សុខភាព៖ យោងតាមការចុះផ្សាយពីប្រភពបរទេស ការផឹកទឹកក្រូចឆ្មាររាល់ព្រឹកអាចជួយបំពេញជាតិទឹក និងផ្ដល់វីតាមីន C ដល់រាងកាយ ប៉ុន្តែមិនមានភស្តុតាងច្បាស់លាស់ថា វាអាចដុតខ្លាញ់ ឬសម្រកទម្ងន់ដោយផ្ទាល់នោះទេ។ ​

ក្រូចឆ្មារមានវីតាមីន C និងសារធាតុប្រឆាំងអុកស៊ីតកម្ម ដែលជួយគាំទ្រដល់មុខងាររាងកាយ និងការការពារកោសិកា។ អ្នកជំនាញបញ្ជាក់ថា អត្ថប្រយោជន៍សំខាន់នៃការផឹកទឹកក្រូចឆ្មារពេលព្រឹក គឺជួយបំពេញជាតិទឹកក្រោយគេងពេញមួយយប់។ ការជំនួសភេសជ្ជៈផ្អែមដោយទឹកក្រូចឆ្មារមិនបន្ថែមស្ករ ក៏អាចជួយកាត់បន្ថយការទទួលកាឡូរីបានដែរ។

ទោះជាយ៉ាងណា ការផឹកទឹកក្រូចឆ្មារដែលមានជាតិជូរខ្លាំង ឬផឹកញឹកញាប់ពេក អាចធ្វើឱ្យស្រទាប់ការពារធ្មេញសឹក។ ចំពោះអ្នកមានបញ្ហាក្រពះ ឬច្រាលអាស៊ីត ការផឹកពេលពោះទទេអាចបង្កអាការៈមិនស្រួល ដូច្នេះគួរប្រុងប្រយ័ត្ន ប្រសិនបើមានរោគសញ្ញាទាំងនេះ។

អ្នកជំនាញណែនាំឱ្យលាយទឹកក្រូចឆ្មារកន្លះផ្លែជាមួយទឹក ២០០ ទៅ ៣០០ មិល្លីលីត្រ និងកុំបន្ថែមស្ករច្រើន។ ដើម្បីជួយការពារធ្មេញ អាចប្រើបំពង់បឺត ឬខ្ពុរមាត់ដោយទឹកស្អាតក្រោយផឹក។ ប្រសិនបើផឹកហើយមានអាការៈក្រពះមិនស្រួល គួរកាត់បន្ថយ ឬឈប់ផឹក។

សរុបមក ការផឹកទឹកក្រូចឆ្មារមិនមែនជាវិធីសម្រកទម្ងន់ដោយឯកឯងនោះទេ។ ការគ្រប់គ្រងទម្ងន់ប្រកបដោយសុខភាព ត្រូវការការញ៉ាំអាហារមានតុល្យភាព បន្ថែមបន្លែ និងប្រូតេអ៊ីនល្អ កាត់បន្ថយស្ករ និងអាហារកែច្នៃ ព្រមទាំងហាត់ប្រាណ និងគេងឱ្យបានគ្រប់គ្រាន់ ៕