ខេត្តក្រចេះ ៖ ប្រជាពលរដ្ឋមួយចំនួន បានលើកឡើងពីភាពមិនស្មើភាពក្នុងការអនុវត្តច្បាប់របស់អាជ្ញាធរ ក្នុងប្រតិបត្តិការបង្ក្រាបទីតាំងធ្វើអាជីវកម្មរ៉ែមាសខុសច្បាប់ នៅភូមិរវាងជ័យ ឃុំស្វាយជ្រះ ស្រុកស្នួល ខេត្តក្រចេះ ដោយអះអាងថា កម្លាំងសមត្ថកិច្ចបានចុះអនុវត្តច្បាប់លើទីតាំងរបស់ប្រជាពលរដ្ឋក្រីក្រ ប៉ុន្តែទីតាំងមួយផ្សេងទៀត ដែលស្ថិតនៅក្បែរគ្នា ចម្ងាយប្រមាណជិត ១គីឡូម៉ែត្រ និងត្រូវបានអះអាងថា មានសកម្មភាពស្រដៀងគ្នា បែរជាមិនទាន់មានការចុះបង្ក្រាប ។
លោក ទី ធា ប្រជាពលរដ្ឋម្នាក់ ដែលពាក់ព័ន្ធនឹងករណីនេះ បានប្រាប់កោះសន្តិភាពនៅរសៀលថ្ងៃទី២៨ ខែតុលា ឆ្នាំ២០២៦ ថា លោក និងប្រជាពលរដ្ឋមួយចំនួនទៀត បានទទួលស្គាល់ និងយល់ព្រមរុះរើទីតាំង ព្រមទាំងសម្ភារៈបម្រើឱ្យសកម្មភាពធ្វើរ៉ែមាស បន្ទាប់ពីកម្លាំងអាជ្ញាធរចុះណែនាំ និងអប់រំ ។
លោកបានប្រាប់បន្តថា ក្រោយការរុះរើ គ្រឿងម៉ាស៊ីន និងសម្ភារៈមួយចំនួន ត្រូវបានយកទៅរក្សាទុកនៅក្បាលភូមិ។ ប៉ុន្តែជាបន្តបន្ទាប់ កម្លាំងសមត្ថកិច្ចបានចុះដកហូតម៉ាស៊ីនចំនួន ២ គ្រឿង និងអេស្កាវ៉ាទ័រចំនួន ១ គ្រឿង ។
តាមការរៀបរាប់របស់លោក ទី ធា ក្នុងពេលចុះប្រតិបត្តិការនោះ ក៏មានវត្តមានលោក អ៊ុក សាវុន ហៅ ធា មន្ត្រីការិយាល័យសេដ្ឋកិច្ចសាលាខេត្តក្រចេះ ផងដែរ ។
ទោះជាយ៉ាងណា លោកបានលើកឡើងថា ទីតាំងមួយទៀតដែលស្ថិតនៅចម្ងាយប្រមាណជិត ១គីឡូម៉ែត្រ និងដែលលោកអះអាងថាជារបស់សាច់ញាតិរបស់មន្ត្រីរូបនេះ ក៏មានសកម្មភាពធ្វើរ៉ែមាសស្រដៀងគ្នា ប៉ុន្តែមិនឃើញមានកម្លាំងសមត្ថកិច្ចចុះទៅអនុវត្តច្បាប់នោះទេ ។
ពាក់ព័ន្ធនឹងការចោទប្រកាន់ខាងលើ លោក អ៊ុក សាវុន មន្ត្រីការិយាល័យសេដ្ឋកិច្ចសាលាខេត្តក្រចេះ បានបង្វែរសំណួររបស់អ្នកសារព័ត៌មានកោះសន្តិភាព ឱ្យសាកសួរទៅលោកអភិបាលស្រុកស្នួល និងមន្ទីររ៉ែ និងថាមពលខេត្តក្រចេះ។ លោកក៏បានបង្ហាញបំណងចង់ជួបផ្ទាល់ ដើម្បីធ្វើការបកស្រាយឱ្យបានច្បាស់លាស់ ជុំវិញបញ្ហានេះ ។
ជាមួយគ្នានេះ លោក សាម ណាល អភិបាលស្រុកស្នួល នៃខេត្តក្រចេះ បានបញ្ជាក់ពីជំហររបស់រដ្ឋបាលស្រុកថា នឹងបន្តចុះបង្ក្រាបសកម្មភាពធ្វើអាជីវកម្មរ៉ែខុសច្បាប់ ដោយមិនប្រកាន់បុគ្គល ឬខ្សែស្រឡាយឡើយ ។ លោកថា កាលពីកំឡុងសមត្ថកិច្ចចុះបង្ក្រាបជំនាញបានធ្វើរបាយការណ៍ នៅទីតាំងផ្ទាល់រហូតដល់ម៉ោងជាង៧យប់ ។
លោកអភិបាលស្រុក បានមានប្រសាសន៍ថា លោកបានទទួលព័ត៌មានមួយចំនួន ពាក់ព័ន្ធនឹងការលើកឡើងរបស់ប្រជាពលរដ្ឋ ដែលអះអាងថា មានទីតាំងធ្វើរ៉ែផ្សេងទៀតក្បែរនោះ ហើយពាក់ព័ន្ធករណីខាងលើ លោកនឹងទាក់ទងទៅមន្ទីររ៉ែ និងថាមពល ដើម្បីសហការចុះពិនិត្យ និងអនុវត្តច្បាប់តាមសមត្ថកិច្ចរៀងៗខ្លួន ។
លោកបានបញ្ជាក់ថា មិនថា អ្នកណា ខ្សែណាទេ ឱ្យតែធ្វើខុសច្បាប់ លោកត្រូវតែបង្ក្រាប។ លោកបន្តថា កន្លងមក អាជ្ញាធរបានចុះណែនាំ និងអប់រំប្រជាពលរដ្ឋរួចហើយ ប៉ុន្តែប្រសិនបើនៅតែបន្តសកម្មភាពខុសច្បាប់ អាជ្ញាធរនឹងបន្តចាត់វិធានការតាមច្បាប់ ។
លោក សាម ណាល ក៏បានទទួលស្គាល់ថា ប្រជាពលរដ្ឋមួយចំនួនមានជីវភាពខ្វះខាត ប៉ុន្តែអាជ្ញាធរមិនអាចលើកទឹកចិត្តឱ្យប្រជាពលរដ្ឋប្រកបរបរដែលផ្ទុយនឹងច្បាប់បានឡើយ។ លោកចង់ឱ្យប្រជាពលរដ្ឋ ងាកទៅប្រកបមុខរបរស្របច្បាប់ ដើម្បីជៀសវាងការខាត
បង់ និងការប្រឈមនឹងវិធានការផ្លូវច្បាប់ ។
ចំពោះការលើកឡើងថា អាចមានមន្ត្រីនៅពីក្រោយ ឬជួយការពារសកម្មភាពធ្វើរ៉ែមាសខុសច្បាប់ លោកអភិបាលស្រុកបានបញ្ជាក់ថា ប្រសិនបើមានព័ត៌មានពាក់ព័ន្ធ លោកនឹងរាយការណ៍ជូនរដ្ឋបាលខេត្ត ដើម្បីពិនិត្យ និងដោះស្រាយតាមនីតិវិធី ។
ដោយឡែក លោក រ័ត្ន តុលា ប្រធានមន្ទីររ៉ែ និងថាមពលខេត្តក្រចេះ អ្នកសារព័ត៌មានកោះសន្តិភាពបានព្យាយាមទាក់ទងតាមទូរសព្ទជាច្រើនដង នៅរសៀលថ្ងៃទី២៨ ខែតុលា ឆ្នាំ២០២៦ ដើម្បីសុំការបំភ្លឺពាក់ព័ន្ធនឹងករណីនេះ ប៉ុន្តែមិនអាចទាក់ទងសុំការឆ្លើយតបពីលោកបានទេ ។
ករណីនេះត្រូវការការចុះពិនិត្យ និងផ្ទៀងផ្ទាត់បន្ថែមពីសំណាក់អាជ្ញាធរពាក់ព័ន្ធ ដើម្បីបញ្ជាក់ថា តើទីតាំងទាំងពីរមានសកម្មភាពខុសច្បាប់ដូចគ្នា ឬយ៉ាងណា ? និងថាតើការអនុវត្តច្បាប់បានប្រព្រឹត្តទៅដោយស្មើភាពដែរឬទេ ? ការបំភ្លឺពីគ្រប់ភាគី និងលទ្ធផលនៃការត្រួតពិនិត្យជាក់ស្តែង នឹងជួយធានាឱ្យការអនុវត្តច្បាប់មានតម្លាភាព និងបង្កើនទំនុកចិត្តរបស់ប្រជាពលរដ្ឋ លើអាជ្ញាធរ ៕
ចែករំលែកព័តមាននេះ