ស្លា.ប់២នាក់ ក្នុងគ្រោះថ្នា.ក់ចរាចរណ៍រវាងរថយន្តបុ.កជាមួយម៉ូតូ នៅផ្លូវជាតិលេខ៥
- បន្ទាយមានជ័យ
ខេត្តបន្ទាយមានជ័យ ៖ មានករណីរថយន្តមួយគ្រឿងបុកជាមួយម៉ូតូមួយគ្រឿង បណ្តាលឱ្យស្លាប់២នាក់នឹងកន្លែងកើតហេតុ ហើយរថយន្តព្យាយាមបើកគេចដែរ ប៉ុន្តែត្រូវសមត្ថកិច្ចស្ទាក់ចាប់នៅក្រុងប៉ោយប៉ែត ដែលហេតុការណ៍នេះបានកើតឡើងនៅថ្ងៃទី១៨ ខែកញ្ញា ឆ្នាំ២០២៦ លើផ្លូវជាតិលេខ៥ ស្ថិតក្នុងភូមិកូបកើត ឃុំកូប ស្រុកអូរជ្រៅ ។
មន្ត្រីនគរបាលចរាចរណ៍ផ្លូវគោកខេត្តបន្ទាយមានជ័យបានឱ្យដឹងថា មុនពេលកើតហេតុ មានរថយន្តមួយគ្រឿងម៉ាកហ្វូតEVEREST ពណ៌ខ្មៅ ពាក់ផ្លាកលេខ ភ្នំពេញ 2CE-4077 បានបើកបរតាមផ្លូវជាតិលេខ៥ ក្នុងទិសដៅពីកើតមកលិចក្នុងល្បឿនលឿនបានបុកនារី២នាក់ជិះម៉ូតូមួយគ្រឿងម៉ាកហ្ស៊ូមម័រអិច ពាក់ផ្លាក់លេខ បន្ទាយមានជ័យ 1AE-0453 ដែលធ្វើដំណើរក្នុងទិសដៅបញ្ច្រាសគ្នាពីលិចមកកើតយ៉ាងពេញទំហឹង បណ្តាលឱ្យនារី២នាក់បានស្លាប់បាត់បង់ជីវិតនឹងកន្លែងកើតហេតុ។
នារីរងគ្រោះទាំង២នាក់ខាងលើ មានអាយុស្របាលគ្នាប្រហែលជិត២០ឆ្នាំ មិនត្រូវបានស្គាល់ឈ្មោះនោះទេ ជាអ្នករស់នៅភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ។
បន្ទាប់ពីកើតហេតុ ភាគីខាងរថយន្តបានព្យាយាមបើកគេចពីកន្លែងកើតហេតុ ត្រូវបានកម្លាំងនគរបាលស្រុកអូរជ្រៅទំនាក់ទំនងទៅកម្លាំងនគរបាលក្រុងប៉ោយប៉ែតស្ទាក់ចាប់បានទាំងរថយន្ត និងអ្នកបើកបរ នាំយកទៅអធិការដ្ឋាននគរបាលក្រុងប៉ោយប៉ែត។
កម្លាំងនគរបាលជំនាញបានបញ្ជាក់ថា ក្រោយកម្លាំងនគរបាលចរាចរណ៍ជើងគោកខេត្តនិងស្រុកអូរជ្រៅសហការត្រួតពិនិត្យនិងវាស់វែងរួច ហើយបានប្រគល់សាកសពជនរងគ្រោះទាំង២នាក់ជូនសាច់ញាតិទទួលយកទៅធ្វើបុណ្យតាមប្រពៃណី។
ដោយឡែករថយន្តនិងអ្នកបើកបរបង្កគ្រោះ ក្រោយឃាត់ខ្លួន កម្លាំងជំនាញបានធ្វើការសាកសួរ និងអនុវត្តតាមនីតិវិធីជាបន្តទៀត ៕
ចែករំលែកព័តមាននេះ