​ចាប់​មន្ត្រី​សមាគម​បាល់ទាត់​ចិន​មួយ​ចំនួន​ផង​ដែរ​។ អ្នក​និយម​លេង​បណ្ដាញ​សង្គម​ម្នាក់​បាន​សរសេរ​ថា «​បន្ទាប់​ពី​មាន​អំពើ​ពុក​រលួយ​ជា​ច្រើន​ឆ្នាំ​មក វា​គ្មាន​អ្វី​ចម្លែក​នោះ​ទេ ដែល​យើង​គ្មាន​កីឡាករ​មាន​ទេព​កោសល្យ​លើ​ទីលាន​»​។

គួរ​បញ្ជាក់​ជូន​ថា គិត​ត្រឹម​ព្រឹក​ថ្ងៃ​ទី​២៥ ខែមករា ឆ្នាំ​២០២៤ នេះ ម្ចាស់ផ្ទះ​កា​តា ជប៉ុន អូស្ត្រាលី តា​ហ្ស៊ី​គី​ស្ថា អា​រ៉ាប់​រួម អ៊ី​រ៉ា​ក់ អ៊ូ​ស​បេ​គី​ស្ថាន អ៊ី​រ៉​ង់ និង ស៊ី​រី បាន​កក់​កៅអី​វគ្គ​១៦​ក្រុម​ចុង​ក្រោយ​ពានរង្វាន់ AFC Asian Cup ឆ្នាំ ២០២៣៕ (​ប្រភព ៖ VnExpress)

អត្ថបទសរសេរ ដោយ

កែសម្រួលដោយ