ប្រទេសអេមីរ៉ាតអារ៉ាប់រួម ៖ ក្រុមហ៊ុនសាងសង់ និងវិនិយោគរដ្ឋចិន China Railway Construction Corporation (CRCC) បានបើកការដ្ឋានសាងសង់មជ្ឈមណ្ឌលថែទាំ…
ប្រទេសអេមីរ៉ាតអារ៉ាប់រួម ៖ ក្រុមហ៊ុនសាងសង់ និងវិនិយោគរដ្ឋចិន China Railway Construction Corporation (CRCC) បានបើកការដ្ឋានសាងសង់មជ្ឈមណ្ឌលថែទាំ និងជួសជុលយន្តហោះដ៏ធំបំផុតមួយលើពិភពលោក នៅប្រទេសអេមីរ៉ាតអារ៉ាប់រួម។ នេះបើតាមប្រភពពីកាសែត South China Morning Post ចេញផ្សាយកាលពីថ្ងៃទី២១ ខែឧសភា ឆ្នាំ២០២៦។
យោងតាមទីភ្នាក់ងារសារព័ត៌មានចិន ស៊ីនហួ គម្រោងនេះមានការវិនិយោគសរុបជាង ៥ ពាន់លានដុល្លារអាមេរិក រួមទាំងឃ្លាំងយន្តហោះធំៗចំនួន ៨ សម្រាប់ថែទាំ និងផ្ទុកយន្តហោះ ដែលមានផ្ទៃដីសរុបប្រហែល ១,២១លានម៉ែត្រការ៉េ មានទីតាំងស្ថិតនៅទីក្រុងឌូបៃ ដោយត្រូវបានគេរំពឹងថានឹងបញ្ចប់នៅឆ្នាំ ២០៣០ ហើយនេះក៏ជាកិច្ចសន្យាសាងសង់មួយក្នុងចំណោមកិច្ចសន្យាដែលមានទំហំធំបំផុត ដែលក្រុមហ៊ុនម៉ៅការចិនធ្លាប់ទទួលសិទ្ធិនៅក្នុងតំបន់មជ្ឈិមបូព៌ាផងដែរ។
គម្រោងនេះកំពុងត្រូវបានអនុវត្តប្រឆាំងនឹងហានិភ័យភូមិសាស្ត្រនយោបាយជាបន្តបន្ទាប់នៅតំបន់មជ្ឈិមបូព៌ា ជាពិសេសបន្ទាប់ពីជម្លោះរវាងសហរដ្ឋអាមេរិក-អ៊ីស្រាអែល ជាមួយនឹងអ៊ីរ៉ង់។
ប៉ុន្តែទោះជាយ៉ាងណាក៏ដោយ ប្រទេសចិន នៅតែបន្តពង្រីកវត្តមានសេដ្ឋកិច្ចរបស់ខ្លួននៅក្នុងតំបន់ដែលសម្បូរថាមពលមួយនេះ តាមរយៈការវិនិយោគពាណិជ្ជកម្ម និងហេដ្ឋារចនាសម្ព័ន្ធ។
យោងតាមថ្នាក់ដឹកនាំ CRCC គម្រោងនេះ ក៏ជាព្រឹត្តិការណ៍សំខាន់ថ្មីមួយសម្រាប់គំនិតផ្តួចផ្តើមខ្សែក្រវ៉ាត់ និងផ្លូវ (BRI) ដែលបានដាក់ចេញដោយប្រធានាធិបតីចិន លោក ស៊ី ជីនពីង (Xi Jinping ) ក្នុងឆ្នាំ ២០១៣ ដើម្បីលើកកម្ពស់ការតភ្ជាប់ពាណិជ្ជកម្មសកល និងហេដ្ឋារចនាសម្ព័ន្ធ។ ចំណែកលោក Sheikh Ahmed bin Saeed al-Maktoum ប្រធាន និងជានាយកប្រតិបត្តិនៃក្រុមហ៊ុនអាកាសចរណ៍ Emirates Airline and Group បានថ្លែងថា គម្រោងនេះ នឹងជួយពង្រឹងជំហររបស់ទីក្រុងឌូបៃ ក៏ដូចជាប្រទេសអេមីរ៉ាតអារ៉ាប់រួមក្នុងវិស័យអាកាសចរណ៍។
យោងតាមស្ថានទូតចិនប្រចាំប្រទេសអេមីរ៉ាតអារ៉ាប់រួម បានឱ្យដឹងថា ប្រទេសចិនគឺជាដៃគូពាណិជ្ជកម្មធំបំផុតរបស់ប្រទេសនៅមជ្ឈិមបូព៌ាមួយនេះ អស់រយៈពេល១០ឆ្នាំជាប់ៗគ្នា។ តួលេខពាណិជ្ជកម្មទ្វេភាគីត្រូវបានព្យាករថានឹងឈានដល់១០៨ ពាន់លានដុល្លារអាមេរិកនៅឆ្នាំ ២០២៥ ដែលជាការកើនឡើង ៦% ធៀបនឹងឆ្នាំមុន។
បច្ចុប្បន្នអេមីរ៉ាតអារ៉ាប់រួម ក៏ជាអ្នកផ្គត់ផ្គង់ប្រេងឆៅធំជាងគេលំដាប់ទី ៦ របស់ចិនផងដែរ ដោយការនាំចេញទៅកាន់មហាយក្សនៅអាស៊ីមួយនេះ ឈានដល់ ៣៧,៥ លានតោនកាលពីឆ្នាំមុន។ ក្រៅអំពីថាមពល អេមីរ៉ាតអារ៉ាប់រួមក៏ជាទីផ្សារដ៏សំខាន់មួយសម្រាប់ក្រុមហ៊ុនបច្ចេកវិទ្យាចិនផងដែរ ជាពិសេសក្នុងវិស័យហេដ្ឋារចនាសម្ព័ន្ធអេឡិចត្រូនិក និងទូរគមនាគមន៍។ ប្រព័ន្ធបណ្តាញជាច្រើននៅក្នុងប្រទេសឈូងសមុទ្រមួយនេះ កំពុងត្រូវបានដាក់ពង្រាយដោយប្រើប្រាស់បច្ចេកវិទ្យារបស់ក្រុមហ៊ុន Huawei។
យោងតាមក្រសួងពាណិជ្ជកម្មចិន ដែលរាយការណ៍តាមប្រព័ន្ធតាមដានការវិនិយោគផ្ទាល់ទៅក្រៅប្រទេសរបស់ចិនឆ្នាំ ២០២៦ បានឱ្យដឹងថា នៅក្នុងត្រីមាសទី១ នៃឆ្នាំនេះ ទំហំវិនិយោគផ្ទាល់ទៅក្រៅប្រទេសសរុបរបស់ចិនបានសម្រេចដល់ ៤៤,៥៣ ពាន់លានដុល្លារអាមេរិក ដែលឆ្លុះបញ្ចាំងពីការកើនឡើង ៨,៩% ធៀបនឹងឆ្នាំមុន៕
ចែករំលែកព័តមាននេះ