រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា កម្ពុជា និងវៀតណាម មានចំណងមិត្តភាពដ៏យូរអង្វែង…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា កម្ពុជា និងវៀតណាម មានចំណងមិត្តភាពដ៏យូរអង្វែង ដែលបានចាក់ឫសយ៉ាងជ្រៅក្នុងភាពជាអ្នកជិតខាងល្អ កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។
យោងតាមលិខិតមួយច្បាប់របស់សម្តេចបវរធិបតីនាយករដ្ឋមន្ត្រី ហ៊ុន ម៉ាណែត ផ្ញើទៅលោកឡេ មិញហ៊ឹង នាយករដ្ឋមន្ត្រីសាធារណរដ្ឋសង្គមនិយមវៀតណាម ចេញផ្សាយកាលពីថ្មីៗនេះបានឲ្យដឹងថា តាងនាមប្រជាជននៃព្រះរាជាណាចក្រកម្ពុជា ខ្ញុំមានសេចក្តីសោមនស្សរីករាយយ៉ាងក្រៃលែង សូមសម្តែងនូវការអបអរសាទរយ៉ាងកក់ក្តៅបំផុត ជូនចំពោះ លោកក្នុងឱកាសដែលត្រូវបានតែងតាំងជានាយករដ្ឋមន្ត្រីនៃសាធារណរដ្ឋសង្គមនិយមវៀតណាម ។
ក្នុងលិខិតសម្តេចធិបតីបានលើកឡើងយ៉ាងដូច្នេះថា ៖ ការតែងតាំងនេះ បានឆ្លុះបញ្ចាំងអំពីសេចក្តីទុកចិត្ត និងជំនឿជឿជាក់ដែលបក្សរដ្ឋ និងប្រជាជនវៀតណាម បានផ្តល់ជូនឯកឧត្តម ដោយទទួលស្គាល់នូវការលះបង់របស់ឯកឧត្តមក្នុងការជំរុញការអភិវឌ្ឍ និងវិបុលភាពជាតិ ។
សម្តេចធិបតីបានបញ្ជាក់ថា «ខ្ញុំមានជំនឿយ៉ាងមុតមាំថា ក្រោមការដឹកនាំប្រកបដោយសមត្ថភាព និងចក្ខុវិស័យវែងឆ្ងាយរបស់ ឯកឧត្តម និងក្រោមការដឹកនាំរបស់បក្សកុម្មុយ
នីស្តវៀតណាម ។ វៀតណាមនឹងបន្តសម្រេចបាននូវសមិទ្ធផលធំៗបន្ថែមទៀត ក្នុងការអភិវឌ្ឍសេដ្ឋកិច្ច-សង្គម ព្រមទាំងបន្តលើកកម្ពស់តួនាទីរបស់ខ្លួននៅក្នុងកិច្ចការ តំបន់ និងអន្តរជាតិ»។
សម្តេចធិបតីបានសង្កត់ធ្ងន់ថា «កម្ពុជា និងវៀតណាម មានចំណងមិត្តភាពដ៏យូរអង្វែង ដែលបានចាក់ឫសយ៉ាងជ្រៅក្នុងភាពជាអ្នកជិតខាងល្អ កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង ។ ខ្ញុំសូមវាយតម្លៃខ្ពស់ចំពោះទំនាក់ទំនងដ៏រឹងមាំរវាងប្រជាជាតិយើងទាំងពីរ ហើយខ្ញុំទន្ទឹងរង់ចាំជួបជាមួយឯកឧត្តម ដើម្បីផ្លាស់ប្តូរទស្សនៈលើការបន្តពង្រឹង និងពង្រីកកិច្ចសហប្រតិបត្តិការទ្វេភាគីរបស់យើង ក៏ដូចជាកិច្ចសហប្រតិបត្តិការ នៅក្នុងក្របខ័ណ្ឌអាស៊ាន និងក្របខ័ណ្ឌពហុភាគីនានា ដើម្បីផលប្រយោជន៍ទៅវិញទៅមកនៃប្រជាជន យើងទាំងពីរ» ។
សូមជម្រាបថា លោក ឡេ មិញហ៊ឹង ត្រូវបានជាប់ឆ្នោតជានាយករដ្ឋមន្ត្រីថ្មីនៃប្រទេសវៀតណាម សម្រាប់អាណត្តិឆ្នាំ២០២៦-២០៣១ ដោយរដ្ឋសភាវៀតណាមនៅថ្ងៃទី៧ ខែមេសា ឆ្នាំ២០២៦ ។
តាមការចេញផ្សាយរបស់សារព័ត៌មានក្នុងពីប្រវត្តិនាយករដ្ឋមន្ត្រីថ្មីវៀតណាមបានឲ្យដឹងថាលោក ឡេ មិញហ៊ឹង កើតនៅថ្ងៃទី១១ ខែធ្នូ ឆ្នាំ១៩៧០ ទីកន្លែងកំណើតឃុំទូមី ខេត្តហាទីញ ។ លោកបានចូលរួមគណបក្សនៅថ្ងៃទី២១ ខែសីហា ឆ្នាំ២០០០ និងចូលជាផ្លូវការ នៅថ្ងៃទី២១ ខែសីហា ឆ្នាំ២០០១ ។
ចែករំលែកព័តមាននេះ