រាជធានីភ្នំពេញ ៖ អង្គភាពប្រឆាំងអំពើពុករលួយ(ACU) បានឱ្យដឹងថា ការដាក់ពាក្យប្រឡងជ្រើសរើសមេធាវី ជំនាន់ទី២១ រកឃើញឯកសារ នៃការដាក់ពាក្យប្រឡងមានភាពមិនប្រក្រតី ១១ករណី ហើយបេក្ខជនដាក់ពាក្យ ៥ រូប ប្រើឯកសារក្លែង កំពុងស្ថិតក្នុងនីតិវិធីកសាងសំណុំរឿងបញ្ជូនទៅតុលាការ ។
យោងតាមសេចក្តីជូនដំណឹងរបស់អង្គភាពប្រឆាំអំពើពុករលួយ បានឱ្យដឹងថា ការចូលរួមសង្កេតការណ៍ចាប់ពីដំណាក់កាលដាក់ពាក្យប្រឡងជ្រើសរើសមេធាវីជំនាន់ទី២១ ដែលតាម ឯកឧត្តម កែវ ធីវុធ ឧបការី AUC ឱ្យដឹងថា មានបេក្ខជនបានដាក់ពាក្យចំនួន ៧៣៦ នាក់ លើចំនួនពាក្យ ដែលបានលក់ចំនួន ៨១៦ ច្បាប់ ក្នុងនោះក្រុមស៊ើបអង្កេតពិសេស ដឹកនាំដោយលោកជំទាវ អ៊ូ ស៊ីថា ឧបការី ACU បានរកឃើញឯកសារមិនប្រក្រតីចំនួន ១១ ករណី សរុបជាលទ្ធផល ៖
-បេក្ខជនដាក់ពាក្យ ៥ រូប ប្រើឯកសារក្លែង (កំពុងស្ថិតក្នុងនីតិវិធីកសាងសំណុំរឿងបញ្ជូនទៅតុលាការ)។
-បេក្ខជន ១ រូប មានសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០០៩ ហើយកែឈ្មោះ កែឆ្នាំកំណើតដោយខ្លួនឯង ហើយដល់ឆ្នាំ២០១៩ ទើបដាក់ពាក្យទៅតុលាការសុំកែឈ្មោះ ខែឆ្នាំកំណើត។
-សញ្ញាបត្របាក់ឌុបបេក្ខជន ២ រូប គ្មានឯកសារគល់បញ្ជីនៅក្រសួងអប់រំ យុវជន និងកីឡា តែ អ.ប.ព. ស្រាវជ្រាវដល់ខេត្ត បានរកឃើញបេក្ខជន ២ រូបនោះ ពិតជាបានប្រឡងជាប់បាក់ឌុបមែន។
-បេក្ខជន ១ រូប មិនព្រមចូលមកបំភ្លឺនៅ អ.ប.ព.តាមការកោះហៅ (អ.ប.ព. នឹងនាំខ្លួនមកស្តាប់ចម្លើយ) ។
-សញ្ញាបត្របាក់ឌុបបេក្ខជន ១ រូប កំពុងបន្តស្រាវជ្រាវ ។
ជាមួយគ្នានោះដែរ ACU បានចូលរួមសង្កេតការណ៍ចាប់ពីដំណាក់កាលដាក់ពាក្យប្រឡង ថ្នាក់ជាតិថ្នាក់ឆ្នាំមូលដ្ឋានសម្រាប់កម្រិតបរិញ្ញាបត្រ (ជំនាញវេជ្ជបណ្ឌិត ជំនាញពេទ្យធ្មេញ ជំនាញឱសថ ជំនាញឆ្មប ជំនាញគិលានុបដ្ឋាក ជំនាញសុខភាពសាធារណៈ ជំនាញមន្ទីរពិសោធន៍ និងជំនាញព្យាបាលដោយចលនា) ។
លោក ច័ន្ទ ម៉ារ៉ាដូណា ប្រធាននាយកដ្ឋានបច្ចេកទេស និងកោសលវិច័យ ឱ្យដឹងថា បេក្ខជនដាក់ពាក្យសុំប្រឡងសរុបមានចំនួន ១២ ៩៣៤ នាក់ (ស្រី ៦៤,៦%) ហើយឯកសាររបស់បេក្ខជន ទាំងអស់ត្រូវបានបញ្ជូនទៅលោកជំទាវ កែម សុភាព ឧបការី អ.ប.ព. ប្រធានក្រុមស៊ើបអង្កេតពិសេស ពិនិត្យ។ សញ្ញាបត្រមធ្យមសិក្សាទុតិយភូមិ (បាក់ឌុប) ចំនួន ១២,៧៩០សន្លឹក ត្រូវបានក្រុមពិសេសនេះពិនិត្យរួចជាស្រេចថាជាឯកសារត្រឹមត្រូវ (នៅសល់តែ ១២៥ សន្លឹកទៀត ដែលកំពុងបន្តពិនិត្យ) ។
ក្រៅពីនោះ ក្រុមពិសេសនេះ បានរកឃើញបេក្ខជន ៤ រូប បានប្រើប្រាស់ឯកសារបាក់ឌុបក្លែងក្លាយ ហើយកំពុងស្ថិតក្នុងដំណាក់កាលកសាងនីតិវិធីបញ្ជូនទៅតុលាការ ។
ឯកសារបាក់ឌុប ដែល អ.ប.ព. បានកោសលវិច័យរួចរាល់ មានសញ្ញាបត្របាក់ឌុប ដែលប្រឡងជាប់តាំងពីឆ្នាំ២០១៤ ដល់ឆ្នាំ២០២៦។ ចំណុចពិសេសមួយ ដែលរកឃើញ គឺមានបេក្ខជន ១ រូប ជាប់បាក់ឌុបពិតប្រាកដមែន ហើយបាននិទ្ទេស B ពេលមានអាយុ ១៣ ឆ្នាំ (អ.ប.ព. សូមកោតសរសើរសមត្ថភាពរៀនសូត្ររបស់បេក្ខជន) ៕
ចែករំលែកព័តមាននេះ