ទីក្រុងម៉ាឌ្រីត៖ មានហេតុការណ៍រថភ្លើងល្បឿនលឿនមួយខ្សែបើកទៅបុកកន្ទុយរថភ្លើងមួយខ្សែទៀតដែលឈប់ស្ងៀម ជាហេតុធ្វើឱ្យទូរថភ្លើងចំនួន២ទូក្រឡាប់ផ្កាប់ផ្ងារ និងបណ្ដាលឱ្យស្លាប់មនុស្សយ៉ាងតិច៦៤នាក់។ ហេតុការណ៍នេះកើតឡើងនៅប្រទេសអេស្ប៉ាញភាគកណ្ដាល។ ការិយាល័យរដ្ឋាភិបាលកណ្ដាលបញ្ជាក់ថាមនុស្សចេះតែស្លាប់ជាបន្តបន្ទាប់។ ដូច្នេះ គេមិនទាន់អាចរាប់ចំនួនអ្នកស្លាប់ឱ្យបានត្រឹមត្រូវនៅឡើយទេ។
អាជ្ញាធរមូលដ្ឋានប្រាប់ថាក្រៅពីអ្នកស្លាប់ដូចរៀបរាប់ខាងលើ មនុស្សយ៉ាងតិច៨០នាក់ទៀតរងរបួស។ ច្បាស់ណាស់ថាចំនួនអ្នកស្លាប់នឹងកើនឡើងបន្ថែមទៀត។ នៅពេលនេះ ក្រុមអ្នកជួយសង្គ្រោះកំពុងតែគាស់កកាយទូរថភ្លើងដើម្បីស្វែងរកអ្នកនៅរស់រានមានជីវិត ឬបើមិនឃើញអ្នកនៅរស់ទេ រកឃើញតែសាកសពក៏អស់ចិត្តដែរ។ នេះជាឧបទ្ទវហេតុពាក់ព័ន្ធនឹងរថភ្លើងនៅអេស្ប៉ាញជាលើកទី២នៅឆ្នាំ២០២៦។
ក្រុមហ៊ុនរាជាយស្ម័យយានអេស្ប៉ាញ ADIF ថ្លែងថាហេតុការណ៍បុកគ្នារវាងរថភ្លើង និងរថភ្លើងនោះកើតឡើងនៅពេលព្រឹកព្រហាមនៅខេត្តតូឡេដូ (Toledo) រវាងរថភ្លើងល្បឿនលឿនដូចគ្នាដែលដឹកអ្នកដំណើររាប់រយនាក់ និងបើកស្របទិសគ្នាចេញពីរាជធានីម៉ាឌ្រីតសំដៅទីក្រុងសឺវីលនៅអេស្ប៉ាញភាគខាងត្បូង។ នៅសុខៗ ស្រាប់តែរថភ្លើងមួយគ្រឿងបើកទៅបុកកន្ទុយរថភ្លើងមួយខ្សែទៀតដែលឈប់ស្ងៀម ជាហេតុបណ្ដាលឱ្យទូរថភ្លើងចំនួន២ទូក្រឡាច់ធ្លាក់ពីលើផ្លូវ។ រហូតមកដល់ពេលនេះ គេមិនទាន់ដឹងអំពីមូលហេតុពិតប្រាកដនៅពីក្រោយហេតុការណ៍នេះទេ។ ក្រុមហ៊ុនអាយស្ម័យយានសម្រេចចិត្តផ្អាកសេវាដឹកជញ្ជូនទៅមករវាងទីក្រុងម៉ាឌ្រីត, ស៊ីយូដាត រ៉េអាល់ (Ciudad Real) និងអានលូសៀ (Andalusia)។
ហេតុការណ៍បុកគ្នានោះកើតឡើងនៅទីវាលចំហដែលហ៊ុមព័ទ្ធដោយចម្ការអូលីវ (olive) ចន្លោះទីក្រុងអួដា (Urda) និងឡូស យ៉េបេនេស (Los Yébenes)។ គេឃើញថាទូរថភ្លើងមួយកំពិតចូលគ្នាដូចដែកអេតចាយ និងបន្សល់ទុកកម្ទេចកម្ទីរាយប៉ាយពាសពេញទីជម្រាលដែលក្រាលគ្របដោយក្រួស។ រដ្ឋមន្ត្រីសុខាភិបាលអេស្ប៉ាញថ្លែងថាក្រុមជួយសង្គ្រោះបន្ទាន់ចង់ធ្វើម៉េចជួយអ្នកដែលអាចនៅរស់រានមានជីវិតឱ្យបានទាន់ពេលវេលាតាមលទ្ធភាពដែលអាចធ្វើទៅបាន និងប្រញាប់គាស់ទូរថភ្លើងចំនួន២ដែលរងការខូចខាតធ្ងន់ធ្ងរជាងគេដើម្បីយកសាកសពជនរងគ្រោះចេញមកខាងក្រៅ។ លោកស្រីថ្លែងថាអ្នករបួសត្រូវគេបញ្ជូនទៅព្យាបាលនៅមន្ទីរពេទ្យនានាដែលស្ថិតនៅក្បែរតំបន់កើតហេតុ៕
ចែករំលែកព័តមាននេះ