សម្តេចធិបតី ហ៊ុន ម៉ាណែត ស្នើដោយផ្ទាល់ទៅកាន់ប្រធានាធិបតីបារាំង ជួយប្រាប់ភាគីថៃឱ្យគោរពច្បាប់អន្តរជាតិ
- ភ្នំពេញ
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើដោយផ្ទាល់ ទៅលោក Emmanuel Macron…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើដោយផ្ទាល់ ទៅលោក Emmanuel Macron ប្រធានាធិបតីបារាំង ជួយប្រាប់ទៅភាគីថៃឱ្យគោរពតាមច្បាប់អន្តរជាតិលើការដោះស្រាយជម្លោះព្រំដែនជាមួយកម្ពុជា ។ នេះបើតាមឯកឧត្តម ហ្សង់ ហ្វ្រង់ស័រតាន់ រដ្ឋមន្ត្រីប្រតិភូអមនាយករដ្ឋមន្ត្រី ។
ក្នុងសន្និសីទសារព័ត៌មាន ក្រោយមាតុភូមិនិវត្តរបស់សម្តេចធិបតីពីប្រទេសបារាំងវិញ នៅថ្ងៃទី៩ មេសា ឆ្នាំ២០២៦ ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រីគូសបញ្ជាក់ថា «បារាំងជាប្រទេសដៃគូ និងប្រទេសជាមិត្ត តែយ៉ាងណាក៏ដោយ សម្តេចធិបតីមិនបានស្នើសុំទៅប្រធានាធិបតីបារាំងឱ្យគាំទ្រកម្ពុជាលើជម្លោះព្រំដែនកម្ពុជា-ថៃនោះទេ ប៉ុន្តែសម្តេចបានស្នើឱ្យឯកឧត្តម ម៉ាក្រុង ជួយប្រាប់ភាគីថៃឱ្យគោរពតាមច្បាប់អន្តរជាតិ» ។
ថ្លែងផ្សាយផ្ទាល់ឯកឧត្តមបានបញ្ជាក់ថា «ប៉ុន្តែសម្តេចធិបតីបានស្នើសុំឱ្យប្រទេសបារាំងរបស់ឯកឧត្តម៉ាក្រុង បន្តលើកតម្កើងគោលការណ៍របស់ខ្លួនដែលស៊ីសង្វាក់គ្នាខ្លាំងមែនទែន និងគោលការណ៍នៃប្រទេសកម្ពុជានោះ គឺការគោរពច្បាប់អន្តរជាតិ គោរពអធិបតេយ្យភាព និងគោរពបូរណភាពនៃបណ្តាប្រទេសនានានៅក្នុងពិភពលោក» ។
ជាមួយគ្នានេះ ឯកឧត្តមក៏បានរំលឹកថា ដោយសារតែមានការជួយជ្រោមជ្រែងពីភាគីអន្តរជាតិជាប្រទេសមហាអំណាចដូចជា អាមេរិក-ចិន និងប្រទេសជាសមាជិកអាស៊ានបានជួយធ្វើឱ្យមានបទឈប់បាញ់រវាងកម្ពុជា-ថៃចំនួន២លើក គឺលើកទី១ នៅអំឡុងខែកក្កដា និងលើកទី២នៅខែធ្នូ ចុងឆ្នាំ២០២៥ ។
បើតាមឯកឧត្តមរដ្ឋមន្ត្រីប្រតិភូ អមនាយករដ្ឋមន្ត្រីបញ្ជាក់ថា កម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។
ជាងនេះ កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ ៕
ចែករំលែកព័តមាននេះ