បុគ្គលមានឈ្មោះក្នុងបញ្ជីខ្មៅ បែរជាមានសិទ្ធិចូលរួមដេញថ្លៃយ៉ាងរំភើយ
- រតនគិរី
ខេត្តរតនគិរី ៖ ឈ្មោះ ម៉ៅ អេងជឺ ជាបុគ្គលមានឈ្មោះក្នុងបញ្ជីខ្មៅរបស់ក្រសួងមហាផ្ទៃ ត្រូវបានហាមឃាត់មិនឱ្យដាក់សំណើដេញថ្លៃកិច្ចសន្យាឃុំសង្កាត់ដែលនៅមានសុពលភាពពីរដ្ឋបាលរាជធានី-ខេត្តទាំង ២៥ ដែលមាននៅក្នុងតារាងតែមួយនោះបែជាឈ្នះការដេញថ្លៃគម្រោងឆ្នាំ ២០២៦ ក្នុងកិច្ចប្រជុំបើកសំណើដេញថ្លៃគម្រោងសាងសង់ផ្លូវបេតុងអាមេ របស់សាលាសង្កាត់កាចាញ ក្រុងបានលុងទៅវិញ ។
កិច្ចប្រជុំបើកសំណើដេញថ្លៃគម្រោងសាងសង់ផ្លូវបេតុងអាមេ របស់សាលាសង្កាត់កាចាញនោះបានប្រព្រឹត្តិទៅនៅព្រឹកថ្ងៃទី ២១ ខែឧសភា ឆ្នាំ ២០២៦ កន្លងទៅនេះ ដែលនាំឱ្យកំពុងរងការរិះគន់យ៉ាងខ្លាំងពីសំណាក់អ្នកតំណាងក្រុមហ៊ុនទទួលការ និងអ្នកសង្កេតការណ៍ខ្លះ បន្ទាប់ពីគណៈកម្មការលទ្ធកម្មបានបណ្តោយបុគ្គលជាប់ «បញ្ជីខ្មៅ» ចូលរួមប្រកួតប្រជែង រហូតទទួលបានជ័យលាភី ក្នុងរូបភាពបំពានបទបញ្ញត្តិរបស់ក្រសួងមហាផ្ទៃយ៉ាងធ្ងន់ធ្ងរផងនោះ ។
យោងតាមប្រភពពីអ្នកចូលរួមកិច្ចប្រជុំលទ្ធកម្ម គឺមានគម្រោងសាងសង់ផ្លូវបេតុងអាមេប្រវែង ០.៤៨ គីឡូម៉ែត្រ ទទឹង ៦ម៉ែត្រ កម្រាស់ ០,១៥ម៉ែត្រ ដែលមានតម្លៃប៉ាន់ស្មានសរុបជាង ៣២៦ លានរៀល (៣២៦,៥៧០,៦១៦ រៀល) ត្រូវបានប្រកាសឱ្យក្រុមហ៊ុន «ពង់ការវិវឌ្ឍ» ដែលមានតំណាង ដោយអ្នកដេញថ្លៃឈ្មោះ ម៉ៅ អេងជឺ ជាអ្នកឈ្នះការដេញថ្លៃក្នុងតម្លៃ ២៩០,៤០០,០០០ រៀល (ធ្លាក់ចុះ ១១.០៧%) ។
ការសម្រេចនេះបានបង្កើតជាមន្ទិលសង្ស័យធំៗ ដោយហេតុថា ឈ្មោះ ម៉ៅ អេងជឺ គឺជាបុគ្គលដែលស្ថិតក្នុង «បញ្ជីខ្មៅ» លេខរៀងទី ២៨ ក្នុងចំណោមអ្នកទទួលការចំនួន ៣៧ ក្រុមហ៊ុន ។ យោងឯកសារ ជម្រាបជូនឯកឧត្តម លោកជំទាវអភិបាល នៃគណៈអភិបាលរាជធានី ខេត្ត លេខ ០៧៦ សជណ/របប របស់អគ្គនាយកដ្ឋានរដ្ឋបាល ក្រសួងមហាផ្ទៃ ចុះថ្ងៃទី ១៨ ខែកុម្ភៈ ឆ្នាំ ២០២៥ បញ្ជីឈ្មោះអ្នកទទួលការដែលត្រូវបានដកសិទ្ធិមិនឱ្យដាក់សំណើដេញថ្លៃគម្រោងមូលនិធិឃុំ សង្កាត់ ឬ”ធ្វើជាតំណាងក្រុមហ៊ុនណាមួយក្នុងការដាក់សំណើដេញថ្លៃកិច្ចសន្យាឃុំ សង្កាត់ ឬធ្វើជាអ្នកទទួលការបន្ត” ក្នុងការអនុវត្តកិច្ចសន្យាឃុំ សង្កាត់ ។
ជាក់ស្ដែងកិច្ចប្រជុំបើកសំណើដេញថ្លៃគម្រោងសាងសង់ផ្លូវបេតុងអាមេ ឆ្នាំ ២០២៦ របស់សាលាសង្កាត់កាចាញ ក្រុងបានលុង កាលពីព្រឹកថ្ងៃទី ២១ ខែឧសភា ឆ្នាំ ២០២៦ កន្លងទៅនេះបុគ្គលឈ្មោះ ម៉ៅ អេងជឺ អតីតប្រធានក្រុមហ៊ុន សុធិរាជ ខនស្ត្រាក់សិន ដែលជាប់ឈ្មោះក្នុង “បញ្ជីខ្មៅ” ប្រកាសដោយក្រសួងមហាផ្ទៃបានចូលរួមធ្វើជាអ្នកតំណាងឲ្យក្រុមហ៊ុន «ពង់ការវិវឌ្ឍ» យ៉ាងរំភើយទៅវិញ ។
ករណីនេះបានធ្វើឱ្យសាធារណជនដាក់សំណួរចំៗទៅកាន់គណៈកម្មការលទ្ធកម្មសង្កាត់កាចាញ និងមន្ត្រីជំនាញនៃទីចាត់ការផែនការ និងវិនិយោគខេត្តរតនគិរី ថាហេតុអ្វីបានជាមើលរំលង និងបើកដៃឱ្យមានការអនុវត្តផ្ទុយពីបទបញ្ញត្តិរបស់ក្រសួងមហាផ្ទៃ និងសៀវភៅណែនាំកិច្ចលទ្ធកម្មឆ្នាំ ២០១៧ របស់ គ.ជ.អ.ប ដែលតម្រូវឱ្យមានតម្លាភាព និងគ្មានការឃុបឃិត ។
បច្ចុប្បន្ន ប្រជាពលរដ្ឋ និងអ្នកតាមដានសង្គម បានអំពាវនាវយ៉ាងទទូចដល់ក្រសួងមហាផ្ទៃ និងអង្គភាពប្រឆាំងអំពើពុករលួយ (ACU) សូមចុះស៊ើបអង្កេតជាបន្ទាន់ផងជុំវិញដំណើរការដេញថ្លៃមិនប្រក្រតីនេះ ដើម្បីការពារថវិកាជាតិ និងធានាភាពយុត្តិធម៌ក្នុងប្រព័ន្ធលទ្ធកម្មសាធារណៈ ៕
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ