ខេត្តបន្ទាយមានជ័យ ៖ សមត្ថកិច្ចចម្រុះ កាលពីព្រឹកថ្ងៃទី៧ ខែមេសា ឆ្នាំ២០២៦ បានធ្វើការឡោមព័ទ្ធទីតាំងអគារកាស៊ីណូ RICH ស្ថិតនៅក្បែររង្វង់មូលច្រកទ្វារអន្តរជាតិប៉ោយប៉ែត ស្ថិតក្នុងភូមិក្បាលស្ពាន១…
ខេត្តបន្ទាយមានជ័យ ៖ សមត្ថកិច្ចចម្រុះ កាលពីព្រឹកថ្ងៃទី៧ ខែមេសា ឆ្នាំ២០២៦ បានធ្វើការឡោមព័ទ្ធទីតាំងអគារកាស៊ីណូ RICH ស្ថិតនៅក្បែររង្វង់មូលច្រកទ្វារអន្តរជាតិប៉ោយប៉ែត ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ដែលត្រូវបានសង្ស័យថា ជាទីតាំង Online Scams ។
ប្រតិបត្តិការនេះ ដឹកនាំដោយលោក ប្រាក់ ប៉ូលី អភិបាលរងខេត្ត និងមានការសម្របសម្រួលនីតិវិធីពីព្រះរាជអាជ្ញាអមសាលាដំបូងខេត្ត ដែលមានកម្លាំងនគរបាលកងរាជអាវុធហត្ថខេត្ត និងក្រុងប៉ោយប៉ែតច្រើនក្រុម ។ ជាលទ្ធផល បានឃាត់ខ្លួនជនបរទេសចំនួន១៣៩នាក់ និងរឹបអូសសម្ភារៈ Online Scams មួយចំនួន ហើយការបង្ក្រាបនេះមានរយៈពេល១ថ្ងៃពេញចាប់តាំងពីព្រឹករហូតដល់ល្ងាចទើបបញ្ចប់ ។
ជនបរទេសដែលត្រូវបានឃាត់ខ្លួននេះមានចម្រុះជាតិសាសន៍ គឺមាន ចិន វៀតណាម និងឥណ្ឌូណេស៊ី និងបញ្ជូនតាមរថយន្តឆ្ពោះទៅខេត្តសៀមរាប ដើម្បីរៀបចំបណ្តេញចេញពីកម្ពុជាឲ្យត្រឡប់ទៅស្រុកកំណើតវិញតាមយន្តហោះ ពិសេសនៅព្រលានយន្តហោះសៀមរាប-អង្គរ ដែលបន្តនីតិវិធីដោយនគរបាលអន្តោប្រវេសន៍ ។
ដោយឡែក អ្នកពាក់ព័ន្ធនឹងបទល្មើសត្រូវបានរៀបចំនីតិវិធីដើម្បីអនុវត្តតាមច្បាប់ ។ គេនៅចាំបានថា កាលពីថ្ងៃទី១២ ខែមីនា ឆ្នាំ២០២៦ កន្លងទៅ នៅឆាយណាបឹងបេង ក្នុងភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ដែលមានអគារចំនួន២១ និងអគារខ្លះកំពុងសាងសង់ បានត្រូវកម្លាំងអគ្គស្នងការដ្ឋាននគរបាលជាតិចុះបង្ក្រាបទ្រង់ទ្រាយធំ ដោយឃាត់ខ្លួនជនបរទេសចំនួន៨១១នាក់ ហើយនៅថ្ងៃទី១៤ ខែមីនា ឆ្នាំ២០២៦ អគារនេះបានត្រូវបិទទ្វារ ។
តាមពិតទៅ អគារដែលក្លាយជាទីតាំង Online Scams នេះជាអចលនទ្រព្យដែលគេសាងសង់សម្រាប់លក់ តែដោយសារវិស័យនេះ ដាំក្បាលចុះក៏ក្លាយជាទីតាំងជួលឱ្យជនបរទេសស្នាក់នៅ
រហូតក្លាយជាទីតាំង Online Scams ។
ក្នុងចំណោមជនបរទេសចំនួន៨១១នាក់ ដែលត្រូវបានឃាត់ខ្លួននេះមានជនជាតិវៀតណាម៧៧៦នាក់ ចិន៣៤នាក់ និងម៉ាឡេស៊ី១នាក់ ក្នុងនោះដែរមាន១៨នាក់ ជាមេខ្លោងត្រូវបាននាំយកទៅសាកសួរនៅស្នងការដ្ឋាននគរបាលខេត្ត និងមួយចំនួនទៀតអនុវត្តនីតិវិធីប្រគល់ឲ្យទៅអគ្គនាយកដ្ឋានអន្តោប្រវេសន៍ ដើម្បីបណ្តេញចេញពីកម្ពុជា ។ តាមសមត្ថកិច្ចជំនាញក្រុមជនសង្ស័យបានប្រើប្រាស់វិធីលួងលោមស្នេហាឱ្យជនរងគ្រោះវិនិយោគលើការទិញ-លក់ទំនិញ តាមរយៈបណ្តាញសង្គមទិកតុក WhatsApp Zalo តេឡេក្រាម និងហ្វេសប៊ុក ។
ជាមួយគ្នានេះ ក្រុមជនល្មើសបានឆ្លៀតបញ្ចុះបញ្ចូលជនរងគ្រោះ ដើម្បីទិញសរីរាង្គមនុស្ស ពីអ្នកដែលបានចាញ់បោកពួកជនល្មើស និងបានចាប់បង្ខំឲ្យជនរងគ្រោះធ្វើការឆបោកបន្ត ៕
ចែករំលែកព័តមាននេះ