ចោរចូលចម្ការលួចបេះផ្លែឈូក និងសម្ភារញឹកញាប់ពេក ម្ចាស់ឃ្លាំចាប់ជនសង្ស័យម្នាក់ប្រគល់ឱ្យសមត្ថកិច្ច
- កណ្តាល
ខេត្តកណ្តាល ៖ មហាជនជាច្រើនបាននិងកំពុងតាមដានព័ត៌មានរឿងចោរលួចផ្លែឈូក ត្រូវបានសមត្តកិច្ចចាប់ខ្លួនយកទៅអនុវត្តច្បាប់ គ្រាន់តែផ្លែឈូកប្រមាណ៣០ផ្លែសោះ ដូច្នេះ ខាងក្រោមនេះ ជារបាយការណ៍ផ្លូវការរបស់សមត្ថកិច្ច និងចម្លើយជនសង្ស័យជាប់ចោទជាចោរលួចផ្លែឈូក ។ ករណីអំពើលួច (លួចសកម្ម) មួយករណីបានកើតឡើងនៅថ្ងៃទី១៦ ខែកញ្ញា ឆ្នាំ២០២៦ វេលាម៉ោង៨ និង៤០នាទីព្រឹក ស្ថិតចំណុចក្នុងចម្ការឈូកជនរងគ្រោះ ស្ថិតនៅភូមិព្រែកអំពិល សង្កាត់ព្រែកអំពិល ក្រុងអរិយក្សត្រ ខេត្តកណ្តាល ។
ជនរងគ្រោះជាម្ចាស់ចម្ការមាន២នាក់ ម្នាក់ឈ្មោះ ច្រឹង លួត ភេទប្រុស អាយុ៤៥ឆ្នាំ មុខរបរជាកសិករ ទីលំនៅភូមិព្រែកលួង សង្កាត់ព្រែកលួង ក្រុងអរិយក្សត្រ ខេត្តកណ្តាល។ និងម្នាក់ឈ្មោះ បឿន សុភាព ភេទស្រី អាយុ៦២ឆ្នាំ មុខរបរជាកសិករ ទីលំនៅភូមិព្រែកអំពិល សង្កាត់ព្រែកអំពិល ក្រុងអរិយក្សត្រ ខេត្តកណ្តាល ។ រីឯជនសង្ស័យឈ្មោះឃឿន សារឿន ភេទប្រុស អាយុ៤២ឆ្នាំ មុខរបរជាអ្នកលក់ដូរ ទីលំនៅភូមិព្រែកថោង សង្កាត់ព្រែកលួង ក្រុងអរិយក្សត្រ ខេត្តកណ្តាល ។ ការធ្វើតេស្តិ៍ទឹកនោមរកសារធាតុញៀន លទ្ធផល អវិជ្ជមាន ។ សម្រាប់សម្ភារដែលបាត់បង់ ១-ផ្លែឈូកមួយចំនួន, ២-ទូកស្មាច់១,៣-ម៉ាស៊ីនទូក១គ្រឿង និងជាវត្ថុតាងចាប់យកពីជនសង្ស័យ ។
ដំណើររឿងហេតុ៖ កន្លងមក នៅក្នុងដីចម្ការឈូករបស់ជនរងគ្រោះទាំង២នាក់ ស្ថិតនៅភូមិព្រែកអំពិល សង្កាត់ព្រែកអំពិល ក្រុងអរិយក្សត្រ ខេត្តកណ្តាល ធ្លាប់មានការបាត់បង់ដូចជា ម៉ាស៊ីនសម្រាប់បូមទឹក, ប្រេងម៉ាស៊ូត, ជីសម្រាប់ដាក់ដំណាំ, អាគុយ និងផ្លែឈូកអស់ជាច្រើន ដែលជនរងគ្រោះពុំបានទៅទាន់សកម្មភាពចោរកំពុងលួចសម្ភារៈនិងផ្លែឈូកទាំងនោះទេ ។
ទើបតែមកដល់ថ្ងៃខែឆ្នាំវេលាម៉ោងកើតហេតុខាងលើ ជនរងគ្រោះឈ្មោះ ច្រឹង លួត បានទៅឃ្លាំចាំមើល ក៏ឃើញមនុស្សម្នាក់កំពុងបើកទូកស្មាច់ ចូលធ្វើសកម្មភាពលួចផ្លែឈូកនៅក្នុងចម្ការរបស់គាត់ ពេលឃើញដូច្នេះ ឈ្មោះ ច្រឹង លួត ក៏បានស្រែកប្រាប់ជនរងគ្រោះម្នាក់ទៀតឈ្មោះ បឿន សុភាព ថា មានចោរចូលក្នុងចម្ការលួចឈូកទៀតហើយ ។ ភ្លាមនោះ ជនរងគ្រោះឈ្មោះ ច្រឹង លួត និងឈ្មោះ ហួន ហួត (ត្រូវជាប្តីរបស់ជនរងគ្រោះឈ្មោះ បឿន សុភាព) ក៏បានដើរកាត់ទឹកសំដៅទៅតាមចាប់ចោរដែរ កំពុងលួចកាច់ឈូក នៅពេលឃើញជនរងគ្រោះដើរសំដៅទៅរកជនសង្ស័យបានដឹងខ្លួន ហើយប្រឹងរុញ និងដោលទូកចេញពីទីនោះ ដើម្បីគេចខ្លួន ។ បន្ទាប់មក ជនរងគ្រោះឈ្មោះ បឿន សុភាព ក៏បានទៅរាយការណ៍ប្រាប់សមត្ថកិច្ចប៉ុស្តិ៍នគរបាលរដ្ឋបាលព្រែកអំពិលឲ្យជួយអន្តរាគមន៍ចាប់ចោរចូលចម្ការលួចកាច់ឈូក ។
ក្រោយពីទទួលបានព៌ត័មានប្រជាពលរដ្ឋប្តឹងភ្លាមៗ កម្លាំងសមត្ថកិច្ចនគរបាលមូលដ្ឋាន ក៏បានហៅជនសង្ស័យឈ្មោះឃឿន សារឿន យកទៅសាកសួរ ។ នៅចំពោះមុខសមត្ថកិច្ចជនសង្ស័យបានសារភាពថា មុនពេលកើតហេតុ ខ្លួនបានបើកទូកស្មាច់ចេញពីផ្ទះ ស្ថិតនៅភូមិព្រែកថោង សង្កាត់ព្រែកលួង ក្រុងអរិយក្សត្រ ខេត្តកណ្តាល បំណងទៅបេះបន្លែត្រកួន បន្ទាប់មក ដោយឃើញនៅក្នុងចម្ការឈូករបស់ជនរងគ្រោះមានទឹកលិច និងគិតថាប្រហែលម្ចាស់គេទុកចោល ខ្លួនបានធ្វើសកម្មភាពចូលលួចបេះផ្លែឈូកនោះតែម្តងទៅ ហើយក៏ត្រូវបានជាម្ចាស់ចម្ការឈូកមកទាន់ ប្តឹងសមត្ថកិច្ចឲ្យចាប់ខ្លួន។
ដោយយោងតាមពាក្យបណ្តឹងរបស់ជនរងគ្រោះជាម្ចាស់ចម្ការទាំង២នាក់ ដែលអះអាងថា ករណីចោរចូលចម្ការពួកគាត់ធ្វើសកម្មភាពលួចបេះផ្លែឈូក និងលួចសម្ភារញឹកញាប់ហើយ ទើបចាប់បានជនសង្ស័យម្នាក់ជាក់ស្តែង ប្រគល់ឲ្យសមត្ថកិច្ចចាត់ការតាមផ្លូវច្បាប់ និងចម្លើយសារភាពរបស់ជនសង្ស័យ ពាក់ព័ន្ធអំពើលួចសកម្ម សមត្ថកិច្ចបានកសាងសំណុំងតាមនីតិវិធី ៕
ចែករំលែកព័តមាននេះ