ខេត្តព្រះសីហនុ ៖ ថ្លែងប្រាប់ទីភ្នាក់ព័ត៌មានរ៉យទ័រ លោកបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយនិងរដ្ឋាករ បានឱ្យដឹងនៅព្រឹកថ្ងៃ១៩ ខែកក្កដាថា ក្រុមហ៊ុនចិនមួយឈ្មោះ…
ខេត្តព្រះសីហនុ ៖ ថ្លែងប្រាប់ទីភ្នាក់ព័ត៌មានរ៉យទ័រ លោកបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយនិងរដ្ឋាករ បានឱ្យដឹងនៅព្រឹកថ្ងៃ១៩ ខែកក្កដាថា ក្រុមហ៊ុនចិនមួយឈ្មោះ Chingyuen ដែលមានភាគហ៊ុនខ្មែរ បាននាំសំរាមប្លាស្ទិកចូលកំពង់ផែក្រុងព្រះសីហនុ មានចំនួន៨៣កុងតឺន័រ ។ តាមប្រភពពីរ៉យទ័រដដែល លោកបណ្ឌិត គុណ ញឹម ថ្លែងថា បន្ទាប់ពីការស៊ើបអង្កេតចប់ហើយ បើសិនជារកឃើញកំហុសនោះក្រុមហ៊ុននេះនឹងទទួលការពិន័យ រួមទាំងប្រឈមមុខនឹងការបិទក្រុមហ៊ុនផងដែរ ។ សូមបញ្ជាក់ថា៖ សំរាមប្លាស្ទិក1600តោន នាំចូលពីអាមេរិក និងកាណាដា
លោក គុណ ញឹម បានថ្លែងប្រាប់រ៉យទ័រទៀតថា «ពិន័យដឹងតែពិន័យហើយ ប៉ុន្តែកម្រិតនៃការពិន័យយើងនឹងមើលតាមច្បាប់របស់យើងហើយក្រុមហ៊ុនក៏អាចបិទ» ។ លោកបន្តថា សប្តាហ៍នេះ នឹងកោះហៅក្រុមហ៊ុនដែលសហការគ្នានេះ មកសាកសួរ និងធ្វើការផាកពិន័យ ហើយបន្ទាប់មកនឹងតម្រូវឱ្យនាំសំរាមប្លាស្ទិកទាំងនោះទៅប្រទេសដើមវិញ ។ កុងតឺន័រទាំង៨៣ទូនេះ បានចូលមកកំពង់ផែស្វយ័តក្រុងព្រះសីហនុជាច្រើនដំណាក់ ពោលគឺចូលដំបូងកាលពីខែតុលា ឆ្នាំ២០១៨ ។
ទោះបីជាបែបណា ព័ត៌មានផ្លូវការទាក់ទិន នឹងក្រុមហ៊ុនដែលនាំចូលសំណល់ប្លាស្ទិកនោះ នៅមិនទាន់មានការប្រកាសជាចំហទេ ក្រៅតែពីប្រភពរាយការណ៍ដោយទីភ្នាក់ងាររ៉យទ័រ ។ លោក នេត្រ ភក្ត្រា រដ្ឋលេខាធិការក្រសួងបរិស្ថាន និងជាអ្នកនាំពាក្យ បាននិយាយក្នុងសេចក្តីថ្លែងការណ៍ថា អាជ្ញាធរគយកម្ពុជាបានគាស់កុងតឺន័រទាំង៨៣ទូនោះនៅថ្ងៃទី១៦ ខែកក្កដា ហើយឈ្មោះទំនិញទាំងនោះបានដាក់ថា«ផលិតផលសម្រាប់កែច្នៃឡើងវិញ» ដោយមិនបានបញ្ជាក់ថាជា«សំណល់ប្លាស្ទិក»ឡើយ ។
លោក នេត្រ ភក្ត្រា បញ្ជាក់ថា «រាជរដ្ឋាភិបាលកម្ពុជា មិនអនុញ្ញាតឲ្យមានជាដាច់ខាតនូវការនាំចូលសំណល់ប្លាស្ទិកមកកែច្នៃនៅកម្ពុជាទេ ។ កម្ពុជាមិនមែនជាធុងសំរាមសម្រាប់ការបោះចោលឧបករណ៍បច្ចេកវិទ្យាហួសសម័យនោះទេ ហើយកម្ពុជាតែងតែជំទាស់ជានិច្ចនឹងការនាំចូលសំណល់ប្លាស្ទិក និងប្រេងម៉ាស៊ីនមកកែច្នៃនៅកម្ពុជា» ។
កាលពីថ្ងៃពុធទី១៧ ខែកក្កដា អាជ្ញាធរកម្ពុជាបាននិយាយថា នឹងបញ្ជូនកាកសំណល់ប្លាស្ទិកនេះត្រឡប់ទៅប្រទេសដើមវិញ គឺសហរដ្ឋអាមេរិក និងកាណាដា ។ ចំណែកស្ថានទូតសហរដ្ឋអាមេរិកនៅរាជធានីភ្នំពេញនិយាយថា ខ្លួនបានដឹងអំពីរបាយការណ៍នេះ ។
អ្នកនាំពាក្យស្ថានទូតសហរដ្ឋអាមេរិក លោក ស្រី Emily Zeeberg បានប្រាប់ទីភ្នាក់ងាររ៉យទ័រថា ៖ «យើងបានស្នើសុំព័ត៌មានបន្ថែម ហើយកំពុងសុំផ្តល់ជំនួយពីរដ្ឋាភិបាលសហរដ្ឋអាមេរិក ដើម្បីកំណត់ទាំងអ្នកនាំចេញ (ប្រទេសដើមដែលនាំចេញសំរាម) និងប្រទេសនាំចូលនៅកម្ពុជា។ ដោយឡែក ស្ថានទូតកាណាដានៅភ្នំពេញ មិនបានឆ្លើយតបភ្លាមៗចំពោះការស្នើសុំពីរ៉យទ័រ ដើម្បីសុំការបំភ្លឺឡើយ ៕
ចែករំលែកព័តមាននេះ