បង្ក្រាបបទល្មើសធនធានជលផល ក្នុងភូមិសាស្ដ្រខេត្តសៀមរាប និងខេត្តបាត់ដំបង
- ស្វាយរៀង
ខេត្តសៀមរាប ៖ កាលពីរសៀលថ្ងៃទី២៨ ខែតុលា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបន្ដដឹកនាំក្រុមការងារពាក់ព័ន្ធ និង មន្ដ្រីជំនាញ ចុះពិនិត្យ និង បង្ក្រាបបទ ល្មើសធនធានជលផល ចាប់ពីចំណុចមាត់ ពាមចុងឃ្នៀស សង្កាត់ចុងឃ្នៀស ក្រុងសៀមរាប និងខេត្តសៀមរាប រហូតដល់ចំណុចកោះក្អែក ពាក់កន្ទេល ភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង ដើម្បីធានាបាននូវពូជត្រីបានគង់វង្សសម្រាប់ជាផ្នែកមួយ ក្នុងការចិញ្ចឹមប្រជាពលរដ្ឋតាមរយៈការប្រកបរបរនេសាទដោយស្របច្បាប់។
ឯកឧត្តម ប៉ែន ផល្លីកា បានបញ្ជាក់ថា តាមរយៈការចុះពិនិត្យ និងបង្ក្រាបបទល្មើសនេសាទនាពេលកន្លងមក ឃើញថា ការប្រកបរបរនេសាទរបស់ប្រជាពលរដ្ឋដោយខុសច្បាប់ មានការថមថយជាងមុន ដោយសារពួកគាត់មានភាពរាងចាល បន្ទាប់ពីមន្ដ្រីជំនាញបានធ្វើការបំផ្លាញនូវឧបករណ៍ខុសពីច្បាប់ដែលបានកំណត់ ដោយសារក្រុមការងារ និងមន្ត្រីជំនាញជលផលបានធ្វើការទប់ស្កាត់បានទាន់ពេលវេលា។
ឯកឧត្តមក៏បានធ្វើការកោតសរសើរចំពោះក្រុមការងារ និងមន្ត្រីជំនាញជលផលទាំងអស់ដែលបានយកចិត្តទុកដាក់ខ្ពស់ក្នុងការខិតខំប្រឹងប្រែង បង្ក្រាបនូវបទល្មើសធនធានជលផលបានត្រឹមត្រូវ នឹងទទួលបានលទ្ធផលល្អប្រសើរ។ ជាមួយគ្នានេះឯកឧត្ដម បានជំរុញដល់មន្ដ្រីជំនាញបន្ដចុះបង្ក្រាបបទល្មើសធនធានជលផលជាបន្ដទៀត ប្រៀបដូចភ្លៀងរលឹម ដើម្បីរក្សាពូជត្រីនៅក្នុងបឹងទន្លេសាបឱ្យបានច្រើនសម្រាប់ទៅថ្ងៃអនាគត។
ឯកឧត្តមអនុរដ្ឋលេខាធិការ ក៏បានណែនាំ និងអំពាវនាវដល់ប្រជានេសាទទាំងអស់ សូមប្រកបរបរនេសាទដោយស្របច្បាប់នៅក្នុងរដូវបើកនេសាទនេះ។ ករណីនេះក្រុមការងាររកឃើញមានការប្រកបរបរនេសាទខុសច្បាប់ មន្ដ្រីជំនាញ និងធ្វើការរឹបអូស និងបំផ្លាញចោលនូវឧបករណ៍ខុសច្បាប់ទាំងនោះ ហើយករណីដែលមន្ដ្រីជំនាញចាប់បានការនេសាទខុសច្បាប់នៅនឹងកន្លែង នឹងអនុវត្ដទៅតាមផ្លូវច្បាប់ដោយគ្មានករណីលើកលែងឡើយ។
យោងតាមរបាយការណ៍របស់ លោក ធិន នី សុទ្ធី នាយខណ្ឌរដ្ឋបាលជលផលខេត្តសៀមរាប បានឱ្យដឹងថា សម្រាប់ការចុះពិនិត្យ និងបង្ក្រាបបទល្មើសធនធានជលផលនាពេលនេះ ក្រុមការងារ និងមន្ដ្រីជំនាញបានធ្វើការពិនិត្យមើលការធ្វើនេសាទដោយឧបករណ៍ លបណរ ឬរ៉ាវ ចំនួន ១២០ របាំង បានពិនិត្យឃើញថាប្រជានេសាទបានអនុវត្តត្រឹមត្រូវ តាមច្បាប់ស្តីពីជលផល។ ពិនិត្យការនេសាទដោយឧបករណ៍ខ្នាតតូចដើម្បីពិនិត្យមើលផលចាប់ ក្នុងនោះមានដូចជា លបណ ឬរ៉ាវ មងរាយ ឬ មងពាក់ សៃយ៉ឺនកំពឹស សន្ទូចននោងជាដើម៕








ចែករំលែកព័តមាននេះ