ប្រទេសម៉ាឡេស៊ី៖ នាយកប្រតិបត្តិក្រុមហ៊ុនលក់ដុំ នាំចូល និងនាំចេញបន្លែផ្លែឈើមួយរូប ត្រូវបានអាជ្ញាធរម៉ាឡេស៊ីឃាត់ខ្លួន ពាក់ព័ន្ធនឹងការសង្ស័យឆបោកក្នុងការទិញចម្ការទុរេន ដែលមានទឹកប្រាក់ប្រមាណ ជាង៤០ម៉ឺនដុល្លារ។ នេះបើយោងតាមការចុះផ្សាយរបស់សារព័ត៌មាន The Star នៅថ្ងៃទី២៧ ខែតុលា ឆ្នាំ២០២៦។

ជនសង្ស័យដែលមានអាយុក្នុងវ័យ ៥០ឆ្នាំ ត្រូវបានឃាត់ខ្លួននៅថ្ងៃចន្ទ ទី២៦ ខែតុលា បន្ទាប់ពីបានទៅដល់ទីស្នាក់ការគណៈកម្មការប្រឆាំងអំពើពុករលួយម៉ាឡេស៊ី ដើម្បីផ្តល់សក្ខីកម្ម។

តាមការស៊ើបអង្កេតបឋម ករណីសង្ស័យនេះបានកើតឡើងនៅខែកុម្ភៈ ឆ្នាំ២០២៤ ប៉ុន្តែការទិញចម្ការទុរេនដែលបានព្រមព្រៀងគ្នា មិនបានសម្រេចនោះទេ។

គណៈកម្មការប្រឆាំងអំពើពុករលួយម៉ាឡេស៊ីបានបញ្ជាក់ថា ករណីនេះកំពុងត្រូវបានស៊ើបអង្កេតក្រោមមាត្រា ៤២០ នៃក្រមព្រហ្មទណ្ឌ ពាក់ព័ន្ធនឹងបទល្មើសឆបោក។ តាមការរាយការណ៍ ជនសង្ស័យត្រូវបានរំពឹងថានឹងបង្ហាញខ្លួននៅតុលាការក្រុងសាហ៍អាឡាម ក្នុងរដ្ឋសេឡាងហ្គ័រ នៅព្រឹកថ្ងៃទី២៧ ខែតុលា ដើម្បីប្រឈមនឹងការចោទប្រកាន់។

ករណីនេះកើតឡើងស្របពេលដែលម៉ាឡេស៊ីកំពុងប្រឈមនឹងការឆបោកពាក់ព័ន្ធការវិនិយោគក្លែងក្លាយ រួមទាំងការវិនិយោគក្នុងវិស័យចម្ការទុរេន។ ទោះជាយ៉ាងណា ការឃាត់ខ្លួនជនសង្ស័យមិនទាន់មានន័យថា រូបគេត្រូវបានរកឃើញថាមានពិរុទ្ធភាពនោះទេ៕