អភិបាលរងខេត្តក្រចេះ ជូនដំណើរប្រជាពលរដ្ឋ ៤៤គ្រួសារ ទៅកាន់ទីលំនៅថ្មីក្នុងខេត្តស្ទឹងត្រែង ក្រោមកម្មវិធីអភិវឌ្ឍន៍ចីរភាព
- ក្រចេះ
ខេត្តក្រចេះ ៖ នាព្រឹកថ្ងៃទី២៩ ខែតុលា ឆ្នាំ២០២៦ លោក ហេង សុថា និងលោក ម៉ែន វណ្ណា អភិបាលរងនៃគណៈអភិបាលខេត្តក្រចេះ តំណាងឱ្យលោក វ៉ា ថន អភិបាលខេត្ត បានអញ្ជើញជាអធិបតីក្នុងពិធីសំណេះសំណាល និងជូនដំណើរប្រជាពលរដ្ឋសរុបចំនួន ៤៤គ្រួសារ (ស្មើនឹង ១៣៨នាក់) ធ្វើដំណើរសំដៅទៅកាន់ទីលំនៅថ្មី ស្ថិតនៅក្នុងស្រុកសេសាន ខេត្តស្ទឹងត្រែង។
ការផ្លាស់ប្តូរទីលំនៅរបស់ប្រជាពលរដ្ឋនាពេលនេះ គឺជាផ្លែផ្កានៃការអនុវត្តកម្មវិធី «ផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព» (ផ.ក.អ) ដែលជាគំនិតផ្តួចផ្តើមយុទ្ធសាស្ត្រក្នុងការបែងចែកដីធ្លី និងសង់ផ្ទះជូនប្រជាពលរដ្ឋដែលខ្វះខាតពិតប្រាកដ។
នៅក្នុងឱកាសនោះ ថ្នាក់ដឹកនាំខេត្តបានគូសបញ្ជាក់ថា កម្មវិធីនេះមិនត្រឹមតែផ្តោតលើការដោះស្រាយបញ្ហាដីធ្លី និងជម្រកស្នាក់នៅដើម្បីលើកកម្ពស់កម្រិតជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងប៉ុណ្ណោះទេ ប៉ុន្តែថែមទាំងមានគោលដៅយុទ្ធសាស្ត្រចម្បងក្នុងការផ្សារភ្ជាប់កិច្ចការពារធនធានធម្មជាតិ និងព្រៃឈើ ទៅនឹងការអភិវឌ្ឍសហគមន៍មូលដ្ឋានប្រកបដោយចីរភាព និងបរិយាបន្ន។
តាមរយៈការទទួលបានដីធ្លី និងផ្ទះសម្បែងស្របច្បាប់នៅទីតាំងថ្មីនេះ ប្រជាពលរដ្ឋទាំង ៤៤គ្រួសារ នឹងមានឱកាសបង្កើតមុខរបរ បង្កបង្កើនផលកសិកម្ម និងចូលរួមយ៉ាងសកម្មជាមួយអាជ្ញាធរក្នុងការការពារព្រៃឈើនៅតំបន់ជុំវិញ ដើម្បីបង្កើតជាដែនជម្រកសុវត្ថិភាពទាំងសម្រាប់មនុស្ស និងបរិស្ថាន៕
ចែករំលែកព័តមាននេះ