ខេត្តត្បូងឃ្មុំ ៖ មានករណីបាញ់ប្រហារ បណ្តាលឱ្យគូដណ្ដឹង២នាក់ បានស្លាប់ក្នុងថ្លុកឈាមយ៉ាងអាណោចអាធ័ម ។ បន្ទាប់មកខ្មាន់កាំភ្លើងក៏បាញ់សម្លាប់ខ្លួនឯងតាមក្រោយ ។ ហេតុការណ៍ខាងលើនេះបានបង្កការភ្ញាក់ផ្អើលកើតឡើងនៅវេលាម៉ោងប្រមាណជិត ៧និង៣០នាទីព្រឹកថ្ងៃទី១៦មីនា…
ខេត្តត្បូងឃ្មុំ ៖ មានករណីបាញ់ប្រហារ បណ្តាលឱ្យគូដណ្ដឹង២នាក់ បានស្លាប់ក្នុងថ្លុកឈាមយ៉ាងអាណោចអាធ័ម ។ បន្ទាប់មកខ្មាន់កាំភ្លើងក៏បាញ់សម្លាប់ខ្លួនឯងតាមក្រោយ ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងនៅវេលាម៉ោងប្រមាណជិត ៧និង៣០នាទីព្រឹកថ្ងៃទី១៦មីនា ឆ្នាំ២០២៦ នៅភូមិស្រែសៀម ឃុំជីរោទ៏ទី២ ស្រុកត្បូងឃ្មុំ ខេត្តត្បូងឃ្មុំ។ បន្ទាប់ពីកើតហេតុ កម្លាំងសមត្ថកិច្ចបានចុះមកពិនិត្យសាកសពភ្លាមៗ និងសន្និដ្ឋានថា ករណីនេះអាចកើតចេញពីភ្លើងប្រចណ្ឌ ។
ជនរងគ្រោះទាំង២នាក់ ក្នុងនោះម្នាក់ឈ្មោះ គីម លាងអេង ភេទស្រី អាយុ៤២ឆ្នាំ មានទីលំនៅភូមិស្រែសៀម ឃុំជីរោទ៍ទី២ ស្រុកត្បូងឃ្មុំ ខេត្តត្បូងឃ្មុំ (ស្លាប់កន្លែងកើតហេតុ) និងម្នាក់ទៀតឈ្មោះ សុខ វណ្ណដេត ភេទប្រុស អាយុ៤៤ឆ្នាំ មានទីលំនៅនៅភ្នំពេញ (ស្លាប់កន្លែងកើតហេតុ) ។
ចំណែកជនសង្ស័យឈ្មោះ វណ្ណ ត្រកាល ភេទប្រុស អាយុ៤៣ឆ្នាំ ស្នាក់នៅភូមិស្រែសៀម ឃុំជីរោទ៍ទី២ ស្រុកត្បូងឃ្មុំ ខេត្តត្បូងឃ្មុំ (បានស្លាប់ នៅកន្លែងកើតហេតុ) ។
តាមប្រភពពីស្ត្រីម្នាក់អាយុ៧០ឆ្នាំ បានរៀបរាប់ឲ្យដឹងថា នៅពេលដែលគាត់កំពុងតែមើលចៅតូចនៅក្រោមផ្ទះឈើ ដែលស្ថិតនៅជាប់ទីតាំងឃ្លាំងលក់អង្ករធំមួយកន្លែងក្នុងភូមិស្រែសៀម ស្រាប់តែឮសូរសំឡេងគ្រាប់កាំភ្លើងបាញ់ជាច្រើនគ្រាប់ ហើយគាត់បានដើរចេញមកមុខផ្ទះអើតមើលទៅទីតាំងឃ្លាំងអង្ករនោះមានសភាពស្ងាត់មិនឃើញមានមនុស្សណាម្នាក់ ។
សាក្សីបានបន្តឲ្យដឹងទៀតថា បន្ទាប់មកគាត់បានទៅហៅប្ដីដែលសម្រាកនៅក្នុងបន្ទប់ក្រោមផ្ទះឲ្យចេញទៅមើលឃ្លាំងលក់អង្ករនោះក៏ស្រាប់តែឃើញមនុស្សស្លាប់ដល់ទៅបីនាក់ ។ ប្ដីរបស់គាត់មិនបានទៅណានោះទេ គឺនៅទីនោះ ដោយជួយមើលនិងទូរសព្ទហៅតាអាចារ្យឱ្យមក ហើយក៏មានទាហានដែលនៅបន្ទាយជាប់នឹងផ្ទះរបស់គាត់មានគ្នា៣ទៅ៤នាក់បានមកមើល ឃើញសាកសពដេកស្លាប់ក្នុងថ្លុកឈាម ក៏ប្រញាប់ទូរសព្ទប្រាប់ទៅកម្លាំងនគរបាលនៃអធិការដ្ឋានស្រុកត្បូងឃ្មុំដើម្បីចុះមកពិនិត្យសព។
ហេតុការបាញ់ប្រហារខាងលើនេះបានបង្កឲ្យមានការភ្ញាក់ផ្អើលដល់ប្រជាពលរដ្ឋរស់នៅក្នុងភូមិ និងអ្នកដំណើរជិតឆ្ងាយបាននាំគ្នាឈប់មើលពីរខាងក្រៅរបងទៅក្នុងទីតាំងឃ្លាំងលក់អង្ករនោះ។
សាក្សីបានលើកឡើងថា ចំពោះមូលហេតុដែលបាញ់ប្រហារនេះ ដោយសារតែជនដៃដល់នោះបានលួចស្រឡាញ់ស្ត្រីរងគ្រោះ តែសាម៉ីខ្លួនមិនបានដឹង លុះពេលដែលដឹងថា ស្ត្រីរងគ្រោះភ្ជាប់ពាក្យ ក៏កើតទៅជារឿងប្រចណ្ឌ លុះមកដល់ព្រឹកថ្ងៃទី១៦ មីនា ឆ្នាំ២០២៦ ក៏បានយកកាំភ្លើងខ្លីបាញ់ប្រហារទាំងពីរនាក់គូរដណ្ដឹងនោះស្លាប់ក្នុងថ្លុកឈាមយ៉ាងអាណោចអាធ័ម ។
លោកវរសេនីយ៍ឯកសាំ ហេង អធិការនគរបាលស្រុកត្បូងឃ្មុំបានប្រាប់ឲ្យដឹងថា: កាលពីមុន ឃាតករដែលជាជនដៃដល់និងស្ត្រីរងគ្រោះ គឺធ្លាប់បានរកស៊ីជាមួយគ្នា មានឃ្លាំងអង្ករដូចគ្នា ហើយតែងតែចេញចូលទីតាំងកន្លែងកើតហេតុទៀតផង។ ស្របពេលដែលបានដឹងថាស្ត្រីរងគ្រោះត្រូវភ្ជាប់ពាក្យនៅថ្ងៃទី៣០ មីនា ឆ្នាំ២០២៦ ជនដៃដល់ក៏កើតភ្លើងប្រច័ណ្ឌហើយបានទិញកាំភ្លើងខ្លីមួយដើមជិះម៉ូតូមួយគ្រឿងចូលមកដល់ឃ្លាំងអង្ករ ហើយក៏យកកាំភ្លើងនោះបាញ់ទៅលើគូដណ្ដឹងរបស់ស្ត្រីរងគ្រោះ។ ស្របពេលដែលជនរងគ្រោះរត់មកជួយឃាត់កុំឲ្យធ្វើបែបនេះ ខ្មាន់កាំភ្លើងក៏បានបាញ់ទៅលើជនរងគ្រោះបណ្ដាលឱ្យស្លាប់ក្នុងថ្លុកឈាម ។ បន្ទាប់មក ជនដៃដល់ក៏បានធ្វើអត្តឃាតដោយបាញ់សម្លាប់ខ្លួនឯងតាមក្រោយ ។ ចំពោះវត្ថុតាងសំបកគ្រាប់កាំភ្លើងខ្លីដែលសមត្ថកិច្ចរើសបានមានចំនួន៨គ្រាប់។
សូមបញ្ជាក់ថា ឃាតករពីមុនមកធ្លាប់មានប្រវត្តិរកស៊ីអង្ករជាមួយនឹងស្ត្រីរងគ្រោះ ហើយរូបគេថែមទាំងមានប្រពន្ធនៅឯបរទេសឯណោះ តាមដំណឹងប្រពន្ធនៅស្រុកក្រៅ កំពុងតែរត់ការដើម្បីធានាយកប្ដីទៅនៅឯបរទេស តែជាអកុសលបែរជាមានហេតុការណ៍បែបនេះកើតឡើងទៅវិញ។
ករណីខាងលើនេះ ត្រូវបានលោកឧត្តមសេនីយ៍ស្នងការនគរបាលខេត្តបានឲ្យបង្កើតគណៈកម្មការចម្រុះត្រួតពិនិត្យធ្វើកោសល្យវិច្ច័យសាកសពដោយមានការចូលរួមពីលោកព្រះរាជអាជ្ញាអមសាលាដំបូងខេត្ត បន្ទាប់ពីបានពិនិត្យចប់ ក៏ប្រគល់សពទៅឲ្យសាច់ញាតិដើម្បីរៀបចំធ្វើបុណ្យតាមប្រពៃណី៕
ចែករំលែកព័តមាននេះ