រាជធានីភ្នំពេញ ៖ សេចក្ដីប្រកាសព័ត៌មានរបស់អ្នកនាំពាក្យ នៃអយ្យការអមសាលាដំបូងរាជធានីភ្នំពេញ នៅថ្ងៃទី២៥ ខែមករា ឆ្នាំ២០២៣នេះ បានបង្ហាញថា តុលាការមានចំណាត់ការតាមផ្លូវច្បាប់ទៅលើជនបង្កគ្រោះថ្នាក់ចរាចរណ៍ម្នាក់ ដែលបើកបរក្នុងស្ថានភាពស្រវឹង បានបុកម៉ូតូមួយគ្រឿង បណ្ដាលឲ្យទារ.កម្នាក់ស្លា.ប់ និងពីរនាក់ទៀតរងរបួស នៅលើស្ពានជ្រោយចង្វារ ដែលករណីនេះតំណាងអយ្យការ បានចេញដីកាបញ្ជាឲ្យជនបង្កចូលខ្លួន ប៉ុន្តែជននេះ នៅតែមិនព្រមចូល ។
អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានអោដឹងថា ៖ កាលពីវេលាម៉ោង០២និង១០នាទីរំលងអាធ្រាត្រឈានចូលថ្ងៃទី០៥ ខែធ្នូ ឆ្នាំ២០២២ នៅចំណុចលើស្ពានជ្រោយចង្វារចាស់ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ មានករណីគ្រោះថ្នាក់ចរាចរណ៍មួយកើតឡើងរវាងរថយន្តម៉ាក LEXUS NX2OT, ពណ៌ស ពាក់ស្លាកលេខភ្នំពេញ 2BB-9989 ដែលបើកបរដោយឈ្មោះ សោម ណូវីទីឃា ភេទប្រុស អាយុ១៩ឆ្នាំ សញ្ជាតិខ្មែរ បើកបរក្នុងស្ថានភាពស្រវឹង និងមិនប្រុងប្រយ័ត្នបណ្តាលឲ្យបុកនឹងម៉ូតូមួយគ្រឿង ដែលធ្វើដំណើរស្របទិសគ្នាម៉ាក HONDA SCOOPY ពណ៌ស ពាក់ស្លាកលេខកណ្តាល1B-9979 ដែលបើកបរំដោយឈ្មោះ ប៉ែន ចំរើន ភេទប្រុស តេយុ៤០ឆ្នាំ រួមដំណើរដោយឈ្មោះ កែវ លក្ខិណា ភេទស្រី អាយុ៣១ឆ្នាំ និងឈ្មោះ សុខ ឡេង ភេទប្រុស អាយុ៦០ថ្ងៃ ។ ក្នុងករណីគ្រោះថ្នាក់ចរាចរណ៍ខាងលើបានបណ្តាលឲ្យអ្នកបើកបរម៉ូតូ HONDA SCOOPY ព្រមទាំងអ្នករួមដំណើរទាំង២នាក់ រងរបួសជាទម្ងន់
ត្រូវបានបញ្ជូនទៅសង្គ្រោះនៅមន្ទីរពេទ្យ រហូតមកដល់ថ្ងៃទី១១ ខែធ្នូ ឆ្នាំ២០២២ អ្នករងរបួស ឈ្មោះ សុខ ឡេង បានទទួលមរណៈភាព ។
អ្នកនាំពាក្យ នៃអយ្យការអមសាលាដំបូងរាជធានីភ្នំពេញ សូមជម្រាបជូនផងដែរថា ៖ ក្រោយពីទទួលបានសំណុំរឿងខាងលើពីមន្ត្រីនគរបាលយុត្តិធម៌ នៃការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ និងពាក្យបណ្ដឹងផ្ទាល់របស់ភាគីជនរងគ្រោះ តំណាងអយ្យការបានធ្វើការស៊ើបអង្កេតដោយបានស្តាប់ចម្លើយភាគីពាក់ព័ន្ធ និងបានចេញដីកាបញ្ជាឲ្យចូលខ្លួនលើជនបង្កគ្រោះថ្នាក់ចរាចរណ៍ឈ្មោះ សោម ណូរីទីឃា ប៉ុន្តែជននេះនៅតែមិនត្រូវបាននាំមកនៅចំពោះមុខអយ្យការ ដើម្បីស្តាប់ចម្លើយអំពីអង្គហេតុខាងលើ ។
ក្រោយពីបានស៊ើបអង្កេតចប់សព្វគ្រប់ ព្រមទាំងបានពិនិត្យលើភស្តុតាងនានា ក្នុងសំណុំរឿង តំណាងអយ្យការបានបើកការស៊ើបសួរលើអង្គហេតុគ្រោះថ្នាក់ចរាចរណ៍លើឈ្មោះ សោម ណូវីទីឃា ពីបទ បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្នបណ្តាលឲ្យស្លាប់ និងមានរបួសដល់អ្នកដទៃ ប្រព្រឹត្តនៅចំណុច
លើស្ពានជ្រោយចង្វារចាស់ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ កាលពីថ្ងៃទី០៥ ខែធ្នូ ឆ្នាំ២០២២ តាមបញ្ញត្តិមាត្រា ៨៣ និងមាត្រា ៨៥ នៃច្បាប់ ស្តីពីចរាចរណ៍ផ្លូវគោក ។
មាត្រា ៨៣ ចែងថា ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន មិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្ដាលឲ្យរបួសដល់អ្នកដទៃ ស្ថិតក្នុងស្ថានភាពស្រវឹង ដោយអត្រាជាតិអាកុលចាប់ពី ០,៨០ (សូន្យក្បៀស សែសិប) មីលីក្រាមក្នុងមួយលីត្រខ្យល់ ឬចាប់គឺ ០,៨០ (សូន្យក្បៀសប៉ែតសិប) ក្រាមក្នុងមួយលីត្រឈាមឡើងទៅបណ្តាលឲ្យមានរបួសច្រើននាក់ អំពើល្មើសខាងលើនេះ ត្រូវផ្តន្ទាទោសដាក់ពន្ធនាគារពី ១(មួយ)ឆ្នាំ ទៅ៣(បី)ឆ្នាំ និងពិន័យជាប្រាក់ពី ៤០០០.០០០(បួនលាន)រៀល ទៅ ១៥,០០០.០០០ (ដប់ប្រាំលាន) រៀល ។
មាត្រា ៨៥ ចែងថា ជនណាបើកបរដោយធ្វេសប្រហែសគ្នា មិនប្រុងប្រយ័ត្ន មិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវបណ្ដាលឲ្យស្លាប់អ្នកដទៃ ស្ថិតក្នុងស្ថានភាពស្រវឹងដោយអត្រាជាតិអាកុលចាប់ពី ០,៤០ (សូន្យក្បៀសសែសិប) មីលីក្រាមក្នុងមួយលីត្រខ្យល់ ឬចាប់ពី ០,៨០ (សូន្យក្បៀសប៉ែតសិប)ក្រាមក្នុងមួយលីត្រឈាមឡើងទៅអំពើល្មើសខាងលើនេះ ត្រូវផ្តន្ទាទោសដាក់ពន្ធនាគារពី ២(ពីរ)ឆ្នាំ ទៅ៥ (ប្រាំ)ឆ្នាំ និងពិន័យជាប្រាក់ពី ១០.០០០.០០០(ដប់លាន)រៀល ទៅ ២៥,០០០.០០០ (ម្ភៃប្រាំលាន)រៀល ។
ជាការកត់សម្គាល់ ប៉ុន្មានថ្ងៃនេះ មានការផ្សព្វផ្សាយព័ត៌មានថា ជនបង្កខាងលើនេះ ត្រូវបានតុលាការ បានចោទប្រកាន់ត្រឹមតែពីបទ បង្កគ្រោះថ្នាក់ចរាចរណ៍បណ្ដាលឲ្យអ្នកដទៃស្លាប់ និងរបួសដោយអចេតនា តែប៉ុណ្ណោះ ។
សូមរម្លឹករឿងពាក់ព័ន្ធឡើងវិញ មានដូចជា ៖
រឿងពាក់ព័ន្ធ-«ទីបំផុត! ទារ.កផុតដង្ហើមហើយ ករណីយុវជនម្នាក់ស្រវឹងបើករថយន្តបុកមនុស្ស៣នាក់ សង២,៥០០ដុល្លារ» ។
រឿងពាក់ព័ន្ធ –«ប៉ូលិសចរាចរណ៍រាជធានីភ្នំពេញ ទាមទារភាពស្អាតស្អំរបស់ខ្លួន ក្នុងរឿងសំណងជនរងគ្រោះ ២,៥០០ដុល្លារ»
រឿងពាក់ព័ន្ធ –«ទោះជីវិត៣នាក់ ផ្តល់សំណង២,៥០០ដុល្លារក្តី ក៏សមត្ថកិច្ចបញ្ជូនជនបង្កទៅតុលាការ» ។
រឿងពាក់ព័ន្ធ –«ក្រុមមេធាវីសម្ដេចតេជោ នឹងជួយគ្រួសារជនរងគ្រោះតាមផ្លូវច្បាប់ ខណៈទារកនៅមានសង្ឃឹម» ។
ចែករំលែកព័តមាននេះ