រាជធានីភ្នំពេញ ៖ មន្ត្រីនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី០៨ ខែធ្នូ ឆ្នាំ២០២២នេះ បានបញ្ចេញវីដេអូជាសំឡេងក្នុងកិច្ចសម្ចាសន៍របស់ខ្លួន ជាមួយអ្នកគ្រូពេទ្យ ជាម្ចាស់គ្លីនិកឯកជនមួយកន្លែង ដោយបង្ហាញពីភាពស្អាតស្អំ ថា មន្ត្រីគរបាលចរាចរណ៍ មិនបានបង្ខំឲ្យស្ត្រីរងគ្រោះផ្ដិតមេដៃ ក្នុងរឿងទទួលយកសំណង ២,៥០០ដុល្លារ ពីជនបង្កគ្រោះថ្នាក់ចរាចរណ៍ កាលពីយប់ថ្ងៃទី០៥ ខែធ្នូ លើស្ពានជ្រោយចង្វារ នោះទេ ។
វីដេអូជាសំឡេងបានអោយដឹងថា អ្នកគ្រូពេទ្យដែលជាម្ចាស់គ្លីនិកពន្លឺ ដែលជនរងគ្រោះឈ្មោះ ម៉ុច ស្រីល័ក្ខ បានទៅសម្រាកព្យាបាលរបួស បន្ទាប់ពីរងគ្រោះក្នុងហេតុការណ៍គ្រោះថ្នាក់ចរាចរណ៍ បាននិយាយថា អ្នករបួសមិនបានសន្លប់ដូចដែលលើកឡើងប្រាប់សារព័ត៌មាន TVFB នោះទេ គឺគាត់មានស្មារតីគ្រប់គ្រាន់ និងបានដើរចូលមកពិនិត្យព្យាបាលដោយខ្លួនឯង មិនមានការសែងចូលនោះទេ មានន័យថា ជនរងគ្រោះត្រឹមរងរបួសភ្នែក ក្បាល និងត្រង់ក ។ ម្យ៉ាងទៀត ក៏មានមនុស្សដែលស្គាល់គ្នា ចំនួន ២នាក់ នៅជាមួយជនរងគ្រោះ ជាប់រហូត ហើយក៏គ្មានហេតុផលណាមួយ ដែលសមត្ថកិច្ច ត្រូវចាប់ដៃជនរងគ្រោះមកផ្តិតមេដៃ នោះទេ ។
មន្ត្រីនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចេញមកទាមទាររកភាពស្អាតស្អំ ក្នុងរឿងផ្ដិតមេដៃខាងលើនេះ បន្ទាប់ពីភាគីខាងស្ត្រីរងគ្រោះក្នុងករណីគ្រោះថ្នាក់ចរាចរណ៍មួយនៅលើស្ពានជ្រោយចង្វារ អះអាងថា គាត់ពិតជាមិនបានផ្ដិតមេដៃ ទទួលយកសំណង ២,៥០០ដុល្លារ ដើម្បីបញ្ចប់រឿងទេ ដោយថា មានគេកាន់ដៃគាត់ទៅផ្ដិតមេដៃ លើលិខិត ទាំងកំពុងសន្លប់បាត់បង់ស្មារតី ។
នេះជាលីង ៖ ការបកស្រាយអ្នកម្ដាយរបស់ក្មេងតូចជុំវិញករណីសំណង២,៥០០ដុល្លារ
សូមជម្រាបថា ស្នងការដ្ឋាននគរបាលរាជធានីភ្នំពេញ កាលពីថ្ងៃទី៦ ធ្នូ ២០២២ បានបង្ហោះខ្លឹមសារ ដោយភ្ជាប់នូវកិច្ចព្រមព្រៀងទទួលយកសំណង និងលិខិតដកពាក្យបណ្ដឹងរបស់ម្ដាយជនរងគ្រោះ ដោយថា ភាគីទាំងអស់បានឯកភាពគ្នាលើសំណងចំនួន២,៥០០ដុល្លារ ដើម្បីបញ្ចប់រឿង ។
ករណីគ្រោះថ្នាក់ចរាចរណ៍ខាងលើ កើតឡើងកាលពីវេលាម៉ោង០២និង១០នាទីរំលងអធ្រាត្រឈានចូលថ្ងៃចន្ទ ទី០៥ ខែធ្នូ ឆ្នាំ២០២២ ត្រង់ចំណុចមុខបង្គោលភ្លើងទី៤ ខាងកើត នៅលើស្ពានជ្រោយចង្វារចាស់ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ហេតុការណ៍នេះ បានកើតឡើងរវាងរថយន្តម៉ាក LEXUS NX200t ពណ៌ស ពាក់ផ្លាកលេខ ភ្នំពេញ 2BB-9989 បានធ្វើដំណើរតាមបណ្តោយស្ពានជ្រោយចង្វារចាស់ ទិសដៅពីលិចទៅកើត លុះដល់ចំណុចកើតហេតុខាងលើ បានបុកពីក្រោយម៉ូតូមួយគ្រឿង ដែលធ្វើដំណើរស្របទិសគ្នា ម៉ាក HONDA SCOOPY ពណ៌ស ពាក់ផ្លាកលេខ កណ្តាល 1B-9978 បន្ទាប់មក រថយន្តបើករត់គេចពីកន្លែងកើតទៅដល់ផ្លូវកែវចិន្តា ក្នុងសង្កាត់ជ្រោយចង្វារ ខណ្ឌជ្រោយចង្វារ ទើបសមត្ថកិច្ចខណ្ឌជ្រោយចង្វារ ចាប់ឃាត់បានទាំងរថយន្ត និងអ្នកបើកបរ នាំខ្លួនយកមកការិយាល័យចរាចរណ៍ផ្លូវគោក ។
ភាគីរថយន្តជាជនបង្ក ៖ LEXUS NX200t ពណ៌ស ពាក់ផ្លាកលេខ ភ្នំពេញ 2BB-9989 បើកបរដោយឈ្មោះ សោម ណូរីទីឃា ភេទប្រុស អាយុ១៩ឆ្នាំ មានទីលំនៅផ្ទះលេខ៥៣ ផ្លូវកែវចិន្តា ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ (ឃាត់ខ្លួនកាលពីថ្ងៃ០៥ ខែធ្នូ ឆ្នាំ២០២២ ) ។
ភាគីម៉ូតូ ជាជនរងគ្រោះ ៖ HONDA SCOOPY ពណ៌ស ពាក់ផ្លាកលេខ កណ្តាល 1B-9978 បើកបរដោយឈ្មោះ ហុង រត្នថា ហៅស្វិត ភេទប្រុស អាយុ៣៣ឆ្នាំ មុខរបររើសអេតចាយ (រងរបួសធ្ងន់សម្រាកព្យាបាលនៅមន្ទីរពេទ្យមិត្តភាពកម្ពុជា-ចិនព្រះកុសុមៈ) រួមដំណើរជាមួយ មានគ្នា០២នាក់ ទី១-ឈ្មោះ មុច សុខឡេង ភេទប្រុស អាយុ៦០ថ្ងៃ (រងរបួសធ្ងន់កំពុងសម្រាកព្យាបាលនៅមន្ទីរពេទ្យគន្ធបុប្ផា) និងទី២-ឈ្មោះ មុច ស្រីល័ក្ខ ភេទស្រី អាយុ៣១ឆ្នាំ មុខរបរ រើសអេតចាយ (រងរបួសធ្ងន់សម្រាកព្យាបាលនៅគ្លីនិកពន្លឺ) អ្នកទាំងបីស្នាក់នៅផ្ទះជួលលេខ២២៥ ផ្លូវលេខ៨៦ ភូមិ២២ សង្កាត់ស្រះចក ខណ្ឌដូនពេញ រាជធានីភ្នំពេញ ។
សូមបញ្ជាក់ថា ក្នុងករណីគ្រោះថ្នាក់នេះ ភាគីទាំងអស់ (ជនបង្កនិងជនរងគ្រោះ) បានឯកភាពគ្នាសុំបញ្ចប់សំណងរដ្ឋប្បវេណីចំនួន ២,៥០០ដុល្លារ ដោយមិនមានការបង្ខិតបង្ខំ នៅការិយាល័យនគរបាលចរាចរណ៍ផ្លូវគោក កាលពីម៉ោង២និង៥០នាទីរសៀលថ្ងៃទី៥ ខែធ្នូ ឆ្នាំ២០២២ រួចរាល់ហើយ (សូមជូនភ្ជាប់នូវកិច្ចព្រមព្រៀងបញ្ចប់សំណង និងលិខិតដកពាក្យបណ្តឹងរបស់ម្តាយជនរងគ្រោះ) ។
ម្យ៉ាងវិញទៀត ដោយផ្នែកតាមច្បាប់ស្តីពីចរាចរណ៍ផ្លូវគោក ការវាស់វែងពិនិត្យកន្លែងកើតហេតុ និងស្លាកស្នាមយានយន្ត មន្ត្រីជំនាញសន្និដ្ឋានបានថា មូលហេតុបណ្តាលឲ្យមានគ្រោះថ្នាក់គឺ ៖ អ្នកបើកបររថយន្ត បើកបរលឿនខ្វះការប្រុងប្រយ័ត្ន និងបើកបរស្ថិតក្នុងស្ថានភាពស្រវឹង មានអត្រាជាតិអាល់កុល០.៥៣ Mg/L និងត្រូវបានធ្វើការផាកពិន័យចំនួន ២លានរៀល តាមមាត្រា១០ថ្មី នៃអនុក្រឹត្យលេខ៣៩អនក្រ.បក ចុះថ្ងៃទី១៧ ខែមីនា ឆ្នាំ២០២០ ។
ទោះបីជាមានការបញ្ចប់សំណងរដ្ឋប្បវេណីយ៉ាងណាក៏ដោយ ប៉ុន្តែករណីគ្រោះថ្នាក់នេះ នៅជាប់បណ្តឹងអាជ្ញា ហើយកម្លាំងជំនាញកំពុងក៏សាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់ ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា រាល់ការអនុវត្តរបស់មន្ត្រីជំនាញ គឺអនុវត្តទៅតាមច្បាប់ស្តីពីចរាចរណ៍ផ្លូវគោក ដោយមានការពិនិត្យវាស់វែង ឃាត់ខ្លួនជនបង្ក និងរថយន្តមករក្សាទុក វាស់សារជាតិស្រវឹង ដើម្បីពិន័យតាមច្បាប់ និងរៀបចំសំណុំរឿងបញ្ជូនបន្តទៅតុលាការ ។ល។ ចំណែកឯភាគីទាំង២ យល់ព្រមឯកភាពទទួលសំណង ជារឿងរបស់ភាគីបង្ក និងជនរងគ្រោះ ៕
«ទោះជីវិត៣នាក់ ផ្តល់សំណង២,៥០០ដុល្លារក្តី ក៏សមត្ថកិច្ចបញ្ជូនជនបង្កទៅតុលាការ» ។
សូមជម្រាបឡើងវិញ «ក្រុមមេធាវីសម្ដេចតេជោ នឹងជួយគ្រួសារជនរងគ្រោះតាមផ្លូវច្បាប់ ខណៈទារកនៅមានសង្ឃឹម» ។
ខាងក្រោមនេះ វីដេអូជាសំឡេងក្នុងកិច្ចសម្ចាសន៍របស់ប៉ូលិសចរាចរណ៍រាជធានីភ្នំពេញ ជាមួយអ្នកគ្រូពេទ្យ ជាម្ចាស់គ្លីនិកឯកជនមួយកន្លែង ៖
ចែករំលែកព័តមាននេះ