ចំណេះដឹង៖ យោងតាមការចុះផ្សាយពីប្រភពបរទេស ក្នុងសម័យកាលដែលបច្ចេកវិទ្យា AI ចូលមកជំនួសការចងចាំ ចំណេះដឹងតែមួយមុខ (IQ) ឬអារម្មណ៍ល្អ (EQ) គឺមិនទាន់គ្រប់គ្រាន់ឡើយ ប៉ុន្តែអ្នកត្រូវការ “EF” ដែលជាជំនាញបញ្ជាការរបស់ខួរក្បាលផ្នែកខាងមុខឱ្យ “គិតជា ធ្វើជា និងដោះស្រាយបញ្ហាជា”។

EF ប្រៀបដូចជាអគ្គនាយកក្នុងខ្លួនយើង ដែលចាំគ្រប់គ្រងការចងចាំសម្រាប់ដោះស្រាយបញ្ហាចំពោះមុខ ការចេះទប់ចិត្តមិនឱ្យឆេវឆាវតាមអារម្មណ៍ និងការបត់បែនគំនិតតាមកាលៈទេសៈដែលប្រែប្រួល។ មនុស្សដែលខ្វះ EF ទោះបីជារៀនពូកែយ៉ាងណាក៏ដោយ ក៏ងាយនឹងជួបបរាជ័យក្នុងជីវិតពិត ដោយសារទម្លាប់ពន្យារពេល ងាយបែកអារម្មណ៍ និងមិនចេះចាត់ចែងអាទិភាពការងារ។ ដំណឹងល្អគឺយើងអាចហ្វឹកហាត់ EF ឱ្យរឹងមាំដូចសាច់ដុំបាន តាមរយៈការរៀនលេងហ្គេមដែលមានច្បាប់វិន័យ ការធ្វើការងារផ្ទះដោយមានការរៀបចំផែនការ និងការហ្វឹកហាត់ផ្អាកអារម្មណ៍មុននឹងសម្រេចចិត្តធ្វើសកម្មភាពអ្វីមួយ។

ការវិនិយោគលើការបង្កើត EF គឺជាការកសាងគ្រឹះដ៏រឹងមាំបំផុតដែលជួយឱ្យអ្នកមិនត្រឹមតែរស់រានក្នុងយុគសម័យថ្មីប៉ុណ្ណោះទេ ប៉ុន្តែថែមទាំងអាចដឹកនាំជីវិតឱ្យទៅដល់គោលដៅប្រកបដោយចីរភាព និងភាពម្ចាស់ការលើខ្លួនឯង៕