ទីក្រុងម៉ានីឡា៖ មានហេតុការណ៍បាញ់ប្រហារនៅក្នុងបរិវេណសាលារៀនមួយកន្លែងនៃប្រទេសហ្វ៊ីលីពីនភាគខាងត្បូងបណ្ដាលឱ្យសិស្សយ៉ាងតិចបីនាក់ស្លាប់។ ក្នុងនោះ សិស្សម្នាក់អាយុ១៦ឆ្នាំដែលជាជនសង្ស័យនៅក្នុងការប្រព្រឹត្តអំពើបាញ់ប្រហារនេះក៏បានស្លាប់ផងដែរ។ យុវជនរូបនេះបន្ទាប់ពីធ្វើសកម្មភាពរួចហើយក៏យកកាំភ្លើងបាញ់សម្លាប់ខ្លួនឯងតែម្ដង។ នេះបើយោងតាមមន្ត្រីសាលាខេត្តកើតហេតុខាងលើ។ ក្រៅពីជនរងគ្រោះដែលបានស្លាប់ សិស្ស៨នាក់ទៀតរងរបួស។ នៅក្នុងចំណោមនោះ បួននាក់រងរបួសធ្ងន់។
ជនរងគ្រោះទាំងអស់សុទ្ធតែជាសិស្សរៀននៅក្នុងសាលាជាមួយគ្នា និងមានអាយុចន្លោះពី១៤-១៧ឆ្នាំ។ នេះបើយោងតាមអាល់បឺត ផាឡឹនស្យា (Albert Palencia) ជាចៅហ្វាយក្រុងបាន់ហ្កា (Banga) នៃខេត្តកូតាបាតូខាងត្បូង (South Cotabato)។ ក្រុមអ្នកជួយសង្គ្រោះបន្ទាប់ពីទទួលដំណឹងនេះភ្លាមក៏ប្រញាប់ប្រញាល់ចុះទៅកន្លែងកើតហេតុនៅសាលាមធ្យមសិក្សាជាតិបាន់ហ្កា (Banga National High School) នៃកោះមីនដាណាវ (Mindanao) នៅវេលាម៉ោង១:៣០រសៀល។
លោករីហ្សាលី ដេដែល (Rizalie Dedel) ជាភ្នាក់ងារជួយសង្គ្រោះប្រាប់អាអែហ្វប៉េថាជនរងគ្រោះម្នាក់ភេទប្រុស និងម្នាក់ទៀតភេទស្រី។ ពួកគេសិក្សានៅថ្នាក់ទី៩។ ហេតុការណ៍នេះកើតឡើងបន្ទាប់ពីមានករណីស្រដៀងគ្នានេះកើតឡើង២ករណីនៅហ្វ៊ីលីពីនចាប់តាំងពីខែមិថុនា។ មែនទែនទៅ ការបាញ់ប្រហារនៅក្នុងបរិវេណសាលារៀនជាករណីដ៏កម្រនៅហ្វ៊ីលីពីន។ ផាឡឹនស្យាប្រាប់រ៉យទ័រថាជនសង្ស័យរូបនោះអង្គុយក្បែរមិត្តភក្ដិរៀនជាមួយគ្នា និងប្រាប់ឱ្យពួកគេត្រឡប់ទៅផ្ទះទៅ ព្រោះក្រោយពេលអាហារថ្ងៃត្រង់ គាត់នឹងចាប់ផ្ដើមអនុវត្តផែនការរបស់គាត់។ ឮដូច្នេះ មិត្តភក្តិគាត់ក៏ផ្ទុះសំណើចព្រោះជាទម្លាប់ ជនសង្ស័យរូបនោះចូលចិត្តនិយាយកំប្លែង។
លុះក្រោយពេលអាហារថ្ងៃត្រង់រួច គាត់ក៏ចាប់ផ្ដើមបើកការបាញ់ប្រហារមែន។ គាត់បាញ់សិស្សដប់នាក់។ បន្ទាប់មក បាញ់សម្លាប់ខ្លួនឯងតាមក្រោយ។ ជនសង្ស័យរូបនេះជាកូនប្រុសរបស់មន្ត្រីនៃមន្ទីរអប់រំខេត្ត ហើយគាត់យកកាំភ្លើងចេញពីទូសុវត្ថិភាពនៅក្នុងផ្ទះរបស់គាត់។ អភិបាលខេត្តកូតាបាតូខាងត្បូងប្រាប់ថាអ្នកដែលទទួលរងការបាញ់ប្រហារនោះសុទ្ធតែជាសិស្សរៀនថ្នាក់ជាមួយជនសង្ស័យ។ ជនសង្ស័យប្រើប្រាស់កាំភ្លើងខ្លី៩មិល្លីម៉ែត្រ និងធ្វើសកម្មភាពនេះតែម្នាក់ឯងប៉ុណ្ណោះ៕ ប្រភព៖ Channel News Asia
ចែករំលែកព័តមាននេះ