មនុស្សជាច្រើននាក់បានស្លា.ប់ និងរងរបួសនៅក្នុងករណីអគ្គិភ័យឆាបឆេះកាស៊ីណូជិតមាត់ច្រកទ្វារព្រំដែនអន្តរជាតិប៉ោយប៉ែត ខណៈកាស៊ីណូចំនួន២ គឺ
ខេត្តបន្ទាយមានជ័យ ៖ មនុស្សជាច្រើននាក់បានស្លា.ប់ និងរងរបួសនៅក្នុងករណីអគ្គិភ័យឆាបឆេះកាស៊ីណូជិតមាត់ច្រកទ្វារព្រំដែនអន្តរជាតិប៉ោយប៉ែត ខណៈកាស៊ីណូចំនួន២ គឺក្រែនដាយម៉ឹនស៊ីធី និងប៉ោយប៉ែតរីសត ស្ទើរតែក្លាយជាផេះផង់ទៅហើយ។
ករណីអគ្គិភ័យខាងលើនេះ បានកើតឡើងតាំងពីវេលាជិតម៉ោង១២យប់កណ្តាលអាធ្រាត្រថ្ងៃទី២៨ ខែធ្នូ ឈានដល់ម៉ោងជិត១២ថ្ងៃត្រង់ ថ្ងៃទី២៩ ខែធ្នូ ឆ្នាំ២០២២ គឺព្រះអគ្គីនៅបន្តឆាបឆេះដដែល។ ហើយអាជ្ញាធរ និងសមត្ថកិច្ចខេត្ត ជាប់ព្រំដែនខ្មែរ-ថៃ ស្ថិតក្នុងខេត្តបន្ទាយមានជ័យ និងខេត្តស្រះកែវ បានដុតដៃដុតជើងអន្តរាគមន៍ហៅរថយន្តពន្លត់អគ្គិភ័យ និងរថយន្តសង្គ្រោះជាច្រើនគ្រឿងចុះដល់កន្លែងកើតហេតុ ដើម្បីជួយបាញ់ទឹកពន្លត់ និងសង្គ្រោះដល់អ្នករងរបួសផងដែរ។រថយន្តពន្លត់អគ្គិភ័យខ្មែរ-ថៃរាប់សិបគ្រឿង បានអន្តរាគមន៍បាញ់ទឹកពន្លត់ ខណៈរថយន្តសង្គ្រោះបន្ទាន់របស់ថៃជាច្រើនគ្រឿង បានមកដល់ និងចតត្រៀបត្រានៅមាត់ច្រកទ្វារព្រំដែនអន្តរជាតិប៉ោយប៉ែត។
ដោយសារការបារម្ភ និងយកចិត្តទុកដាក់លើបញ្ហានេះ នៅព្រឹកថ្ងៃទី២៩ ខែធ្នូ ឆ្នាំ២០២២ គេឃើញវត្តមានថ្នាក់ដឹកនាំរាជរដ្ឋាភិបាល គឺសម្តេចក្រឡាហោម ស ខេង, នាយឧត្តមសេនីយ៍ ខេង សុមេធ៍ និងថ្នាក់ដឹកនាំជាច្រើនទៀត បានចុះដល់កន្លែងកើតហេតុ។ ហើយកាស៊ីណូដែលរងការឆាបឆេះទាំង២ខាងលើ គឺស្ថិតនៅអមសងខាងផ្លូវឆ្ពោះទៅមាត់ច្រកទ្វារអន្តរជាតិប៉ោយប៉ែត។
គួរបញ្ជាក់ថា កាស៊ីណូក្រែនដាយម៉ឹនស៊ីធី គឺមាន២អគារ ដោយអគារទី១ ជាប់នឹងដងផ្លូវ ស្ថិតនៅខាងត្បូងផ្លូវជាតិលេខ៥ ក្នុងភូមិប៉ោយប៉ែត សង្កាត់អូរជ្រៅ ហើយអគារទី១នេះ មានកំពស់៥ជាន់រងការឆាបឆេះតាំងពីជាន់ក្រោមរហូតជាន់លើ ខណៈអគារមួយទៀត កំពស់១៨ជាន់ គេសង្ស័យថា កំពុងរងការឆាបឆេះជាបណ្តើៗផងដែរ។ ដោយឡែកកាស៊ីណូប៉ោយប៉ែតរីសត នៅខាងជើងផ្លូវចូលទៅច្រកទ្វារព្រំដែន ស្ថិតក្នុងភូមិក្បាលស្ពាន១ សង្កាត់អូរជ្រៅ ហើយអគារកាស៊ីណូមួយនេះ មានកំពស់៧ជាន់។ ចំណែកអគារដែលស្របដងផ្លូវ ក៏ត្រូវបានឆាបឆេះខ្ទេចផង ខណៈអគារដែលសណ្តូកទៅទិសខាងជើងនៅកំពុងឆាបឆេះនៅឡើយ។ រីឯស្ពានឆ្លងផ្លូវរបស់កាស៊ីណូទាំង២ខាងលើ រងការឆាបឆេះខ្ទេចគ្មានសល់ ខណៈអគារកាស៊ីណូប៉ោយប៉ែតរីសត ដែលស្របដងផ្លូវបានទ្រេត និងផ្អៀងទៅរកដងផ្លូវគួរឲ្យខ្លាចផងដែរ។
បើតាមប្រភពពីកន្លែងកើតហេតុបានឱ្យដឹងថា ក្នុងហេតុការណ៍ខាងលើ ដំបូងឡើយ មានមនុស្សចំនួន៣នាក់បានស្លា.ប់ភ្លាមៗ ខណៈពេលលោ.តចុះពីលើអគារកាស៊ីណូក្រែនដាយម៉ឹនស៊ីធី និងមួយចំនួនទៀតរងរបួស ហើយត្រូវបានគេដឹកទៅសង្គ្រោះទាំងយប់។
តាមប្រភពពីក្រុមសង្គ្រោះរបស់ថៃ ដែលចុះពីអគារកាស៊ីណូក្រែន បាននិយាយថា មនុស្ស២នាក់បានស្លា.ប់ទើរនៅលើដំបូលសំយ៉ាបអគារ។ ចំណែកប្រភពពីសមត្ថកិច្ចកម្ពុជា ដែលស្និទ្ធនឹងក្រុមសង្គ្រោះរបស់ថៃ ក៏បាននិយាយដែរថា មនុស្សយ៉ាងតិច៥៣នាក់បានស្លា.ប់ និងរបួសនៅអគារកាស៊ីណូក្រែនដាយម៉ឹនស៊ីធី។ ប្រភពដដែលបន្តថា នេះគ្រាន់តែជារបាយការណ៍រុករកត្រួសៗមិនទាន់សព្វជ្រុងជ្រោយនៅឡើយទេ។
ចំណែកលោក ង៉ោ ម៉េងជ្រួន អភិបាលរងខេត្តបន្ទាយមានជ័យ បានប្រាប់អ្នកយកព័ត៌មានដែរថា គ្រោះអគ្គិភ័យនេះមានមនុស្សចំនួន១៦នាក់បានស្លា.ប់ និង៥៨នាក់ផ្សេងទៀតបានរងរបួស ប៉ុន្តែនេះជាការរុករកគិតត្រឹមម៉ោង១១និង៤០នាទីព្រឹក ថ្ងៃទី២៩ ខែធ្នូ ឆ្នាំ២០២២នេះតែប៉ុណ្ណោះ។ ហើយសាកស.ពជនរងគ្រោះត្រូវបានគេដឹកបញ្ជូនតាមរថយន្តសង្គ្រោះរបស់ថៃជាបន្តបន្ទាប់ ដើម្បីយកទៅតម្កល់នៅវត្តឃោស្ថារាម ហៅវត្តស្រះត្រាច ប៉ុន្តែគេមិនអនុញ្ញាតិឲ្យអ្នកយកព័ត៌មានចូលផ្តិតយករូបភាពឡើយ។
គួរបញ្ជាក់ផងដែរថា ដោយសារគ្រោះអគ្គិភ័យឆាបឆេះកាស៊ីណូទាំងសងខាងផ្លូវឆ្ពោះទៅមាត់ច្រកទ្វារព្រំដែនអន្តរជាតិប៉ោយប៉ែត និងម្យ៉ាងដោយសារអគារកាស៊ីណូប៉ោយប៉ែតរីសត ដែលរងការឆាបឆេះខ្ទេចនោះបានទ្រេត និងផ្អៀងមករកដងផ្លូវ ទើបអាជ្ញាធរបានសម្រេចបិទការធ្វើចរាចរណ៍ជាបណ្តោះអាសន្ន ចំពោះរថយន្តតូចធំទាំងខ្មែរ និងថៃ ព្រោះខ្លាចមានហានិភ័យណាមួយកើតឡើងជាយថាហេតុ ប៉ុន្តែអ្នកដំណើរថ្មើជើងទាំងភ្ញៀវជាតិ និងអន្តរជាតិនៅតែបន្តធ្វើចរាចរណ៍ឆ្លងកាត់ព្រំដែនទៅមកប្រទេសថៃបានជាធម្មតា ដោយធ្វើដំណើរវៀងទៅមកតាមផ្លូវកាស៊ីណូរ៉បមាត់អូរព្រំដែន។
គួររំលឹកថា ៖ អណ្ដាតភ្លើងឆាបឆេះកាស៊ីណូពីមួយទៅមួយយ៉ាងសន្ធោសន្ធោផ្អើលជាយដែន(វីដេអូ)។
ស្ថានភាពអគ្គិភ័យឆាបឆេះកាស៊ីណូនៅក្រុងប៉ោយប៉ែតគិតត្រឹមព្រឹកនេះ(វីដេអូ)៕
ចែករំលែកព័តមាននេះ