បង្ក្រាបករណីដឹកលៀសខុសច្បាប់ជាង ៨តោន នៅឆ្នុកទ្រូ
- កំពង់ឆ្នាំង
ខេត្តកំពង់ឆ្នាំង ៖ កម្លាំងសមត្ថកិច្ចចម្រុះបង្ក្រាបបទល្មើសនេសាទប្រចាំគោលដៅឆ្នុកទ្រូ ចំនួន ១៨នាក់ ក្រោមការដឹកនាំផ្ទាល់របស់លោកវរសេនីយឯក ប៊ី រស្មីចន្នី បានចុះត្រួតពិនិត្យសកម្មភាពដឹកជញ្ជូនផលលៀស និងធ្វើការបង្ក្រាបជាច្រើនតោន ។
ប្រតិបត្តិការខាងលើនេះបានធ្វើឡើងកាលពី ថ្ងៃទី២៧ ខែតុលា ឆ្នាំ២០២៦ ស្ថិតនៅចំណុចចុងផែឆ្នុកទ្រូ ឃុំឆ្នុកទ្រូ ស្រុកបរិបូរណ៌ ខេត្តកំពង់ឆ្នាំង ។ ជាលទ្ធផល កម្លាំងសមត្ថកិច្ចបានរកឃើញនិងទប់ស្កាត់ការដឹកជញ្ជូន លៀសខុសច្បាប់ (ទំហំតូចជាង ២.៥ហ៊ុន ដែលច្បាប់ហាមឃាត់ និងជាប្រភេទសម្រាប់យកទៅកែច្នៃធ្វើចំណីសត្វនាំចេញទៅវៀតណាម) សរុបប្រហែលជាង ៨តោន ក្នុងនោះមានលៀសច្រកការុងរួចចំនួន ៦០ការុង និងលៀសមិនទាន់ច្រក់ចំនួន ៤ទូក ដែលត្រៀមឡើងរថយន្តដឹកបន្ត។
បច្ចុប្បន្ន វត្ថុតាង (លៀសខុសច្បាប់) ត្រូវបានដកហូតយកទៅលែងចូលបឹងទន្លេសាបវិញ នៅចំណុចភូមិសាស្ត្រឆ្នុកទ្រូ ចំណែកមធ្យោបាយល្មើសទូកដឹកលៀសចំនួន ៤គ្រឿង ត្រូវបានដកហូតរក្សាទុកនៅស្នាក់ការកងពល៥២ ឆ្នុកទ្រូ។ ដោយឡែកជនសង្ស័យម្ចាស់ទូកចំនួន ៤នាក់ និងម្ចាស់រថយន្តចំនួន២នាក់ ត្រូវបានសមត្ថកិច្ចធ្វើកិច្ចសន្យាអប់រំ និងអនុញ្ញាតឱ្យវិលត្រឡប់ទៅលំនៅឋានវិញ ៕
ចែករំលែកព័តមាននេះ