ខេត្តមណ្ឌលគិរី ៖ ដើម្បីលើកកម្ពស់សេដ្ឋកិច្ចគ្រួសារ និងទាញយកផលប្រយោជន៍ ពីវិស័យកសិឧស្សាហកម្ម អាជ្ញាធរឃុំស្រែខ្ទុម ស្រុកកែវសីមា បានជំរុញដល់បងប្អូនប្រជាកសិករក្នុងមូលដ្ឋាន ឱ្យបង្កើនការយកចិត្តទុកដាក់ខ្ពស់លើការដាំដុះ និងថែទាំដំណាំស្វាយចន្ទី…
ខេត្តមណ្ឌលគិរី ៖ ដើម្បីលើកកម្ពស់សេដ្ឋកិច្ចគ្រួសារ និងទាញយកផលប្រយោជន៍ ពីវិស័យកសិឧស្សាហកម្ម អាជ្ញាធរឃុំស្រែខ្ទុម ស្រុកកែវសីមា បានជំរុញដល់បងប្អូនប្រជាកសិករក្នុងមូលដ្ឋាន ឱ្យបង្កើនការយកចិត្តទុកដាក់ខ្ពស់លើការដាំដុះ និងថែទាំដំណាំស្វាយចន្ទី ដ្បិតតម្លៃទីផ្សារនាដើមឆ្នាំ២០២៦នេះ កំពុងមានសន្ទុះកើនឡើងខ្លាំង។
ជួបសម្ភាសន៍ជាមួយកោះសន្តិភាព លោក ប៊ុត សំអ៊ែល មេឃុំស្រែខ្ទុម កាលពីថ្ងៃទី១៤ មីនា ២០២៦ មានប្រសាសន៍លើកទឹកចិត្តដល់កសិករថា ក្នុងនាមអាជ្ញាធរឃុំ ខ្ញុំសូមកោតសរសើរចំពោះការខិតខំប្រឹងប្រែងរបស់បងប្អូនកសិករ ។ ថ្វីត្បិតតែអាកាសធាតុឆ្នាំនេះមានការប្រែប្រួល ប៉ុន្តែតម្លៃទីផ្សារដែលកំពុងហក់ឡើងខ្ពស់នេះ គឺជាឱកាសមាសសម្រាប់បងប្អូន ។
ដូច្នេះសូមបងប្អូនបន្តយកចិត្តទុកដាក់លើបច្ចេកទេសថែទាំ ការដាក់ជី និងការកម្ចាត់សត្វល្អិតឱ្យបានត្រឹមត្រូវ ដើម្បីធានាបាននូវគុណភាពគ្រាប់ស្វាយចន្ទីឱ្យកាន់តែល្អ ព្រោះគុណភាពខ្ពស់នឹងធ្វើឱ្យតម្លៃកាន់តែប្រសើរ ដែលអាចបង្កើនប្រាក់ចំណូល និងលើកកម្ពស់ជីវភាពរស់នៅរបស់បងប្អូនឱ្យកាន់តែធូរធារ ។លោកមេឃុំបញ្ជាក់ថា ក្នុងមូលដ្ឋានរបស់លោក ប្រជាកសិករបានដាំដុះដំណាំជាច្រើនមុខ រួមមាន កៅស៊ូ ម្រេច ទុរេន ស្វាយកែវរមៀត ស្វាយចន្ទី ដំឡូងមី ស្រូវ ជាដើម ។
ជួបជាមួយកសិករដែលកំពុងមមាញឹកក្នុងការប្រមូលផលគ្រាប់ស្វាយចន្ទី អ្នកស្រី មុំ អេន រស់នៅក្នុងភូមិត្រពាំងផ្អេរ ឃុំស្រែខ្ទុម បានឱ្យដឹងថា គ្រួសារគាត់បានដាំដុះដំណាំស្វាយចន្ទីលើផ្ទៃដីប្រមាណជាង ១ ហិកតា ដែលមានអាយុកាលជាង ១០ ឆ្នាំមកហើយ កំពុងប្រមូលផលជារៀងរាល់ឆ្នាំ ។ នៅរដូវប្រមូលផលនេះ ក្នុងមួយថ្ងៃខ្ញុំអាចរើសគ្រាប់បានប្រមាណ ២០០ ទៅ ៥០០ គីឡូក្រាម។ អ្វីដែលសប្បាយចិត្តបំផុតនោះ គឺតម្លៃឆ្នាំនេះល្អជាងឆ្នាំមុនៗ ដោយប្រភេទគ្រាប់ធម្មតាអាចលក់បានចាប់ពីជាង ៥,០០០ រៀល ទៅ ៦,០០០ រៀល ក្នុងមួយគីឡូក្រាម ដែលធ្វើឱ្យយើងមានកម្លាំងចិត្តកាន់តែខ្លាំងក្នុងការថែទាំចំការ ។
អាជីវករទទួលទិញគ្រាប់ស្វាយចន្ទីក្នុងស្រុកកែវសីមា លោក តុង ម៉េងឆាយ បានឱ្យដឹងថា សម្រាប់ឆ្នាំ២០២៦នេះ បរិមាណផលហាក់មានការថយចុះបន្តិច បើធៀបនឹងឆ្នាំ២០២៥។ អាជីវកររូបនេះបានលើកឡើងថា ក្នុងមួយថ្ងៃ ខ្ញុំអាចទទួលទិញពីកសិករបានត្រឹមតែចន្លោះពី ៣០ ទៅ ៤០ តោនប៉ុណ្ណោះ ខណៈកាលពីឆ្នាំកន្លងទៅ ក្នុងមួយថ្ងៃខ្ញុំអាចប្រមូលទិញបានរហូតដល់ជិត ១០០ តោន។ ការធ្លាក់ចុះទិន្នផលនេះ គឺបណ្តាលមកពីបញ្ហាអាកាសធាតុប្រែប្រួលមិនអំណោយផល ដែលធ្វើឱ្យផ្កា និងក្ដិបស្វាយចន្ទីខ្លោច ឬជ្រុះច្រើន។
ទោះបីជាទិន្នផលមានការថយចុះ ប៉ុន្តែតម្លៃដែលអាជីវករទទួលទិញក្នុងសប្តាហ៍ទីមួយនៃខែមីនា ឆ្នាំ២០២៦នេះ គឺមានភាពល្អប្រសើរខ្លាំង ដោយគ្រាប់ស្វាយចន្ទីប្រភេទគ្រាប់តូច (គ្រាប់ធម្មតា) មានតម្លៃចាប់ពី ៥,៨០០ រៀល ចំណែកឯគ្រាប់ពូជប្រភេទ M23 ដែលមានគុណភាពល្អ និងគ្រាប់ធំ អាចលក់បានរហូតដល់ ៧,២០០ រៀល ក្នុងមួយគីឡូក្រាម។
លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានឲ្យដឹងថា ដំណាំស្វាយចន្ទីរបស់កសិករមួយចំនួនក្នុងឆ្នាំនេះ ទិន្នផលអាចថយចុះមួយចំនួនដោយសារ(ការបម្រែបម្រួលអាកាសធាតុ) ដោយមានភ្លៀងធ្លាក់កក់ខែនិងខ្យល់ ដែលជាកត្តាធ្វើឱ្យមានផលប៉ះពាល់ដល់ផ្កា។
ប្រជាកសិករអាចប្រើប្រាស់វិធីសាស្ត្រមួយចំនួនក្រោយពេលភ្លៀងរួចលើកដំណាំស្វាយចន្ទីដែលមិនទាន់ចេញផ្កា សូមទាក់ទងជាមួយមន្ត្រីកសិកម្មឃុំ និង មន្ត្រីជំនាញនៃមន្ទីរកិសកម្ម។ ចំពោះតម្លៃទីផ្សារ បច្ចុប្បន្នជាមធ្យមចាប់ពី ពី៦.៥០០៛-៦.៧០០៛/គ.ក្រ អាស្រ័យនឹងគុណភាព ។ កាលឆ្នាំ២០២៥ដំណាំស្វាយចន្ទីខេត្តមណ្ឌលគិរី អនុវត្តបាន ២២ ៨៩៣ហិកតា បរិមាណផលសរុប ៣៣៨ ៧៨៧តោន ។
យោងតាមក្រសួងកសិកម្ម រុក្ខាប្រមាញ់ និងនេសាទ ក៏បានបង្ហាញឱ្យឃើញពីការកើនឡើងនៃតម្លៃកសិផលនេះដែរ ខណៈដែលរាជរដ្ឋាភិបាលកំពុងជំរុញយ៉ាងខ្លាំងក្លាលើ “គោលនយោបាយជាតិស្ដីពីស្វាយចន្ទី ២០២២-២០២៧” ដើម្បីប្រែក្លាយកម្ពុជាឱ្យទៅជាអធិរាជស្វាយចន្ទី នាពេលអនាគតដ៏ខ្លីខាងមុខនេះ៕
ចែករំលែកព័តមាននេះ