ទីក្រុងហ្សាកាតា៖ ប្រទេសឥណ្ឌូណេស៊ីស្វាគមន៍វត្តមាននៃនាវាផ្ទុកយន្តហោះទីមួយរបស់ខ្លួននៅថ្ងៃនេះ។ វាជានាវាកែច្នៃចេញពីនាវាចម្បាំងអុីតាលីដែលរដ្ឋាភិបាលអះអាងថានឹងជួយពង្រឹងសន្តិសុខលំហសមុទ្ររបស់ខ្លួន និងពង្រឹងសមត្ថភាពឆ្លើយតបទៅនឹងការដោះស្រាយគ្រោះមហន្តរាយធម្មជាតិ។ នាវាដែលមានចំណាស់៤១ឆ្នាំមួយគ្រឿងនេះអាចផ្ទុកយន្តហោះចម្បាំង និងឧទ្ធម្ភាគចក្រ ហើយត្រូវបានសម្ពោធដាក់ឱ្យប្រើប្រាស់នៅក្នុងពិធីមួយរៀបចំនៅមូលដ្ឋានកងទ័ពជើងទឹកនៃទីក្រុងហ្សាកាតាខាងជើង។
កាលពីខែមីនា អុីតាលីយល់ព្រមប្រគល់នាវានេះឱ្យឥណ្ឌូណេស៊ីបន្ទាប់ពីដាក់ឱ្យចូលនិវត្តតាំងពីឆ្នាំ២០២៤។ នេះជាផ្នែកមួយនៃកិច្ចខិតខំប្រឹងប្រែងរបស់អុីតាលីដើម្បីពង្រីកទំនាក់ទំនងផ្នែកការពារជាតិជាមួយឥណ្ឌូណេស៊ី។ អុីតាលីចង់បានកិច្ចព្រមព្រៀងទិញ-លក់នាវាមុជទឹក និងយន្តហោះចម្បាំង ដូច្នេះក៏ប្រគល់នាវាផ្ទុកយន្តហោះឱ្យឥណ្ឌូណេស៊ី វាគ្រាន់បើជាងចំណាយថវិកាដើម្បីទុកដាក់នាវានេះដែរ។ ឧត្ដមនាវីឯកមហាម៉ាត់ អាលី ថ្លែងថាយើងចង់ប្រើប្រាស់នាវានេះនៅក្នុងប្រតិបត្តិការយោធាជាជាងសម្រាប់ធ្វើសង្គ្រាម។ ប៉ុន្តែនៅក្នុងករណីចាំបាច់ យើងក៏អាចប្រើនាវានេះដើម្បីចូលរួមនៅក្នុងសមរភូមិផងដែរ។
លោកយល់ថានាវានេះអាចប្រើការបានចន្លោះពី១៥ទៅ២០ឆ្នាំខាងមុខ ហើយអាចផ្ទុកឧទ្ធម្ភាគចក្របាន១៤គ្រឿងអាស្រ័យទៅលើទំហំរបស់ដែលត្រូវផ្ទុក។ ឥណ្ឌូណេស៊ីជាប្រទេសទី២នៅតំបន់អាស៊ីអាគ្នេយ៍ដែលមាននាវាផ្ទុកយន្តហោះបន្ទាប់ពីថៃ។ លោកអាលីថ្លែងថានាវានេះនឹងដាក់ឱ្យដំណើរការនៅសប្ដាហ៍ក្រោយ។ ចាប់តាំងពីលោកប្រាបូវ៉ូឡើងកាន់តំណែងមក ការអភិវឌ្ឍវិស័យការពារជាតិគឺជានយោបាយអាទិភាពរបស់លោក។ លោកចង់ពង្រីកកម្លាំងយោធាតាមរយៈការទិញនាវាមុជទឹក នាវាចម្បាំង យន្តហោះចម្បាំង និងមីស៊ីល និងជំរុញកិច្ចសហប្រតិបត្តិការយោធាជាមួយប្រទេសនានាលើសាកលលោក។
ប៉ុន្តែការទិញនាវាផ្ទុកយន្តហោះនេះត្រូវគេចោទជាសំណួរថាតើមានការចាំបាច់ដែរឬទេដ្បិតអីវាត្រូវការចំណាយច្រើនគួរសមដែរ។ កាលពីឆ្នាំ២០២៥ ក្រសួងហិរញ្ញវត្ថុបានអនុម័តដកថវិកាជាតិ៤៥០លានដុល្លារដើម្បីជួសជុលកែលម្អឱ្យក្លាយជានាវាផ្ទុកយន្តហោះ។ ប៉ុន្តែក្រុមអ្នកតំណាងរាស្ត្រយល់ថាថ្លៃចំណាយពិតប្រាកដអាចនឹងច្រើនជាងនេះឆ្ងាយណាស់។ អ្នកតំណាងរាស្ត្រម្នាក់ថ្លែងថាគ្រាន់តែការកែសម្រួលពីនាវាចម្បាំងទៅជានាវាផ្ទុកយន្តហោះត្រូវចំណាយថវិកា៩០០លានដុល្លាររួចជាស្រេច៕ ប្រភព៖ AP
ចែករំលែកព័តមាននេះ