រាជធានីភ្នំពេញ ៖ រថយន្តហ៊ីយ៉ាន់ដាយធុនយក្ស ១គ្រឿង បានបើកបរក្នុងល្បឿនលឿន បំពានភ្លើងស្តុប ក៏ជ្រុលទៅបុករថយន្ដ ១គ្រឿងទៀតម៉ាក GAC GN8 ពេញទំហឹង និងអូសជាច្រើនម៉ែត្រ បណ្ដាលឲ្យរថយន្តម៉ាក GAC GN8 នោះមានភ្លើងឆេះសន្ធោសន្ធៅ។ បន្ទាប់មករថយន្តបង្កខាងលើនោះ បានជ្រុលបុកឡើងលើសួនពុះចែកទ្រូងផ្លូវ រួចបន្តបុកចូលផ្ទះប្រជាពលរដ្ឋនៅក្បែរនោះទៀតបណ្ដាលឲ្យរងការខូចខាត ទើបឈប់ស្ងៀម ហើយអ្នកបើកបរប្រុងរត់គេចខ្លួន ប៉ុន្តែត្រូវបានប្រជាការពារ និងប្រជាពលរដ្ឋឃាត់បាន ។
ឧប្បត្តិហេតុនោះបានកើតឡើងកាលពីវេលាម៉ោង០៩និង៥០នាទីយប់ថ្ងៃទី១៨ ខែវិច្ឆិកា ឆ្នាំ២០២៦ នៅលើមហាវិថី ស៊ី ជីនពីង (ផ្លូវ ក្រវ៉ាត់ ក្រុងទី៣) ប្រសព្វផ្លូវលេខ១០៤ ស្ថិតនៅក្នុងភូមិគងនយ សង្កាត់គងនយ ខណ្ឌដង្កោ រាជធានីភ្នំពេញ ។
រថយន្ដ ម៉ាកហ៊ីយ៉ាន់ដាយធុនធំ នោះពណ៌ខៀវ ក្បាលសណ្ដោង ពាក់ស្លាកលេខកំពង់ចាម 3B-1232 និងកន្ទុយរ៉ឺម៉កពាក់ស្លាកលេខកំពង់ចាម 4A-3286 បើកបរដោយយុវជនម្នាក់ឈ្មោះ រ៉េត ឈៀង អាយុ២០ឆ្នាំ មានទីលំនៅផ្ទះលេខ១៨៩ ផ្លូវលេខ១៣ ភូមិអណ្តូងត្រាច ឃុំកំពង់ព្រះ ស្រុកសង្កែ ខេត្តបាត់ដំបង ពុំមានរងរបួសទេ ។
ដោយឡែករថយន្តម៉ាក GAC GN8 ដែលរងការឆាបឆេះ ពណ៌ខ្មៅ ពាក់ស្លាកលេខភ្នំពេញ 2CI-0850 បើកបរដោយបុរសជនជាតិចិនម្នាក់ឈ្មោះ ZHANG QI អាយុ៤០ឆ្នាំ មុខរបរ បុគ្គលិករោងចក្រ ស្នាក់នៅភូមិ២ សង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញរបួសស្រាល ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុរថយន្ត GAC N8 បើកបរធ្វើដំណើរតាមមហាវិថី ស៊ី ជីនពីង (ផ្លូវក្រវ៉ាត់ ក្រុងទី៣) ក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ បានបត់ឆ្វេងពេលភ្លើងស្តុបពណ៌ខៀវ ខណៈនោះស្រាប់តែរថយន្ត HYUNDAI ធុនយក្ស បើកបរក្នុងធ្វើដំណើរក្នុងល្បឿនលឿនពីទិសខាងជើងទៅទិសខាងត្បូងបំពានភ្លើងស្តុបពណ៌ក្រហម ក៏ជ្រុលបុកគ្នាចំពីមុខផ្នែកខាងស្តាំពេញទំហឹង និងអូសច្រើនម៉ែត្រ បណ្ដាលឲ្យរថយន្ត GAC N8 ឆាបឆេះសន្ធោសន្ធៅ ។
សមត្ថកិច្ចដដែលបានប្រាប់បន្តថា បន្ទាប់មករថយន្តបង្កហេតុខាងលើបានជ្រុលទៅបុកឡើងលើសួនពុះចែកទ្រូងផ្លូវ រួចជ្រុលបន្តទៅបុកចូលផ្ទះ ១ខ្នងទៀត ដែលស្ថិតនៅក្បែរកន្លែងកើតហេតុ បណ្ដាលឲ្យរងការខូចខាតរួចទើបឈប់ស្ងៀម ។ ពេលនោះអ្នកបើកបររថយន្តបង្កបានព្យាយាមចុះរត់គេចខ្លួន ប៉ុន្តែត្រូវបានប្រជាការពារ និងប្រជាពលរដ្ឋនាំគ្នាឃាត់ខ្លួនបានភ្លាមៗ រួចប្រគល់ឲ្យនគរបាល។ ដោយឡែកបុរសជនជាតិចិន ដែលជាអ្នកបើកបររថយន្តម៉ាក GAC GN8 បានបើកទ្វារចុះចេញពីរថយន្ត ដែលកំពុងឆាបឆេះនោះទាន់ពេល ទើបរួចផុតពីការរងរបួសធ្ងន់ ឬក៏ស្លាប់ ។
ប្រភពខាងលើបានប្រាប់បន្ថែមទៀតថា មូលហេតុ នៃការគ្រោះថ្នាក់ចរាចរណ៍នេះ បណ្ដាលមកពីអ្នកបើកបររថយន្ត HYUNDAI ធុនយក្សបើកបរមិនគោរពភ្លើងស្តុប ដែលកំពុងលោតពណ៌ក្រហម តម្រូវឲ្យឈប់រង់ចាំសិន។ នៅពេលមានអគ្គិភ័យឆេះរថយន្តបែបនេះ រថយន្តពន្លត់អគ្គិភ័យ ដែលប្រចាំការនៅសាលាខណ្ឌដង្កោ ក៏បានចេញទៅពន្លត់ភ្លើងរលត់ទៅវិញ ប៉ុន្តែរថយន្តម៉ាកGAC GN8 នោះត្រូវភ្លើងឆេះអស់ស្ទើរតែទាំងស្រុង ដោយនៅសល់តែផ្នែកខាងក្រោយបន្តិចប៉ុណ្ណោះ ។ រីឯផ្ទះប្រជាពលរដ្ឋក៏បានរងការខូចខាតអស់មួយចំនួន និងសួនច្បារពុះចែកទ្រូងផ្លូវក៏រងការខូចខាតដែរ ហើយក្រោយពេលកើតហេតុ រថយន្តទាំង២គ្រឿងត្រូវបាននគរបាលនាំយកទៅរក្សាទុកនៅអធិការដ្ឋាននគរបាលខណ្ឌដង្កោ រង់ចាំកាដោះស្រាយតាមច្បាប់ ៕
















ចែករំលែកព័តមាននេះ