ខេត្តមណ្ឌលគិរី ៖ ទីបំផុត អាជ្ញាធរខេត្តមណ្ឌលគិរី បានសម្រេចដកហូតដីនៅតំបន់ជុំវិញជើងភ្នំដោះក្រមុំ មកធ្វើជាសម្បត្តិសាធារណៈវិញ និងត្រូវបោះបង្គោលកំណត់ព្រំដីផងដែរ ។ ការសម្រេចនេះ គឺបន្ទាប់ពីមានកិច្ចប្រជុំបន្ទាន់មួយ…
ខេត្តមណ្ឌលគិរី ៖ ទីបំផុត អាជ្ញាធរខេត្តមណ្ឌលគិរី បានសម្រេចដកហូតដីនៅតំបន់ជុំវិញជើងភ្នំដោះក្រមុំ មកធ្វើជាសម្បត្តិសាធារណៈវិញ និងត្រូវបោះបង្គោលកំណត់ព្រំដីផងដែរ ។ ការសម្រេចនេះ គឺបន្ទាប់ពីមានកិច្ចប្រជុំបន្ទាន់មួយ រវាងអាជ្ញាធរនិងមន្ត្រីពាក់ព័ន្ធទាំងអស់ តាំងពីវេលាម៉ោងប្រហែល០៨ព្រឹកថ្ងៃទី០១ មីនា និងទើបបញ្ចប់នៅវេលាជាង១រសៀលថ្ងៃដដែលនេះ គិតទៅគឺមានរយៈពេលជាង៥ម៉ោងមកហើយ ។ គួររំលឹកថា ព្រឹកនេះ…មន្ត្រីពាក់ព័ន្ធជួបគ្នាប្រជុំបន្ទាន់ រឿងដី«ភ្នំដោះក្រមុំ»
គួរបញ្ជាក់ថា អាជ្ញាធរខេត្តរួមនឹងភាគីពាក់ព័ន្ធនានា គឺបានរកឃើញដីនៅជាយជើងភ្នំដោះក្រមុំ ត្រូវបានគេរំលោភយក ដោយមានធ្វើរបងព័ទ្ធយកធ្វើជាកម្មសិទិ្ធផ្ទាល់ខ្លួនមក បើទោះមានការរារាំងពីមន្ត្រីមូលដ្ឋានក៏ដោយ ។
លោកស្វាយ សំអ៊ាង បានថ្លែងថា ករណីនេះ ខេត្តតែងតែបានប្រជុំរកដំណោះស្រាយជាច្រើនដងហើយ និងបានដោះស្រាយជាបន្តបន្ទាប់ ។ រហូតមកដល់ពេលនេះ ដីទាំងនោះពិតជាបាត់បង់មែន តែការបាត់បង់នោះ គឺអាជ្ញាធរបានដោះស្រាយជូនប្រជាពលរដ្ឋជាក់ស្តែង ។ ហើយដីមួយចំនួនត្រូវបានរាជរដ្ឋាភិបាល ចេញ ស ជ ណ កាត់ទៅឲ្យអង្គភាពទឹកស្អាតដើម្បីប្រយោជន៏ផ្គត់ផ្គង់ដល់ប្រជាជនក្នុងក្រុងសែនមនោរម្យទាំងមូល។
លោកអភិបាលខេត្តបន្តថា កាលពីឆ្នាំ២០០៤ ពេលដែលភ្នំដោះក្រមុំត្រូវបានស្នើរសុំដាក់បញ្ជូលជាតំបន់ មជ្ឈមណ្ឌលវប្បធម៌ជនជាតិ ដែលមានទំហំសរុប១០១ហិចតា ។តែដោយការចន្លោះប្រហោងទំហំផ្ទៃដីមជ្ឈមណ្ឌលជនជាតិឬភ្នំដោះក្រមុំនេះ នៅសល់ទំហំ៩០ហិចតា នាឆ្នាំ២០១២ នឹងបន្តនៅសល់ត្រឹម៨៥ហិចតាក្នុងឆ្នាំ២០១៩នេះ។
បើតាមការលើកឡើងក្នុងកិច្ចប្រជុំខាងលើ ផ្ទៃដីដែលបានបាត់បង់ភាគច្រើនគឺបណ្តាលមកពីការព័ទ្ឋយកពីប្រជាជនដែលសង់របងលយចូលដីរបស់មជ្ឈមណ្ឌលជនជាតិនេះ។ យោងសម្តីផ្ទាល់របស់ប្រធានមន្ទីរដែនដី នគររូនីយកម្ម នឹងសំណង់ លោក ម៉ៅ ចម្រើន បានឲ្យដឹងថា បន្ទាប់ពីធ្វើបច្ចុប្បន្នភាពលើទីតាំងនោះផ្ទាល់ ដីភ្នំដោះក្រមុំមានផ្ទៃដី៨៥ហិចតា នឹងមានព្រំជុំវិញប្រវែង៤៥០០ម៉ែត្រ ហើយមន្ទីរបានស្នើរសុំគោលការឯកភាពពីថ្នាក់ដឹកនាំដើម្បីកាត់ខ្វៀលដីជូនប្រជាពលរដ្ឋដែលកាន់កាប់កន្លងមក នឹងបោះបង្គោលព្រំដីជាក់លាក់ជៀសវាងការរំលោភនៅថ្ងៃក្រោយ ។
លោក គ្រើង តុលា តំណាងប្រជាជនជនជាតិដើមភាគតិចបាននិយាយថា ការសម្រេចរបស់អាជ្ញាធរពេលនេះ គឺពិតជាបានផ្តល់ផល នឹងប្រយោជន៏ជាច្រើនដល់បងប្អូនជនជាតិដើមដែលជាម្ចាស់ស្រុកនឹងបានបម្រើដលលវិស័យទេសចរណ៏ផងដែរ។
មហាជនបាននឹងកំពុងរង់ចាំមើលពីចំណាត់ការរបស់អាជ្ញាធរ តើអាចចាត់វិធានការចំពោះអ្នករំលោភយកដីរដ្ឋបែបណាខ្លះ? ព្រោះនេះជាជំងឺរ៉ាំរ៉ៃមួយដែលបានកើតជាយូរមកហើយ ។
ចែករំលែកព័តមាននេះ