ADផ្ទាំងផ្សព្វផ្សាយពាណិជ្ជកម្ម

Picture

ព្យាករណ៍​ធាតុអាកាស​៖ ចាប់ពី​ថ្ងៃ​ទី​២០-២២ វិច្ឆិកា កម្ពុជា​ក្តៅ​បង្គួរ ខណៈ​តំបន់​មាត់សមុទ្រ​មួយ​ចំនួន​អាច​មាន​ភ្លៀង​ធ្លាក់ ផ្គរ​រន្ទះ និង​ខ្យល់​កន្ត្រាក់

2 ម៉ោង មុន
  • ភ្នំពេញ

រាជធានី​ភ្នំពេញ ៖ ក្រសួង​ធនធានទឹក និង​ឧតុនិយម ជូនដំណឹង​អំពី​ស្ថានភាព​ធាតុអាកាស​នៅ​កម្ពុជា ចាប់ពី​ថ្ងៃ​ទី​២០ ដល់​ថ្ងៃ​ទី​២២ ខែវិច្ឆិកា ឆ្នាំ​២០២៦ ខណៈ​តំបន់​មាត់សមុទ្រ​មួយ​ចំនួន​អាច​មាន​ភ្លៀង​ធ្លាក់​ជាមួយ​ផ្គរ​រន្ទះ និង​ខ្យល់​កន្ត្រាក់ យោង​តាម​ព្រឹត្តិបត្រ​ព័ត៌មាន​ស្ដី​ពី​ស្ថានភាព​ធាតុអាកាស សម្រាប់​ថ្ងៃ​ទី​១៩ ខែវិច្ឆិកា ឆ្នាំ​២០២៦ របស់​ក្រសួង​ធនធានទឹក និង​ឧតុនិយម បានឱ្យ​ដឹង​ថា សម្ពាធ​ខ្ពស់​ដែល​កើត​មាននៅ​លើ​សមុទ្រ​ចិន​ខាងត្បូង មាន​ឥទ្ធិពល​លើ​របប​ខ្យល់មូសុង​ឦសាន ដែល​បក់​លើ​បង្ហូរ​សមុទ្រ​បេង​ហ្គា​ល់ សមុទ្រ​អាន់​ដា​ម៉​ង់ សមុទ្រ​ចិន​ខាងត្បូង អាង​ទន្លេមេគង្គ សមុទ្រ​កម្ពុជា និង​លើ​ព្រះរាជាណាចក្រ​កម្ពុជា​។

ស្ថានភាព​បែប​នេះ នឹង​ធ្វើ​ឱ្យ​ធាតុអាកាស​ចាប់ពី​ថ្ងៃ​ទី​២០ ដល់​ថ្ងៃ​ទី​២២ ខែវិច្ឆិកា ឆ្នាំ​២០២៦ មាន​លក្ខណៈ​ដូច​ខាងក្រោម​៖១. តំបន់​វាលទំនាប​៖ សីតុណ្ហភាព​មធ្យម​អប្បបរមា ២២°C និង​សីតុណ្ហភាព​មធ្យម​អតិបរមា ៣១°C​។ ខ្យល់​បក់​មក​ពី​ទិសឦសាន និង​ទិសបូព៌ មាន​ល្បឿន​មធ្យម ៤​ម៉ែត្រ​/​វិនាទី ។

ខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយ​រៀង តាកែវ កណ្តាល និង​រាជធានី​ភ្នំពេញ ពុំ​មាន​ភ្លៀង​ធ្លាក់​ទេ​។ ២. តំបន់​ខ្ពង់រាប​៖ សីតុណ្ហភាព​មធ្យម​អប្បបរមា ២១°C និង​សីតុណ្ហភាព​មធ្យម​អតិបរមា ៣១°C​។ ខ្យល់​បក់​មក​ពី​ទិសឦសាន និង​ទិសអាគ្នេយ៍ មាន​ល្បឿន​មធ្យម ៣​ម៉ែត្រ​/​វិនាទី​។ ខេត្តឧត្តរមានជ័យ កំពង់ស្ពឺ ប៉ៃលិន ជួរ​ភ្នំ​ដងរែក ក្រចេះ ស្ទឹង​ត្រែង ព្រះ​វិហារ រតនគិរី មណ្ឌលគិរី និង​តំបន់​ជួរ​ភ្នំក្រវាញ ពុំ​មាន​ភ្លៀង​ធ្លាក់​ទេ​។ ៣. តំបន់​មាត់សមុទ្រ​៖ សីតុណ្ហភាព​មធ្យម​អប្បបរមា ២២°C និង​សីតុណ្ហភាព​មធ្យម​អតិបរមា ៣១°C​។ ខ្យល់​បក់​មក​ពី​ទិសឦសាន និង​ទិសអាគ្នេយ៍ មាន​ល្បឿន​មធ្យម ៤​ម៉ែត្រ​/​វិនាទី​។ ខេត្តកំពត កែប និង​ជួរ​ភ្នំ​បូកគោ អាច​មាន​ភ្លៀង​ធ្លាក់​ជាមួយ​ផ្គរ​រន្ទះ និង​ខ្យល់​កន្ត្រាក់​គ្របដណ្តប់​លើ​ផ្ទៃដី ១៥%​។

ចំណែក​ខេត្តកោះកុង និង​ខេត្ត​ព្រះ​សីហ​នុ ពុំ​មាន​ភ្លៀង​ធ្លាក់​ទេ​។ រលក​សមុទ្រ​មាន​កម្ពស់​មធ្យម​អប្បបរមា ០,៥០​ម៉ែត្រ និង​កម្ពស់​មធ្យម​អតិបរមា ១,២៥​ម៉ែត្រ​។ អាស្រ័យ​ដូច​បាន​ជម្រាប​ជូន​ខាងលើ ក្រសួង​ធនធានទឹក និង​ឧតុនិយម សូម​សាធារណជន​ទទួល​​ជ្រាប​ជា​ព័ត៌មាន ៕