រាជធានីភ្នំពេញ ៖ សាកសពទារកម្នាក់ដែលអ្នកភូមិអះអាងថា អាចទើបនិងកើតបានរយៈពេល៣ថ្ងៃប៉ុណ្ណោះ ត្រូវបានជនមិនស្គាល់មុខ ពុំដឹងថាជាឪពុកម្ដាយ ឬនរណាទេ ច្រកក្នុងថង់ពណ៍ខ្មៅ១ រួចបោះចោល ដែលសង្ស័យថា…
រាជធានីភ្នំពេញ ៖ សាកសពទារកម្នាក់ដែលអ្នកភូមិអះអាងថា អាចទើបនិងកើតបានរយៈពេល៣ថ្ងៃប៉ុណ្ណោះ ត្រូវបានជនមិនស្គាល់មុខ ពុំដឹងថាជាឪពុកម្ដាយ ឬនរណាទេ ច្រកក្នុងថង់ពណ៍ខ្មៅ១ រួចបោះចោល ដែលសង្ស័យថា ទម្លាក់ពីលើផ្ទះជួលមួយកន្លែង ហើយត្រូវបានប្រជាពលរដ្ឋប្រទះឃើញនាំគ្នាទៅចោមរោមមើល ។
ហេតុការណ៍នោះបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង១០និង៣០នាទីព្រឹកថ្ងៃទី១៦ ខែមីនា ឆ្នាំ២០២៦ នៅចំណុចផ្ទះជួលស្ថុិតនៅខាងក្រោយផ្សារឯករាជ្យ១ ភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
បើតាមបុរសម្នាក់ដែលជាអ្នករស់នៅជិតផ្ទះជួលខាងលើនោះបាននិយាយថា នៅមុនពេលកើតហេតុ ខណៈដែលគាត់កំពុងស្ថិតនៅក្នុងផ្ទះ បានឮស្នូរគេទម្លាក់របស់ម្យ៉ាងពីលើផ្ទះជួលនោះលាន់សូកក្ឌុក ប៉ុន្តែខណៈនោះគាត់មិនបានចេញទៅមើលនោះទេ ព្រោះកន្លងមកអ្នកស្នាក់នៅផ្ទះជួលនោះតែងតែទម្លាក់ថង់សំរាមចោលជាទម្លាប់ទៅហើយ ។ លុះក្រោយមកស្រាប់តែអ្នកដើរឆ្លងកាត់ទីនោះប្រទះឃើញថង់ខ្មៅ១នៅកន្លែងដែលគាត់ឮស្នូរទម្លាក់នោះ ដោយមានជើងទារកម្ខាងចេញក្រៅថង់ ក៏ស្រែកប្រាប់គេឯងបង្កឲ្យមានការភ្ញាក់ផ្អើលនាំគ្នាទៅចោមរោមមើលក៏ឃើញសពទារកនៅក្នុងថង់នោះគួរឲ្យអាណិតអាសូរបំផុត រួចរាយការណ៍ជូនអាជ្ញាធរនិងសមត្ថកិច្ចឲ្យទៅពិនិត្យមើលតែម្ដង ។
ប្រជាពលរដ្ឋបាននិយាយថា ទារកនេះអាចទើបនិងកើតបានរយៈពេលប្រមាណ៣ថ្ងៃប៉ុណ្ណោះ ហើយពួកគាត់ពុំបានដឹងថា នរណាជាឪពុកម្ដាយទារកនេះទេ ទើបដាច់ចិត្តបោះចោលសពកូនប្រុសបែបនេះ ។ ដោយឡែកនៅប្លុកផ្ទះជួលនោះមានមនុស្សជួលនៅច្រើន ដូច្នេះពុំដឹងថានរណាមានផ្ទៃពោះសម្រាលកូនរួច បែរជាបោះចោលនោះឡើយ ។ ប៉ុន្តែទោះជាបែបណាឪពុកម្ដាយគួរតែមានធម៌មេត្តាបើកូនស្លាប់គួរតែយកទៅបញ្ចុះ ឬបូជាឲ្យបានត្រឹមត្រូវ មិនគួរយកបោះចោលបែបនេះសោះ ។
ប្រជាពលរដ្ឋបានបញ្ជាក់ប្រាប់ឲ្យដឹងបន្ថែមទៀតថា ពួកគាត់ពុំដឹងថាតើទារកនោះស្លាប់រួច ទើបត្រូវឪពុកម្ដាយទម្លាក់ចោលជាក្រោយ ឬក៏ទម្លាក់ចោលទាំងរស់ ហើយពេលធ្លាក់ដល់ដីទើបស្លាប់នោះទេ ប៉ុន្តែពេលប្រទះឃើញភ្លាមៗទារកនោះបានស្លាប់បាត់ទៅហើយ ។
នគរបាលបានប្រាប់ថា ក្រោយពេលទទួលបានដំណឹងនោះហើយកម្លាំងនគរបាលប៉ុស្តិ៍ចោមចៅទី១ បានចុះទៅចងខ្សែហ៊ុមព័ទ្ធទីតាំងកើតហេតុ រួចរាយការណ៍ទៅកាន់នគរបាលខណ្ឌពោធិ៍សែនជ័យ ។ ក្រោយមកក៏បានរាយការណ៍បន្តទៅកាន់នគរបាលការិយាល័យបច្ចេកទេសនិងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញចុះទៅពិនិត្យកោសល្យវិច័យ ។ បន្ទាប់មកបានប្រគល់សពទៅឲ្យអាជ្ញាធរសង្កាត់ចោមចៅទី១ ដើម្បីយកទៅបូជា ៕
ចែករំលែកព័តមាននេះ