អគ្គិភ័យឆាបឆេះផ្ទះអាជីវករលក់កង់មួយកន្លែង នៅស្រុកគិរីវង់
- តាកែវ
ខេត្តតាកែវ ៖ មានករណីអគ្គិភ័យឆាបឆេះផ្ទះអាជីវករលក់កង់យ៉ាងសន្ធោសន្ធៅ បណ្តាលឱ្យខូចខាតទ្រព្យសម្បត្តិ និងសម្ភារៈនៅក្នុងផ្ទះស្ទើរតែទាំងស្រុង ដែលហេតុការណ៍នេះបានកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលព្រឹកថ្ងៃទី១៨ ខែកញ្ញា ឆ្នាំ ២០២៦ នៅចំណុចផ្ទះមួយកន្លែង ក្នុងភូមិកំពង់ថ្មី ឃុំព្រះបាទជាន់ជុំ ស្រុកគិរីវង់ ខេត្តតាកែវ។
លោកវរសេនីយ៍ឯកជា សុផល អធិការនគរបាលស្រុកគីរីវង់ បានអោយដឹងថា ម្ចាស់ផ្ទះរងគ្រោះឈ្មោះ ប៉ែន សុខជា ជាអាជីវករលក់កង់ និងគ្រឿងម៉ាស៊ីន។
យោងតាមការសន្និដ្ឋានបឋមរបស់សមត្ថកិច្ចជំនាញបានឱ្យដឹង មូលហេតុនៃការឆាបឆេះផ្ទះមួយកន្លែងខាងលើនេះ អាចបណ្តាលមកពីការឆ្លងចរន្តអគ្គិសនី (ទុស្សេខ្សែភ្លើង)។
បន្ទាប់ពីទទួលបានព័ត៌មានខាងលើភ្លាមៗ លោកវរសេនីយ៍ឯកជា សុផល អធិការនគរបាលស្រុកគិរីវង់ បានដឹកនាំកម្លាំងអន្តរាគមន៍ពន្លត់អគ្គិភ័យនៃអធិការដ្ឋាននគរបាលស្រុក និងកម្លាំងពាក់ព័ន្ធ ចុះអន្តរាគមន៍ និងជួយសង្គ្រោះយ៉ាងយកចិត្តទុកដាក់ ទាំងយប់ រហូតដល់ព្រឹកឡើង ដើម្បីត្រួតពិនិត្យ និងគ្រប់គ្រងស្ថានការណ៍ផ្ទាល់នៅកន្លែងកើតហេតុ ។
ជាលទ្ធផល កម្លាំងសមត្ថកិច្ចបានទប់ស្កាត់ និងគ្រប់គ្រងអគ្គិភ័យបានទាំងស្រុង ដោយមិនបណ្តាលឱ្យឆាបឆេះរាលដាលទៅដល់ផ្ទះប្រជាពលរដ្ឋនៅជិតខាងនោះឡើយ ហើយក៏មិនបណ្តាលឱ្យមនុស្សណាម្នាក់រងរបួសនោះដែរ៕
ចែករំលែកព័តមាននេះ